بالنسبه للكفارات والجنوط

[رانجلر]

السلام عليكم

بالمختصر يا شباب

انا ناوي اركب جنوط عراض للرانجلر
لاكن إنصدمت لما كثير من الناس يقولون يعدم علي الدفرنسات والقير!!!

فهل هاذا صحيح؟؟

بعدين نفس الشي بالنسبه للشاهين
قبل إمس كنت بركب شاهين قالي البنشري لا تركب!!

وقالي نفس السبب؟؟




ارجوا منكم الرد يا جماعه تراني والله محتار!!

[الشيخ]

يا اخ رانجلر وش تبي بالجنوط العريضة كان عندي جيب رانجلر 95 ما طول عندي سنة بس
كان علليه الجنوط الاصلية شكل النجمة قوية وممتازة وشكلها حلو
اذا تبي عرض حط كفرات عريضة والله ما اذكر المقاسات لكنها افضل من الجنوط العريضة لانك لو نزلت ظغط الهوا راح يصير الكفر كنه جنزير دبابة ( عريض جدا ) يعني مافي طعس ولا رمل يقدر يوقف لك سيارتك
هذا راي شخصي ومن تجربة شخصية وانت ادرى بالي ينفعك

وسامحني اذا طولت عليك

[رانجلر]

هههههههههههههههههههههههههههههه

تسلم لي يا بعدي

يعني لو أركب جنوط عراض مافي شي بيوقف بطريقي إن شاء الله

لإني والله بتحدي مع الشايب هو على الإستيشن (VXR) وانا على الرانج على بداية الشتا

بس ما جاوبتني يأثر على الدفرنسات والقير ولا لا؟؟

ومتأسفين إذا طولنا عليكم

[الشيخ]

والله يا خوي ما اعرف شي عن الجنوط العريضة انها تأثر على القير والدفرنش
انا اعرف ان بعض الجنوط تأثر على دسكات الفرامل لانها تمنع التهويه ( بعض الجنوط فقط والي يكون شكلها مثل الجدر واسمها سنتر )

لكن نصيحة الشايب لا تتحداه احسن لك
لاني تحديته وهو عنده باثفايندر وانا على شيروكي 2001 ( شريته بعد الرانجلر ) وطبعا الشروكي اقوى لكن مهما تحديت انت خسران طعني وتنازل من الحين احسن لانك لو غرزت تطلع من البيت وتهاجر من الديرة احسن لك واذا هو غرز محد بيصدقك ويمكن يقول حظ ولا توفيق
فك نفسك من الاول ولا تدخل مباراة خسرانة

[رانجلر]

اها

طيب احب اوضح شي الشروكي فعلاً اقوى بفارق تقريباً 5 أحصنه بس إذا جيت للوزن والإداء أعتقد الرانجلر يتغلب!
هذا من وجه نظري

اما بالنسبه للشايب

المشكله عليها رهن من طرفه لو اغلبه 20000 ريال <----------- طماع
ههههههههههههههه

على العموم مافي وقت للإنسحاب والمباره ما بقى لها الا شهر ونص يعني 45 يوم

بس انا أخاف ابيع جنوطي وأشتري جنوط عراض في الإخير اكتشف إن عندي دفرنس خربان ولا قير تعبان

او اركب كفرات شاهين وبالإخير أحصل على نفس النتيجه!!!

تكفون يا شباب علموني

[القماري]

يعطيكم العافية ياشباب
اخوي رانجلر أسمح لي بالمشاركة
أولا الرانجلر موتر مسكت وماعليه كلام غير عيبه الشرعي (الوكيل و غلاء قطع الغيار أحيانا) إما قوته فهو مو بصاحي وأسألني عنه .
وبخصوص الجنوط والكفرات وتأثيرهم على الدفرنش ،فأقول أني من قبل جربت وغيرت الجنوط (النجمة) إلى جنوط أعرض مع كفرات تويو العريضة وصادفت مشكلتين .
الاولى الكفر الامامي صار يضرب في الدراع في حال الالتفاف القوي يمين أو يسار (وهذا عيب تصنيع بخصوص الجيب الرانجلر ) يعني ما تقدر تتعدى المقاسات الاصلية
ثانيا: الدفرنش الخلفي دوخني عشر دوخات ولا أعلم هل هو سبب الجنوط أو عيب تصنيع في الجيب الرانجلر
ودفعت مبلغ تعدى الاف وسبعمئة ريال ومافاد معاه (يعني غيرت طقم الواشرات وغيرت الاعمدة وغيرت صوف الدفرنش وما قصر الميكانيكي صار خبير في فك الدفرنش وتسكيره من كثر ما أشتغل فيه ) حتى اني مليت من الرانجلر وبعته غير آسف عليه.
أقول جرب مع الشايب بجنوطه الاصلية ونسم الكفرات إلى 15 وجيب لعلوم الطيبة ( على فكرة منهو الشايب ؟ )

