بعض الكلمات وردها

[العبيطلي]

مشاركتي في هذا الموضوع الجميل هي كالتالي :
تقول للقادم من سفر : سلامة الأسفار . الجواب : الله يسلمك من النار .
تمد الفنجال للرجال وتقول له : ساعده . والجواب : سلم سواعده وبالخير واعده .
وكذلك ممكن تقول : جبا . والجواب : عدوك يهبا .
واذا طلبت من احد خدمه وقال لك ابشر . الجواب : مبشر وسالم من الشر .
واذا قال لك احد ( الحذيه ) . الجواب : ابشر بالعطيه .
اذا كان خويك يده اليمين مشغوله وناولك بالشمال وقال لك : مدك الله باليمين . الجواب : كفاك شر الظالمين .
اذا قال لك الرجل ونعم . الجواب : ما عليك زود . ولكن اذا قالت لك المرأه ونعم . فلا تقل ما عليك زود ولكن قل الله ينعم عليك .
اذا احد هناك بالمطر وقال لك تهناكم الرحمه . الجواب : يهناك خير والخير مشترك .

[.أبوعبدالرحمن]

الله يعطيكم العافية جميعا وسلمتوا يا رجال

وفي انتظار البقية حتى يتم جمع جميع الكلمات و الردود إن شاء الله لتنفرد في موضوع كامل حتى نضمن بإذن الله وصول الفائدة ...


وراعي العهد عطنا العلم لنستفيد

[مخاوي دابذريع]

الله يعافيك اخوي ولا تـــــــــــــــــــــــعبت

[نايف الجهني]

اعجبني الموضوع وحبيت المشااركة .

في ايام العيد عند المعايده وجاك رجال وبعد المعايدة عند خروجة
.......قال........عاد عيدهم الرد عاش حبيبنا وحبيهم
لي عوده

[كارنو.]

موضوع جميل

أذا قالك أحد كفو تقوله . يشملك العفو للعرابجة فقط >كوميدو على غفله

[خشم الرثمه]

إذا قالك أحد..

طلبتك .... عطيتك

قلت لواحد..كل عام وانت بخير ... قالي ( شكرااا )

[سرطوقا]

اهم شيء الواحد يكون لسآنه ماينطق الا خير ولا هو عيب في الرجال اذا لقى كلمه وماعرف يرد عليه


فالكم خيـير

[بواردي الدلم]

إذا تعثر احد او سقط تقول له إسلم فيقول لك ومن قال سالم

وإذا وقع على الارض تقول عليت ويقول لك لا بليت

وإذا قال لك أرحب تقوله البقاء او تبقى

ـــــــــــــــــــــــــــــــــــــــــــــ

وإذا فزت عليه في الكوره او غيرها تقوله له هارد لك هههههههههههههههههه

[بواردي الدلم]

إذا قال لك احد انخاك ولا انخا الذيب او ازهمك ولا ازهم الذيب تقول يخسى الذيب بس ياويلك تهون خخخخخخ

[مقرع الحق]

حتى الان ما فيه احد جااوب ع الرد
اذا قالك واحد العهد قريب وش ترد عليه

عهدك مايزال (طبعى اذا كان الرجال ماله من سلامك فترة يقولها ليستأذنك في الوقوف يعني زي عز الله قيامك ولو اختلف السبب )

عز الله قيامك ==>و القاعد مايهون

شرواك ==> شرواك الطيب

اذا زهمك احد ==> يافرحتك او ياعونك

طبعا للحاج او المعتمر يههنيك الفضل ==> يهنيك خير والله لايحرمك




ولي عليكم رده

[Mzoon]

موضوع قيم ..

شكرا لك اخي ..

[.أبوعبدالرحمن]

بارك الله فيكم

وانتظار البقية

[مخاوي دابذريع]

طيب يالربع لا قالك واحد (( فداك هالسلاح او فداك الموتر ولا فداك هالحاجه الفلانيه وش ترد عليه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[مداحش]

وش حال خصوصك : ماخصك شر
الله يحييك : الله يبقيك

[.أبوعبدالرحمن]

طيب يالربع لا قالك واحد (( فداك هالسلاح او فداك الموتر ولا فداك هالحاجه الفلانيه وش ترد عليه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

فداك اللاش ، والله أعلم


في انتظار بقية الاعضاء