هل تستخدم جهازك الاسلكي بتصريح ام لا !

[الكونترولCONTROL]

انا أفكر اطلع تصريح لو يحطونه هدية و يوزعونه عند مخرج 10 او 11

[راعي العوجاء]

بالنسبة للي يقول اذا صرحت الجهاز يقفلونه مو صحيح ابداً انا مصرح جهازي ومفتوح والي مو مصدق يحدد موعد اراسله بالجهاز

[جفيل]

اخوي راعي العوجاء حفظك الله

مشكور على ردك ومعلومتك الغاليه

[قرناس الشمال]

خل معك جهاز خربان وان مسكوك
وعند العسكري الا يبي ياخذة عطه الخربان
ولاتدرجاة ولاتذل نفسك



وهذي الطريقة احسن مادين
من استخراج رخصة
ملاحظة= سعر الجهاز الخربان=50 ريال ان كثرة

[الوسم]

الله يجزا بالخير فاعله
وعموما الدوله ـ الله يحفظنا وياها ـ ماقصرت في أشياء واجد يمكن أكثركم ما يعرفها
وأكيد التصريح له فوايد أقلها تحديد مسئولية أي مشكله تصير في ها المجال
لكن نرجوا منهم تخفيف التكلفه علشان البعض يمكن مايقدر عليها

[UUNUU]

خل معك جهاز خربان وان مسكوك
وعند العسكري الا يبي ياخذة عطه الخربان
ولاتدرجاة ولاتذل نفسك



وهذي الطريقة احسن مادين
من استخراج رخصة
ملاحظة= سعر الجهاز الخربان=50 ريال ان كثرة

قطعت بطني من الضحك ، فعلا فكره رائعه

[ابو محالة]

اخى الكريم uunuu
انا اول مرة اسمع بترخيص الاجهزة
ممكن معلومات كاملة
وموقعهم واسعارهم
تحياتى

[بو خليفه]

لدي سؤال يا راعي العوجاء أنا دائماً اسافر إلى الإمارات و لاحظ أكثر الإماراتيين و القطريين يعتمدون على اللاسلكي في السفر و هل التصريح عندك الفئة الأولى أو الثانية و هل من الممكن السفر إلى خارج المملكة به

[2500HD]

بالنسبة للتصريح
لا توجد لدي اي نية في استخراج تصريح واللي في امه خير يجي ياخذ الجهاز مني ,,, قوة
لكن اعتقد ان مصادرة الجهاز امر استفزازي جدا جدا جدا جدا
لكن افضل شئ اذا طلب منك الجهاز عشان يصادره وانت متاكد انه بياخذ خلاص
انطل الجهاز على الزفلت باقوى ما عندك ثم اوطاه بالسيارة وافحط عليه بعد وجمعه في كيسه وعطه العسكري وقل له الله يطعمك من خيره ويكفيك شره

الاخ العزيز
راعي العوجاء
انا رجال اعرف اراسل واعرف اغير الموجه واخفف الهواء
اقدر اطلع رخصة على طول والا لازم اذاكر وهل الاسئلة تتكرر ؟
الله يجزك خير انت وكاتب الموضوع

[حرباش]

ردودكم كلها اكشن


انا من سكان الجبيل ((الشرقيه)) واكره طيلت المراجعات ولا عندي وقت اذا كانت الإجراءات كلها في الصباح .

السؤال يقول :/ وين اصرح بالشرقيه ؟؟؟؟ وكم يستغرق مني ذلك من اول مادخل الين استلم التصريح ؟؟؟؟؟



تحياتي لكم
حرباش

[بو خليفه]

يا حرباش لا يوجد إلا فقط في الرياض الاختبار و لكني سأذهب اليوم إلى هيئة الاتصالات لأخذ النموذج و القواعد و اللائحة والفرق بين الفئة الأولى و الثانية لأن الفئة الأولى تهمني لأني كثير السفر إلى الإمارات

[محب الشمال]

صراحه الي وضع هذا النظام غبي
قولوا ليش؟ قلتوا ليش طيب

يعني بالعقل اذا كان القصد ناحية امنيه فا ما اعتقد لها فايده لان الارهابيين عندهم بدل الجهاز عشره وغير كذا فيه طرق اتصال كثيره ومتنوعة مثل الانترنت والجوال وغيرها من الطرق
يعني بس تعقيد وضرايب على الكشاته صراحه هذا اعتبره استنزاف وسرقة بالقوه عيني عينك
بالنسبة للاختبار ماله داعي طيب انا اقول لكم ليش انا انسان ما اعرف استخدم الجهاز الا في الاستقبال والارسال وبعض المعلومات البسطية كيف اشغل واطفية واغير الالوان وارفع الصوت واوطية يعني حاجات خفيفه وهي الزبده في الجهاز
واذا كان ولا بد يحطون عند مثلاً اتصالات المرسلات وغيرها فرع لهيئة الاتصالات من اجل تسهيل عميلة استخراج التصريح الي ما امه داعي ولا نبي كل يوم الواحد مستأذن من عمله من اجل تصريح
بعدين رسومهم غالية ومبالغ فيها انا اعتبرها سرقة بالقوه والاكراه وليس رسوم اشتراك
اول مره اعرف انه رسوم الاشتراك اكثر من قيمة الجهاز .. عجب عجاب
الناس طلعت القمر وحنا للحين ندور تصريح للكنود .... ,,ـ,,.
بالنسبة للرجال الامن البواسل حفظهم الله طيبين معنا وكلهم او اكثرهم حقين بر وكشاته ويقدرونا ويحترمونا وعارفين اني ما طلعت الجهاز الا عشان البر مع العلم انه فيه بعضهم للاسف ما يفهمون ولا عندهم تقدير لبعض الامور ولا يعرفون يتصرفون وخساره انه رجل امن او حاط نجمة على كتفه مثل ما حصل للاخ الكشات غالي مع المقدم في طريق القصيم (مقدم غبي ) متخلف خسارة النجوم الي علية الي ما يعرف يتصرف مع الناس وهذا هو ضابط

