المشاركة الأصلية كتبت بواسطة التيس المفترس
السلام عليكم ورحمة الله وبركاته
الله يجزاك خير ويعفو عنك وعن والديك وذريتك اجمعين عمل متقن وجميل ووافي عن هالجهاز
وهذا العمل متعب جدا بارك الله فيك وفي عملك وجعل ذلك في موازين اعمالك
انا لي فترة افكر اشتري واحد من هالنوفي بس متردد غرضي منه للسفر خارج السعودية وش تنصحني باي جهاز يناسبني علما ان حاجتي له كما يلي
1- يقبل تحميل اي خرائط مثل شرق اسيا وافريقيا واوربا وغيرها ما افضل ذاكرة خارجية ابيه منه وفيه اذا امكن واذا ذاكرة خارجية وش تتوقع الانسب لي
اخوي مافيه جهاز يتحمل جميع الخرائط
لان احجام الخريطة الواحدة يكون كبير وذاكرة الجهاز الداخلية محدودة
لذلك لابد من تركيب ذاكرة CD خارجية ولاتشيل هم تشتغل وماعليها الا العافية
نصيحتي خل الخريطة الاصلية هي الميدل ايست ( الشرق الاوسط ) وباقي الخرائط ركبهم على الميموري الخارجي
2- يكون سهل الحمل في جيب البنطلون مثلك عارف اذا سافرت انا اكشخ بجنز والا اكشخ بالترنق حق حصة الرياضة
اجهزة النوفي فئة ال 200 صغيرة الحجم 3.5 انش فقط
اما النوفي فئة ال 700 اكبر قليلاً 5.7 انش
انا استخدم 750 والبس جنز وترنق حقة حصة الرياضة على قولتك
وحمله سهل مثل الجوال
3- ميزة البلوتوث ما ادري وش فايدتها بالضبط لو تقدر توضح لي هل هي مهمة في مثل هالاجهزة
البلوتوث ميزته انك تشبك على سماعات السيارة على محطة الراديو
ويصير تكلم سبيكر بعد ماتوصل الجوال بالقارمن بالبلوتوث طبعاً
اتمنى انك فهمتها .. ماادري احس ان الشرح لك عليه
4- يتحمل بعض الصدمات الطارئة لاقدر الله مثل يطيح مني
يتحمل وانا اخوك
عاد مهوب تشدخ في مريره وتقول له ليش ماتحملت
ويستحسن انك تأمن عليه في التعاونية ضد الصدمات
عموماً ممكن تشتري له حافظة جلدية تحميه من الصدمات
5- دقيق جدا مهوب يوهقني بيني وبينك متعود على الجهاز القارمنc 276 جلف بس صبور ودقيق جدا
مااقدر اقول لك انه دقيق 100%
لكن هالموضوع يعتمد على ادخال الاحداثية بدقة
وبرضو ادخال اسم الموقع بدقة ( الاسبيلنغ يعني )
لكن اقدر اقول لك دقيق بنسبة 95 % ان شاء الله
وانا ذكرت انك مع استخدام القارمن ماراح تستغني عن السؤال احياناً في الحالات الصعبة
يعني هو بيوصلك ان شاء الله لكن بعض المواقع تكون مش موجودة في الخريطة
لذلك لازم تحدث الخريطة بين فترة وأخرى
6- شفت مره في احد المواقع ما اذكر وين جهاز نوفي يبين المباني ثلاثي الابعاد كم اسعارة
بالنسبة للاسعار والله ياخوي من زمان مارحت اشوفها
لكني برسل لك رقم على الخاص لواحد تعاملت معاه من قبل
يبيعها بأسعار ممتازة جداً افضل من الوكيل
وعنده الجهاز الي يظهر الخريطة ثلاثية الابعاد ايضاً
لكن للمعلومية .. الخدمة غير مفعلى في السعودية لذلك ممكن تستفيد منها في دول أخرى تكون الخدمة مفعلة فيها
7- شكلة يكون وش ملحه يعني انيق
والله ياخوي بديت اشك انك تبي تعرس وضيعت وجيت تقرير القارمن
وش رايك نروح للسؤال الي بعده
8- ياكثر اسئلتي مليت وانا اسال
الله يعينك اذا انا مليت من الاسئلة وش بتقول انت
اي والله كثيرة تعبت ..
حاضرين ياغالي وان شاء الله قدرت افيدك
تقبل كل احتراماتي