يالربع محتار بين موترين للبر !!

[فهد 333]

والله يااخوي ماتجتاج شوير
الشاااااااااااااص وانت مغمض واترك المروح مع احترامي لعشاقه

[قدر مكتوب]

اخوي انت ماراح تجلس طول عمرك عزوبي ومو معقول مايركب معاك احد من ربعك او تحتد يوم تسافر على الموتر ومعاك اهلك

وبعدين الشاص مايركب فيه الا 2 فقط وان كثرت 3 بينما الباترول 5 بالراحة واريح بالخط

انت استعمالك ايش ؟ اذا مقناص ومعاك موتر ثاني اقولك شاص اما اذا موتر رسمي وبر جميع خذ باترول بالديره حلو وبالخط راسي وبالبر احسن واحسن ولكن تصور نفسك يوميا على هالشاص لفه طويلة ومطاب وحاله


باترول + جنوط فتك شكل وحلو والمكينه قويه (صحيح ماتقارن بالشاص بس تعتبر نشيطة )


عن نفسي الباترول يتفوق في التالي وانت احسبها
1- اقل من ناحية السعر
2- اريح بواجد من الشاص
3- ارسى من الشاص لا في بر ولا في ديره


الشاص يتفوق في
1- قوي وانشط عزم
2- حوض اذا تفكر تحمل

[ابوصالح3]

خذ النيسان اريح لك وارخص واول 4 سنين من زواجك بيشيلك انت وزوجتك وولي عهدك والنائب الثاني والشغاله

[صايد ابوعوايد]

من واقع تجربة
عليك بالبرادو
عزالله إنه موتر بالبر أو في المدينة ويشيل 5 أشخاص بالراحه حتى لو شلت المرتبة الخلفية ...وتقبل تحياتي ...

[النبع الصافي]

الله يكتب لك الخير
لكن عن نفسي ولا قد جربتهن كلهن بس أشوف الشاص ماسك سمعته عند جميع الفئات حتى مع التغيرات اللي صارت له مؤخراً إلا أنه ماااااااسك مكانه ودايم أدعي ربي بواحد

[هائم]

عليك بالنيسان وابعد عن الشاصي اللي يقطع الظهر والي احسن منهن الشيروكي سرعه وخف وراحه بس يبي له صيانه

[هولان]

شف يالحبيب انت مع كثر الرمي تبي تنسبه لكن خذ العلم الدعوا كلها ترجع لك انت وانت ابخص بنفسك كانك من راعين المطاريش البعيده فانا انصحك بالشاص اول شي لانه به حقه بالعزم وهذا لا يختلف عليه اثنين وتركب عليه توانكي تشيل من الماء لين تعجز ومنها يرسي عن المطاب < مع انه لو مابه مطب ما يقال له شاص > ولو تبي تحطب والا تبي تشيل الخيمه والاغراض والذبيحه مابه امل يقول لا غير كذا الشاص يجي ونش ودفلك اما الباترول يجي ربي كما خلقتني مع احترامي وتانكي الماء شحاذه والحطب وباقي الاغراض < رح ونروحهن لك بموتر ثاني > وقبل كل شي استخر < بدري

[كريم الطباع]

شف وانا اخوك الباترول الربع قيمبته بـ95 << ومع احترامي لملاكه مهنا عزم وخصوصاً في الجدد نفس الشكل الي انت حاطه وفي الخط ياقف على ال160 لين تمرنه انت وفي النفود عز الله انه بطه وعساه يدف عمره واذا جيت تبيعه مايجيبلك سعر يستاهل مثل التيوتا

و الشاص قيمته حول ال105 << ميزته شيك في البيع عزمه فوق الممتاز في البر + الديره ويوصل مواصبل ماياصلها الا هو و المقفص ومهنا خرابات

وان بغت ترتاح وموتر حليو وحجمه حليو وقوي وبحول القيمه الي معك شفلك فورنتشر ولا برادوv6 عز الله انه موتر ويناطح الاند و الفتك في القوه و الممشى في البر وحلاته وسيع وتقدر تجدع المرتبه الثالثه وموتر بيكد ويمد معك حتى لو بغيت تتزوج لياه يواجه شوي وممشاه فوق الممتاز وصرفيته حلوه وقيمته مابين ال106 لل116 على حسب المواصفات الي تبيها

واذا كنت تبي قير تماتيك وصغير ترا الاف جي اثبت وجوده < سبق لي تجربته مع احد الاخوان وطلع فوق ما كنت اتصوره وخفيف نفس << اهم مافيه انه شيك وقت البيع وطلابه كثااااار من شيبان وشباب

[البواردي.]

اذا تبي نصيحه الشاص 2006 او 2009 هو اللي ينسيك هموم الدنيا في البر

ومن ناحية انه يكسر الظهر : خذلك كفر عراض والله مايكسر ولاشي ياشيخ انا ركبته كنك راكب فكس ار مريح مره

والعراض مايغرز في الطعوس يعني مايحتاج دبل

هاذي مجرد نصيحه : انت اخذ اللي يعجبك

[سعود بن حايل]

شاص ولاتشاور كدة كم سنة وبعه بسعر مايفرق واجد عن السعر اللي اشتريته به

الشاص شيك

[عنيزاوي 911]

والله اخوي اذا تبي النصيحة الصح رح لم واحد معه باترول واساله .. ورح لم واحد معه شاص واساله

واذا تبي رايي مثل ماقالو الشاص ويكفي انه تويوتا مثل الذهب تشري وتبيع ماخسرت شي

وغير كذا اقوى و اكثر تحمل و بالنسبة للركاب ترا يشيل 4 يعني لا تحقره ,, وانت تقول تبي موتر بر يعني مايهمك الراحة والاشياء اللي تخص السياراة الصغيرة ,, اتمنى اني افدتك والله يرزقك باللي فيه الخيرة ,, ولاتنسى صلاة الاستخارة تراه اهم شي

[صيادالجبيل]

ان كانك راعي بر واجد عليك بالشاص وبعدة الجي اكس ار 2010او 2011

[HAS5SAN]

مقارنة ظالمه للسلق
لذلك الكفه تميل للشاص بكل تأكيد

[HAS5SAN]

طيب وش رايك في ها الزين :



وخاصة مكينته خوووورافيه

[هدد7]

صلاة الاستخارة وانا اخوك