يعني انا اشوف لو يكون التصريح لمده خمس او عشر سنوات بـ 50 ريال فقط هذا اذا كان ولا بد من التصريح
مع اني ارا انه لا يوجد اي فايده تذكر او حكمة من هذا التصريح

والله اعلم

[a.الخثلان]

الظاهر بتفتحون على أنفسكم باب

الأخ Uunuu


حسب معلوماتي البسيطة أن التصريح هو لهواة مراسلة الراديو حسب هذي التسمية والذين يراسلون على أبعاد تصل من 2000 إلى 3000 كيلو وربما اكثر

وهذه الأجهزة تكون كبيرة وتكلفتها غالية حسب ما سمعت ويتطلب للهوائي الخاص بها قاعدة لأن حجمة كبير وبنائا عليه يتطلب اصدار تصريح

واعتقد انه ما عندهم اشكال يصرحون هالأجهزة الصغيرة ما دام الواحد بيروح يقول صرحولي ولا يقدرون يحجرون للواحد ويقولون ما تستلم جهازك إلا بالتصريح

الله لا يكتبه

[راعي العوجاء]

بالنسبة لمسئلة التصريح وهل له فائدة

اخواني نضام التصاريح هذا نظام عالمي مطبق في جميع دول العالم دون استثناْ وهو اجباري ولم توافق عليه المملكة الا بعد شكاوي كثيرة وضغط من منظمات الاتصالات الدولية حيث ان هواية الاتصالات يجب ان تكون منظمه وللاسف يوجد نوع اخر من الاجهزة اللاسلكية المسموح به في جميع دول العالم لاكن للاسف لم ينتشر عندنا في السعودية مع العلم انه يمكن استخدامه داخل وخارج المملكة بدون تصريح ويوجد لدى مشاعل الخليج وبعض الموزعين ومعه ورقة تثبت انه يمكن استخدامه بدون تصريح ولا رسوم بس اشتر الجهاز وركب وامش ولا بعد اذا ركبت له انت محترم يجيب احياناً روسيا واروبا عيبه انه الي ينباع في المملكة قنواته قليلة لاكن برى فيه قنوات اكثر وقوة الارسال 25 واط فقط لاكن مثلكم عارف اكثر ما كثر الله المقويات ياليت لو تنتشر هذه الاجهزة عندنا ونفتك من الشرطة وقيمة التصاريح لاكن للاسف ما في احد تشجع واشترى ياليت لو يتفقون الشباب على موعد لشرائها واستخدامه وان شاء الله تنتشر بين الكشاته علشان نستفيد منها انا شخصياً عندي الجهاز ومركبه في سيارات اخوياي وممتاز ويودي الغرض لاكن للاسف اضطر الي تركيب الايكوم علشان اسولف مع باقي الكشاته

هذا موضوع يتكلم عن هذه الاجهزة
http://mekshat.com/vb/showthread.php?t=17138

بالنسبة للي يسئل عن التصريح الاختبار سهل ومو لازم تجي الرياض الى يوم الاختبار تقدر تسجل اسمك للاختبار بالتلفون واذا نجحت يرسلون لك الرخصة بالبريد

[صاروخ]

السلام عليكم وأسعد الله مساكم وصباحكم بكل خير.
إسمحوا لي أشارككم في موضوع ( الماخوذ ) اللاسلكي .
والله ياجماعة الخير , اللي يبي يوزيه إلين ياصل الخلاء ’ الظاهر ما عليه إلا العافيه.
وأما اللي يبي ينصب به في المدن ويركب أنتله طويل يضرب في النجوم ويمر مراكز التفتيش وما معه ترخيص , فهذا على خطر , لأنه يحق للتفتيش أن يصادر جهازك ( حسب النظام ) الرجاجيل حادينا ندفع القريشات وإذا فكرت في الموضوع وجدت أنهم لويقضبونك وأنت رازّه عينك عينك ( تستاهل أنهم يمعطونه منك ) لكن إن كان أني أبدفع 1300 ريال مابين تسجيل وضرايب وغيرها + سعر الجهاز = طلعنا مديونين , إلاّ أبشتريه وأبوزيه والأنتل أبسدحه كنه بندق , أنا فعلت السبب , إن كان فيه تفتيش وعثروا عليه , أنا وياهم إلين أفكه وإلا ياخذونه بسلامتهم , لكن لازم آخذ ورقه عليهم للمراجعه , محتج عليهم بأني أبطلع رخصه وفي النظام يحق لي إسترجاعه إن ما كلوه
لكن الوخذه ما تصير دايم , 700 ريال خسارة الجهاز ولا 1300 أبدفعها كل سنه . وإلا وش رايكم ؟

ناقشوا الموضوع يارجال وخلونا نطلع براي زين ينفع الجميع ( من شاور الرجال شاركها عقولها ) وسلامتكم .

هذا الكلام الصحيح