ارجو الدخول

[الزم حدودك]

السلام عليكم ورحمة الله وبركاته

كيف حالكم ؟

شباب ظنكم فيه مواتر ب 13 الف.. شبه نضيفه
يعني موديلات قديمه من 1995 الى 2000


[ وش تنصحوني بانواع المواتر ]

ترا عمري 15 يعني ما اعرف شي فالمواتر..الا القليل

وابووي حاد علي ب 13 الف

ان شاء الله تردون

[منصور الشمري]

ابوك ياخي موغاشك

[SAS2]

حياك يالغالي بس بهالقيمه ما تلاقي نظيف ومالك الا شركات تاجير السيارت

كل فتره يغيرون سياراتهم بس مدري عن نظافتها واغلبها هيونداي وكورولا

والاخوان يفيدونك ان شاء الله وبالتوفيق يا غالي

[الزم حدودك]

اني داري لكن المقصد وش هي انواع المواتر
وش المواتر اللي تنصحوني بها

[SAS2]

طيب ياغالي هذا كلام خويي عنده تاجير سيارات يقول اسوي صيانه للكورولا ب 4000


ونفس الصيانه للهيونداي ب 1000 ريال ويمكن اقل يعني انصحك بالهيونداي

[عاشق السيل]

وعليكم السلام ورحمة الله وبركاته ،،

الله يخلي لك الوالد ويمتعه بالصحة والعافية ،، أول شي لازم نعرف وش حاجتك بالسيارة ؟؟

إذا كنت تبي تشيل الأهل لازم سيارة وسيعة مثل الفكتوريا وإذا كنت تبيها شخصية عادي أي سيارة صغيرة وإذا كنت ناوي تطلع للبر لابد من الدفع الرباعي ،،

وإن شاء الله بتلقى اللي يرضيك بهالمبلغ بس أهم شي وأنا أخوك عليك بالركادة ولا تنجر ورى حركات الشباب اللي تجيب لك الشبهه ....

[شمالات نجد]

الله يطول بعمر أبوك ويجعلك تبر فيه

ما أزيد على أخواني.. وحاولوا تزودون المبلغ حبتين إلى 20 ألف وعندك عدة اختيارات بإذن الله مواتر بتكد معك وتطربك حتى الله ييسرها.. لكن انت اللي تختار

1- عندك أم عزيز ددسن غمارتين تطرح لك في النظيف موديلات 89-92

2- وعندك الفكتوريا ستاندر كذلك تطرح لك في النظيف موديلات 98- 2001

3- وان كنت ملزوم بموديل حول الجديد (2006 وحولها) عليك بالاكسنت او الانترا (لكن ياندر النظيفات)

4- وان كانك ملزوم بموترن كبير ورفيع عليك باليوكن لكن مدري العشرين وش تجيب في هالحاله من موديل

5- الحين السيارات طايره وانصحك تتريث الين يجينا القيض

6- الموتر وسيلة نقل وان شاء الله انك عاقل لكن بقولك ان التفحيط ما وراه الا غضب والدينك ودعاء الناس والخساير.

ولا تنسى الاستخاره

سلام

[الزم حدودك]

والله عندنا يوكن وملبق وماله حاجه مخلينه للسفر موديل 2009 تونا مشترينه لكن مابي آخذه اخاف اصدم به لانه كبير
وابي لي موتر اخذ راحتي فيه
ولاهنتو