يوميات بدوي في امريكا...

[جون الشمالي]

هذه القصة نقلتها لكم وهي تحكي حياة شخص مكافح عاش في الربع الخالي في بيئه بدوية ..واللي كاتبها الشخص نفسه صاحب الذكريات ..القصة مليئة بالفكاهة والطرافة وكذلك الجد والمثابرة.
وراح أنزلها على حلقات ..بسم الله نبدأ :

الحلقة الأولى :
صحراء ..بيوت شعر ..270راس من الغنم ..34راس من الأبل ..الله يشرفكم كلبين لزوم الحراسة ..وايت قديم لزوم تموين الجماعة بالمويه ..الموقع الربع الخالي ..مجموعة عوائل بدوية جداً تنتمي إلى قبيلة عريقة من قبائل الجزيرة .
ولدت في البدو وعشت وتربيت ..الغريب جداً أن أبوي الدكتاتوري القوي جدا وافق أني أدرس رغم أني أصغر أخواني الأربعة اللي يعتبر أكثر واحد فيهم خريج صف ثالث ابتدائي مكافحة .أنا درست وماراح أقول لكم الماَسي والبلاوي اللي كنا نواجهها بس على شان نروح أو نجي من المدرسة. فما بالكم بغيرها . على العموم خلصت الثانوي ـ علمي واللي حولي كلهم كانوا يقولون أني عبقري وفعلا خلصت الثانوي بتقدير امتياز وكانت النسبة 97في الميه .طبعا النتائج أخذناها من المدرسة بعد كل الناس ماخذوها اللي بالتليفون واللي بالجرايد وغيرها .بالنسبة لنا ما نعرف شي اسمه جرايد ولا نعترف بها.طبعاًممكن تقيسون على هذا باقي وسائل الأعلام مثل التلفزيون اللي كانت جدتي الله يرحمها اذا جابوا طاريه الناس اللي يجون من المدينة كانت تسميه النصراني ...الراديو أو الرادي مثل نسميه كان هو الوحيد الموجود
كان يشغله واحد من الجماعة في الصبح على شان يسمعون الناس القراَن .واحد من أعمامي كان هو الوحيد اللي يشتغل في المدينةوكان يروح لشغله في الإمارة وكان عنده سيارة حوض وكل أسبوع اذا كان موجود ياخذ الشيبان ويرحون يصلون الجمعة وكان يمر على الإمارة ويشيل كل الجرايد اللي هناك لأن أكثر الناس ماتاخذها ويجيبها ..طبعا ماهو ثقافة والا زود علم لأنه أصلا مايعرف يقرأكان جزءمنها نفرشه سفره والجزء الباقي تاكله الغنم (تصدقون ..يعني غنمنا مثقفه أكثر منا) ...نتيجه الثانوي كانت في بعض ها الجرايد ومع ذلك مادرينا عنها . ذاك اليوم يوم اني أخذت النتيجه وجيت أول واحد قابلته ابوي قلت له (يبه يبه أبشرك نجحت بممتاز ) عارفين وش قال لي ...قال: بركه أفتكينا من هالدراسة
يالله خلنا نروح نجيب (الفاجر )من عند فلان .انتهى كلام أبوي ...طبعا الفاجر هواسم بعير كان الوالد يعزه كثير وبدون مبالغه كان يعزه ويعز بعض الحلال أكثر منا حنا عياله .على العموم قلت له أبشر بس خلني أسلم على أمي ودخلت وسلمت عليها وعلى أخواتي وبشرتهم ..قالت أمي بسوي لك براد شاهي (جائزة النجاح )الشاهي في ذاك الوقت كنا نعتبره شراب الاستقراطيين لأن وجوده كان نادر جدا وكانت الفهوة العربية هي المشروب الرسمي ..الأكل كان بسيط ثلاثه أو أربعة أشياء رئيسيه تدخل في عمل عدة أصناف ..الأشياء الرئيسيه هي :البر واللحم واللبن والتمر (الرز ما كان موجود بتاتا مولأن حنا مانعرفه بس كنا مانحبه )..على العموم رحت مع الوالد ورجعت بسرعة وطول الطريق رايح جاي وأنا تفكيري في الشاهي (لاحظوا واحد مخلص الثانوي علمي وجايب ممتاز ويفكر بس في الشاهي )رجعت حصلت الوالده والبنات جهزوا الشاهي وسووا خبز البر على الصاج.....وقمنا نشرب من ها الشاهي ونغمز من ها الخبز ......طبعا شاهي الباديه دايم يسوونه على النار ويزودون السكر لان الاكلات الحاليه عندهم قليل جدا....وطبعا شاهي امي كان (عسل مره) من كثر السكر......وذاك اليوم طبعا قضيت اكثر
الوقت خارج البيت ماهو لاني ابغى اتمشى ولا فرحان بعد الامتحانات لا والله من المغص
اللي ذبحني بعد الشاهي.....