[رانجلر]

بالنسبه للشايب فهو (الوالد)
عيال آخر زمن

س1/ بالنسبه للذراع والطقطقه هاذي كم موديل الي كان معك؟؟
س2/ كم مشيت على الجنوط والكفرات الثانيه؟ (فوق الـ5000 كيلو)ولا أقل؟؟؟


انا اليوم كنت في المعارض حصلت واحد عنابي نفس موديل الي معي 2001 صحارى عنابي مركب كفرات شاهين الرانجلر دفرنساته وقيره نظيف!

275×70×16 طبعاً هاذا المقاس لكفرات الشاهين ماخذه من الرانجلرالي في المعرض وش رايكم فيه حلو؟؟:what: :what:

[الشيخ]

شف يا اخ رانجلر لو تاخذ نصيحة الاخ قماري
وتنزل ظغط الهوا الى 15 صدقني مامن ارض تغرز فيها سيارتك لاني مجربه على رمل البحر واحيانا ادخل بالبحر واطلع وما عندي اي مشكلة وجربت هالطريقة مع الرانجلر والشيروكي

ملاحظة : لما قلت الشيروكي اقوى كنت اقصد اقوى من الباثفايندر لكنه ماهو بعيد عن الرانجلر بس يفرقهم الوزن وحجم السيارة

[الشيخ]

ملاحظة: طريقة تنزيل الهوا الى 15 جبتها بدون الدفع الرباعي وكانت ناجحة جدا
شلون لو جربت الاثنين جميع يعني انت عندك ضمان بالفوز بالتحدي لكن
احرص على السواقة ولا تغلط ولا بتروح عليك
ملاحظة ثانية : يا ترىب يطلع لنا من الجايزة شي ؟

[القماري]

يمسيكم بالخير
أخوي رانجلر الموديل إلي كان معي 97 - 6 سلندر 4.0 لتر بخاخ
تعديت الخمسة الأف كيلومتر بالكفرات العريضة ( تويو) لأني بصراحة كديت السيارة كد وكل يوم عندي فيها مشوار فوق ال 60 كلم غير طلعات الطعوس والرمال صيف وشتاء
وزي ما قلت من قبل الرانجلر جبار ومايخيب الظن بس عيبه (وكيله وقطع غياره) وأعتقد أنه أقوي سيارة بسبب خفة وزنه وقوة محركه ، لكن والظاهر من كثر الجور تعب معاي (المحرك والجير زي الفل ) بس الدفرنش الخلفي جاب لي الصمرقع ومرمر عيشتي وما أدري السبب هو تغيير الجنوط والكفرات أو كثر المشاوير . وبخصوص الكفرات العريضة حتى الميزان ما قدر يشوف لي حل بخصوص الضرب في الدراع .
إحتمال الموديلات الجديدة تغير من ذي الناحية ( الله أعلم)

[الشيخ]

بصراحة يا الربع استغرب لما اسمع ناس تتكلم عن قطع غيار الرانجلر
هو يخرب؟
صحيح انه ما ظل عندي غير سنه وما خرب علي بالمرة مع اني ما كنت احترمه بالمرة
بس قبلها كان عند اخوي 5 سنين ولا اشتكى منه مرة (موديل 95 صحارى )
ما يبدل فيه غير القطع الاستهلاكية وهو راعي طلعات بحر ويجر عليه يخت
ولا جا الشتا قنص عليه ثم طاح بيدي وما قصرت فيه والحياة ماشية
هي مكلة وحده الي مرت علي و هو نظام التدفئة اخترب وصار الماي المتكثف من المكيف ينزل على رجلي بدل
ما ينزل بره السيارة و حليتها بكرتونه
الظاهر العيب ماهو بالجنوط

[رانجلر]

والله بصراحه وكالتهم بهدله ما بعدهاااااااش



بس انا بركب سومو تومو

تنصحون وين باقي الشباب!!!