أفضل طريقه لتجنب التغاريز؟؟!!

[ياوجودي999]

السلام عليكم ياإخوان

انا سيارتي لاندكروزر جي اكس آر 2005 طبعاً 6 سلندر قير اوتوماتيك

أبي أعرف وش افضل طريقة لتجنب التغاريز اذا طبيت بأرض نفود وغراز

وش وضع القير الأوتوماتيك تحطه على أي نمرة؟

ودعسة البنزين وش طريقتها تزر عليها والا تقطع؟

والدبل متى تحتاج الثقيل والخفيف؟

أرجو الرد من أصحاب التجربه والخبره للفائده.. أغلبنا يملك الاندكروزر أو سيارات الدفع الرباعي ولايعرف يتعامل بمناطق التغاريز مع امكانيات سيارته...

[كبسولة2]

حياك الله اخي الكريم

اول شئ سلمك الله تنسيم الكفرات حتى يرتاح الموتر في المشي

حتى أنك تستطيع المشي بدون دبل

عدم الوقوف في أماكن منحنية مثل أمامك طلعة وخلفك طلعة

عدم لف الطارة يمين أو يسار أثناء الخروج من تغريزة وضعها مستقيمة

بأختصار الكلام ماينفع واناخوك لازم تعيش الوضع مباشرة حتى تكتسب خبرة

[ياوجودي999]

ألف شكر اخوي كبسوله...ومنكم نستفيد.

[جزر العرب]

يا اخوي ياوجودي999 ان شاء الله يفيدونك اهل الخبره التماتيك

ولكن انا ابي اقول اذا ان الارض طعوس و تغاريز عليك بالكفرات نزل من مستوى الهواء وعلى حسب

وحط القير على D2 او 3 وتوكل على الله وهم شي اهتم انك ما تضغط على المكينه

مع العلم استخدامي قير عادي واذا فيه ملاحظ على قولي فالواحد يخطي و يصيب

وان شاءالله يوضحون اهل التماتيك ونستفيد من خبراتهم

وشكرا

[ياوجودي999]

مشكور اخوي جزر العرب... هو البلا ان القير اوتوماتيك والا العادي يستجيب لك متى مابغيته. لكن الاتوتوماتيك انا اول مره استخدمه.

[المميـز]

:

الدبل الخفيف للتمشي بالنفود وللغراز الخفيف

والدبل الثقيل للغراز القوي ومايصلح تمشي عليه

:

[ابو العز بلس]

وعليكم السلام ورحمة الله وبركاته

اهم شيء تنم الكفرات مو اذا غرزت نسمت نسم اول شيء
بالنسبة للقير التوماتيك صراحة انا احوله على وضعية ال s عادي يعني وبين نمرة 2 و3
وتكون الدعسة خفيفة نوعا ما

[SAS2]

والله مهنا خبرة لاكن اهم شي لا تستعمل الدبل الخفيف ابد اذا الدفع الرباعي
شغال على طول لانه بتطلع لك ريحة التروس وخصوصا اذا ابطيت وانت مشغلة

[ليل الدجا]

أفضل طريقه لتجنب التغاريز
لاتطلع البر

[السناعيس .f16]

أفضل طريقه لتجنب التغاريز
لاتطلع البر

صح لسانك
محد يطلع للبر الى الخبير وسواق ولابد من الغراز اما تظرب بريك او رباظه او تعلق الموتر في سبف وغيرو
100%100
هاذاء غير اذا تعطلت وانت في عرق
يمنك طلعه ويسارك طلعه يعني مثل الفنجال وش راح تسوي يابطل ولاتنساء مافي شبكه والكنود مثلن تعطل وانت الحالك ومعك نص قاروره ماء حار

[sgl2002]

اذا دقر الموتر لاتدعس له بالدبل الخفيف والا بينعدم عليك كلتشات القير

اذا طبيت بتغريز فجأة عط الموتر الخفيف ورده نمره قوية وادعس لاتوقف

اذا بتوقف وقف بنزول او ارض قاسية

اذا نشبت بتغريز حاول تطلع باقل سرعه يعني لاتدوس بقوة خله على اخف دوران

لف الطارة يمين وشمال وانت تحاول الطلوع

القصوص اذا جيت تتجاوزها فهي انواع:
نوع مثل الخيمة هذا تعاله مع الجنب وخل الموتر يركب على القص ركوب الحصان ثم اكسره جهة نزولك وانت على نفس الدعسه وغير مسرع

قصوص مثل الجدران انزلها نزول عايدي



مافيه شي مثل التجربة حاول تجرب بنفسك لين ماتخطي وتتعلم من اخطائك

لكن لاتاخذك الثقة الزايدة بنفسك لكي لا تطب بموقف لايحمد عقباه

انا تفننت واجد بالنفود لدرجة خيالية وانتهت بعد خبرة سنين بقلبه على الشاص����

[Salamah.y]

بالنفود أهم شي تنسيم الكفرات مهما كان الموتر نشيط , استخدم القير بين 1 و 2
و اذا تعدلت الارض حطه على الدي و انت ضاغط زر الـ O/D

و لا ترحم الموتر اذا شفت ان الأرض صعبه , حط رجلك و لا تستسلم
لكن اذا وقف الموتر , و غرز , هنا عليك بالركاده و المسايس ~

,

و الممارسه هي اللي تعلّم
مووفق أخوي @~

[النووي 2009]

نسم الكفر 20 او 25 وبإذن الله ماتحتاج الدبل
واذا غرزت حط الخفيف وان مارضا عليك بالثقيل

[ياوجودي999]

مشكورين كلن بإسمه..

اخوي2002 sgl الله يعوضك بشاص أحسن منه.. وباللي تمنى.

[السناعيس .f16]

نسم الكفر 20 او 25 وبإذن الله ماتحتاج الدبل
واذا غرزت حط الخفيف وان مارضا عليك بالثقيل

تقولي 20او25
والله ماراح حتاء يمشي بنفود ون غرز ماراح يطلع افضل مقاس 15عليناء قال وشو قال25