في الحلقة الثانية راح أقول لكم إن شاء الله وش صار يوم قال لأبوه أنه يبغى يدرس في مدينة ثانية
إلى اللقاء

[Hand Some]

روح اخوي جون الشمالي

انا متابع لك وبقوة

وان شاء الله ماتتأخر علينا

الله يوسع صدرك بالعافية

[طفران بس بطران]

ماتبعين بقوة

[جون الشمالي]

الحلقة الثانية

مرحبا بالجميع……بدت اجازة الصيف وما تتخيلون والله العظيم كل الهم كان بامور الحلال والرعي والبحث عن اماكن جديده فيها مراعي وتزين للسكن……قبل نهاية الاجازه بحوالي شهر ونص كان فيه عزيمه في بيت عمي (المناسبه كانت ختان) البدو عادة يحتفلون بختان الذكور……وفي ها المناسبه جاونا ناس من جماعتنا الحضر وكان معهم مجموعه من عيالهم اللي هم اصلا كانوا زملائي في المدرسه. ذاك الليل كان ها الشباب ما لهم كلام الا التسجيل بعد الثانوي ……(وين سجلت …؟…وين بتروح…..؟؟….وش ناوي عليه…؟؟…) يعني من ها القبيل …وطبعا اخوكم اللي هو انا نايم في العسل ومشغول بحلال ابوه …..ومعني نفسي ذاك الليل بصب القهوه للضيوف. راحوا الدفعه الاولى يتعشون اللي هم الشيبان ومتوسطين السن…وبقي الشباب…..طبعا ما هو احترام او تقليد لكن الحضور اكثر بكثير من العشا..!!!. كانت فرصه اني اسولف انا والشباب اللي كانوا زملاي في المدرسه….وقاموا يشجعوني ويقولون معدلك عالي وكل الجامعات والكليات بتقبلك …..وحرام تضيع ها الفرصه…..وقالوا بعد… ان التسجيل بدا وانهم راح يمشون بعد اسبوع مع بعض يسجلون اللي في الرياض واللي في جده واللي في الشرقيه. والله انا بديت افكر…..يعني لازم اكمل دراستي وايش يعني لو كملت؟؟؟….طيب وحلالنا وعيشتنا….ابوي اخواني…امي…..اهلي …جماعتي…….وهذا كله كوم ومفاتحة الوالد في الموضوع كوم………هذي والله البلشه. فكرت في الموضوع وقلت ليش لا خلني اجرب يمكن يكون في مواصلة الدراسه خيره،
وبعدين لو فشلت او ما عجبني الوضع برجع وما وراي احد بيقول لي شي بالعكس الوالد ابرك ما عنده اذا رجعت…هذي خلصنا منها..زين الحين الوالد وشلون نوصله وهو اللي يا الله خلاني ادرس جنبه في نفس المدينه ما بالكم اذا قلت مدينه ثانيه….فكرت وشفت ان احسن شي اني اوصله عن طريق شخص غيري. رحت لعمي الموظف راعي الجرايد اللي قلت لكم عنه وقلت له الموضوع وكان اصغر من ابوي بس العلاقه بينهم قويه وقلت له على الموضوع….طبعا في البدايه حاول يقنعني ان الدراسه ما فيها خير واحسن لك تجلس عند ابوك وتنفعه وتنفع حلاله ….وتعرس وترتاح……واذكر انه قال لي بالحرف الواحد….(ياولدي وش تبي من الدراسه تراها ما نفعت اللي ضيعوا حياتهم في الطراد وراها…..وبعدين انت معك منها خير وش عاد تبي….) كلام منطقي صح..؟؟؟؟؟؟!!!!!!!….ضغطت عليه وقلت له الوالد عنده خواني وفيهم خير وانا بس بطلع اجرب اذا ما ارتحت برجع، والوالد بعد قوي ويقدر على تصريف حياته بنفسه…..المهم قال لي….(خلاص بنشوف)….انا طبعا طلعت في راسي وقلت له التسجيل بيبدا ولازم امشي الاسبوع الجاي واللي يجي متأخر ما يسجلونه وبعدين ابا اطلع مع العيال (زملاي). قلت له الليله بعد صلاة المغرب …وبصراحه وافق بس ببروود ومن غير اقتناع. صلينا المغرب وكان اصعب مغرب في حياتي لدرجة اني الى الحين ما ادري صليته ركعتين ولا ثلاث……الخوف ما هو من ان الوالد ما يوافق..الخوف من انه يتوطا بطني …وانتوا ما تعرفون ابوي فنان مرره في ها الحركات. بعد الصلاه جبت القهوه وصبيتها والعم كان ناسي بس يوم شافني اصب القهوه تذكر واخذ الوالد على جنب وقال له الموضوع وما ادري العم كان معي ولا علي. نادوني معهم وهنيا بدت العظام ترقل ، قال ابوي وش ها الكلام وش تبي بالدراسه …وحلالنا ….(لاحظوا الحلال دايم يجي في المرتبه الاولى …يعني اتوقع لو خروف من الحلال بيطلب من ابوي يسفره لامريكا يدرس بيسويها لانه يعزه مره…؟؟؟!!) ….ما دريت وش اقول …استجمعت كل القوى اللي عندي وقلت كل اعيال الجماعه بيروحون يدرسون برا (مدن ثانيه)….(وعلى فكره البدو احيانا يسفهون الحضر وما يبونهم يتقدمون عليهم) قال لي من العيال؟ قلت عيال جماعتنا اللي بالمدينه ….قال لي طيب كم بتجلس ووين بتروح…؟.قلت مادري تعتمد على المكان اللي بسجل فيه. يوم شاف اني مصمم …اسمعوا وش قال ….! قال (طيب ليش ما ترجع لمدرستك لوله وتكمل فيها…..)…..لاتعليق….!
بعد محاولات وضغط من طرف اخواني …امي اللي ما كانت اصلا مستوعبه الفكره ولا مصدقتها بس كانت معي…..ابشركم وافق…… .. وفي المره الجايه بكمل لكم مواقف الطياره …..والبحث عن المستقبل الى

