الله يرضى عليك ياخوي يابو نايف ..
بصراحة لما حملت الشيلات هيضتني لحياتنا منول فسجلت أبيات بسيطة
و متواضعه جدا لكنها صدى عفوي لما سمعت القصايد الفاخرة بصوتك
فهذي أبياتي العفويه أقول فيها :
يا بو نايف هجدني صوتك البارح وأنا نعسان
سرى ينقض على روحي جميع اللي يضايقها
أمانه أرفق أبحالي تراني من الشقا مرضان
ونفسي مع جميع الناس أبد مانيب طايقها
زمان أول تشوف الناس في راحة وسط خليان
لو أن الجسم يتعب من ورا العيشة وطرايقها
على الطيبة يعيشون وبساطتهم هي العنوان
نفوس من الذهب والماس كن الله خالقها
وشوف اليوم حال الناس ذا ضايق وذا بلشان
وذا لولا الحياء من الله أزرار الثوب شققها
تقول أن " التطور" عاث بالعالم وجاب أحزان !
تقول أنه يسوق الهم والراحات يسرقها !
ياليت أن الزمان يعود ونعيشه مثل بدوان
نبي ترجع لنا الراحة ونشهد يوم مشرقها
على الله نشكي الحال وعلى الله دايم التكلان
عسى ربي يزينها وجروح القلب يرتقها
مع خالص شكري وتقديري \ شخص حي .