اللقاء

[ماجد الشامان]

تسلم ياااااااااااااااااااااااااااجون الشمالي ااااااااااااااااااااااااااا
الله يوفقـــــــــــــــــــــــــــــــــــــــــك

ونتظرمنك لماهو اكثر امتاع وهو التحول من الحياة التي كنت عايش فيها الى الحضارة والتقدم واتمنأ ان يكون الجزء الثالث في اقرب وقت

والف شكر على التقديم الرائع والمتميز في نفس الوقت

[e7sas_dim]

بارك الله فيك أخوي جون الشمالي
ما شاء الله تبارك الله تمتلك اسلوب قصصي مميز
متابع لك وفي انتظار باقي حلقات القصة
ودمتم بخيـر

[tahoe_120881]

الله يبارك فيك ويجزاك خير طرح رائع واصل انا متابع معك

[بنت الوشم511]

يعطيك العافيه

[جون الشمالي]

الحلقة الثالثة

بعد مشقه ورجاوي وعقُل وشمُغ طاحت بين ايدين الوالد وافق....صحيح اني ارتحت بعد ها الموافقه بس كان فيه شعور باني تايه واني بسافر بدون اي هدف او خطه وهذا شي طبيعي بالمقارنه مع طبيعة المجتمع اللي خارج منه. على العموم الحين جا وقت ترتيبات السفر اللي ما تعودنا عليها ولا فيه احد من الجماعه يعرفها ، بس ها المره جات من الوالد قال لي جهز نفسك على شان تروح معنا للمدينه ونحطك عند ابو فلان (واحد من الجماعه اللي ولده بيسافر معي) على شان يدبرونك مع عيالهم اللي بيسافرون. بيني وبينكم انا ما تعودت على المدينه وعيشتها والسبع ساعات اللي كنت اقضيها في المدرسه كنت اشوف انها واجد ودي ارجع للبر بسرعه (لاحظوا التناقض رغم اني راح اودع البر نهائيا)......رحنا للمدينه وعطاني ابوي فلوس صدقوني ما ادري هي كانت اقل ولا اكثر من حق التذكره ولا لا ، قال عطها ابو فلان يسنع لك السفر. تغدينا عندهم ذاك اليوم وبعدين تركني ابوي وراح وقال بمر عليك بكره للعصر...من الاشياء الزينه اني والحمدلله كنت مقبول من الجميع ما اذكر ان فيه احد ابدى لي عدم رغبته فيني او حقده علي، على شان كذا كنت محل ترحيب مره من هاالناس وكانوا مهتمين فيني (لا تسألوني عن اكلهم لانه كان عجيب غريب علي وكان


بالالوان خصوصا الحلويات) تصدقون اكلهم جلست مده اسولف لهلي عنه في البر. حجزنا واخذنا التذاكر والسفر بعد اربع ايام.....ها الاربع ايام كانت مليانه حزن ودموع ومحاولات اخيره لتغيير راي عن الدراسه برا بس انا كنت متمسك رغم اني كنت متأثر جدا خصوصا بدموع الوالده. مرت ثلاثة ايام على نفس الحال ولازم اروح لجماعتنا في المدينه قبل السفر بيوم .....في اليوم الثالث يوم الوداع مسكني ابوي على جنب واسمعوا زين وش قال لي(.....الله الله في الرجله وفي الصلاه والدين وترى ما ودي اسمع انك صرت مدرس (لاحظوا مدرس اعلى درجه علميه يعرفها!) ....بس ماتكرم ضيوفك ولا تساعد اهلك اذا لفوا عليك.....ويلك ثم ويلك لجاني خبر انك فشلتني ولا مشيت في دروب السرسره (الفساد).....وانتبه من اعيال الحرام واذا نمت عند احد لا تنام قبله خله ينام لاول ...ولا
تمشي الا مع عيال جماعتك وعيال الحمايل.........الخ).....نصيحه ذهبيه صح..؟؟؟!!
عطاني مبلغ كان حوالي سبعميه اوالف والله ما اذكر ....امي بعد قامت تحط لي من ها الاكل في الشنطه....ودعت اهلي والجماعه كلهم نفر نفر وخروف خروف على شان (الوالد مايزعل)....ومشينا وكان المشوار مدته حوالي ساعتين وعليها وكان اطول مشوار في حياتي لانه مليان نصايح مالها لزوم...حطوني عند الجماعه في المدينه ......وجا موعد الرحله وكنا اربعه وكنت انا اكثر واحد فيهم كشخه؟؟؟؟؟!!!!! طبعا الحين انا مقبل على تجربه غريبه غير علقات الوالد وتسحيباته والخوف منه ...تجربة الطياره.ما تخيلون انها جاتني لحظه بغيت اغير رايي وارجع كله بسبة الطياره......تماسكت وركبنا الطياره وكنت مبتسم
ابتسامه اخفيت وراها كميه رهيبه من الخوف...اقلعت الطياره وما ادري كيف اوصف
الشعور...على العموم بعد ما ثبتت السرعه جاب المضيف الجرايد وكنا ثلاثه الشباب وانا
جالسين جنب بعض والرابع جالس في مكان ثاني ....وعلى شان انا (ستيك) وما ني بوجه
طيارات حطوني على الدريشه على شان اشوف ....المهم جا المضيف بالجرايد اللي علاقتي بها سيئه ووزعها يوم انه عطانا الجرايد شفت خويي اللي جالس على الممر حط يده في جيبه وانا عاد ما كذبت خبر واطلع فلوسي واقوم احلف ابي احاسب على الجرايد....طبعا المضيف انبهر واخوياي اللي تفشل واللي ضحك....وقال المضيف (يابو الشباب هذي بلاش) طبعا انا فضلت اني اقلب وجهي واجلس اناظر مع الدريشه احسن لاني عارف الجرايد بدت تنتقم مني ......على فكره انتوا عارفين ليش خويي حط يده في جيبه......ابد كان يبغى يطلع سبحته...!!!!!...نسيت اقول لكم رحلتنا كانت متجهه للشرقيه...
متى تبوني اكمل .....

[الفيصل2009]

متابع وامانة ماتطوووووووووووووووووووول علينا

[ابو الوهب]

الحيييييييييييييييين اذا يحصل

[جون الشمالي]

الحلقة الرابعة

هلا وغلا بالجميع وارجو المعذره على التأخير . على العموم مضت رحلة الطياره على خير واكتشفت بسرعه انها ممتعه وتصدقون قمت افكر واسأل الشباب اللي معي كيف الطياره تطير وقمت بعد اتذكر قوانين الفيزيا والرياضيات اللي درسناها....ما طولت ها الحاله كثير ووصلنا الرياض ....وكنت قبل ما تهبط الطياره اشوف انوار المدينه من فوق (ما راح اقول لكم وش كنت اظنها لأنها قويه شوي...!!!!!)....جلسنا في الرياض حوالي ساعتين وبعدين واصلت الرحله في طياره اكبر وناس اكثر وها المره كان فيه بنات يخدمون علينا في الدرجه السياحيه اللي ما دريت عنها الا في سنين متأخره بعد ما ركبت الطياره. رغم ان الرحله من الرياض للظهران كانت اقل من 45دقيقه بس كانت ممتعه جدا....وصلنا الشرقيه الساعه 11 في الليل واخوكم زي الاطرش في الزفه ما غير امشي ورا الشباب وما على لساني غير (بروسكم...فوقها) ماهو لاني بطران لا والله من قلة الدبره. فيه اثنين من الشباب اللي معي لهم قرايب في جامعة البترول وكان فصل الصيف في اخره ورحنا لهم في السكن وجلسنا على قلوبهم بالرغم من فترة الامتحانات اللي كانت في ذروتها وحنا ولا هنا. زي ما قلت لكم لا خطه ولا هدف ما غير مع الخيل ياشقرا....حتى السؤال كنت اخجل اسأل على شان ماحد يضحك على. بس الشباب والله ما قصروا قالوا لي انت معدلك عالي يعني قدامك ثلاث اشيا تسجل فيها ....جامعة البترول...ارامكو (ارامكو فيها نظام ابتعاث لامريكا لدراسة الهندسه والتخصصات العلميه)....والثالث كلية الطب...في جامعة الملك فيصل في الدمام. فكرت في كلامهم وقلت طيب ممكن اسجل فيها كلها واللي يجي يجي...قالوا عادي اذا ما تضارب وقت تسجيل واحد منها مع الثاني .....بيني وبينكم الطب ما فكرت فيه كثير...ماهو لانه صعب او ما اقدر عليه بس لان الفكره عن الطب ان شغلة الطبيب بس انه يضرب ابر ...لا ووين يضربها ...كبدو ننسى او نتناسى انه يضربها في اليد او في اي مكان ثاني ونركز بس على (الفخذ) وطبعا وانا اكتبها لكم فخذ الحين ترى مهذبها كثير الاهل هناك في البر يسمونها اسامي عجيبه غريبه وعاد تعالوا قابلوني لو اني قلت للوالد اني بطلع (تختور) على قوله. عموما ما علينا انا حطيت في بالي جامعة البترول وارامكو وبديت في اجراءات التسجيل وكانت ها الاجراءات في جامعة البترول اقل واخف اختبرنا اختبار القبول اليوم وبكره كانت المقابله الشخصيه وقرارهم بقبولك او لا....وكان القرار بالقبول والحمدلله...بالنسبه لأرامكو لا كانت اختباراتهم طويله ومعقده وتابعتها لدرجة ان الدراسه في البترول بدت قبل ما تنتهي. من المواقف الكثير اللي حصلت لنا في الشهر ونص اللي جلسناه موقف في مطعم الجامعه ....نظام المطعم ان الشخص يدخل وياخذ صحنه وعدته ويمشي وياخذ الاكل اللي يبي من على السير ....بعد ما تاكل مفروض انك تاخذ صحنك وتقطه على سير الغسيل....وطبعا شباب والشغله في روسنا يعني بالبدوي الواحد منا يشوف نفسه (وليده) وشلون انا ولد فلان اشيل صحني ...المهم قمنا رغم ان العالم كلها كانت تشيل صحونها بكل طيب خاطر.... حنا لا قمنا ولا عبرنا احد ويوم صرنا خارج المطعم الا واحد من عمال المطعم ينادينا بكل عصبيه ويقول (لازم انتا في يرجع يشيل صحن...!!!)طبعا كل واحد رد الرد اللي هو والعامل طلعت في راسه ...ما اطول عليكم مدمدناه علقه عمره ما شافها وحطينا ارجولنا ولو احد عرف من اللي سواها والله لا دخلنا الجامعه ولا غيرها....طبعا انا ما اقول ها الكلام وانا اتمدح بالعكس حنا بصراحه كنا غلطانين والف غلطانين وهذي ماهي بداوه ولا شهامه هذي بصراحه تخلف وشوفة نفس على خلق الله. اسمحوا لي اكمل لكم بكره واخبركم عن مواقف اكثر ومع الف سلامه

[الشقردي 205]

ايه هذي اللي ارسلتها لي بالجوال أخوي / جون الشمالي . . .


تسلم على المشاركة الرائعة الله يوفقك . . .

[ابو الوهب]

قصة جميلة نحتري التكملة

[ولد وايل]

ههههههههههههههههه

اقلاااااااااااااااااااااااااااااااااع


كمل في انتظارك