سيارة تندمت انك بعتها والسيارة اللي تمنيت تملكها - شاركني برأيك

[برق الشرقية]

السلام عليكم
الكل منا أقتنى وجرب مختلف السيارات وعاش تجارب منها الحالي ومنها المر بمختلف الأنواع والموديلات ، لكن ماهي أفضل تجربه لك مع سيارة من السيارات العزيزة عليك مع ذكر اسمها ومدى تفوقها في رأيك على سيارة من نوع آخر وندمت بقرار إبعداها وبيعها ، وسيارة أشتريتها وندمت بذلك لأسباب نود ذكرها ، وببدأ بنفسي :

ونيت z71 موديل 99 غمارة ونص ، وربي أم الندم اني بعته شايل ربعي وعفشي لكن اقول الله يعوضنا بموتر احسن منه ولي معه ذكريااات لاتنسى عز الله انه ذيب لكن نصيب
السيارة اللي ندمت اني شريتها وهي تجي بعده على طول اللي هو نيسان موديل 92 خذيته وطلع مهربد وظن صاحبه كان راعي مقانيص وبهذل عيشتي وستنزف جيبي مضبوط ،،،
اما السيارة التي تمنيت املكها فهي جمس 2006 غمارتين وهذي تجاربي الشخصية ونتظر تجربكم

[بطين الرخام]

السيارة التى ندمت انى بعتها........( كريسيدا 94 )الله يهنى صاحبها لايزال يستعملها.
بصراحة ماندمت على سيارة شريتها....لانى مااستعجل بشى حتى لو كان بسيط ...مادام اشاور غيرى.......تحياتى

[تيرنيدو]

السيارة اللي بعتها وندمت عليها اششششششششششد الندم وبقوة واللي الان هي كابريس 91 صابونه على يدي وكاله ومن الدلاخه والغبااااااااااء مدري وش جاني وبعتها
هذي للحين مع اللي شاريها مني زي الحلااااوة وياااا ما اغريته يردها لي ورفض
وشيروكي 93 سعودي ورررررررررررررررررررررده قلت كسبان 2000 ريال حلو ما دريت انه يباع باكثر

اللي تندمت اني شريته هي ماليبو لعنتها ولعنت من صنعها سويت فيها كل شيء وحرارتها ضوو نار جيت ابيع قلت يمكن عين قبل ادخل المعارض وتشب نار
ومن مكانها بعتها حديد ههههه ما ادري الحي باي العماير صارت

[دحوم 911]

كامري الـ 97 و الله يا كان فيها عزم و صبر ماهوب صاحي الله يهنى صاحبها و معوضين

خير إن شاء الله ، و السيارة الي ندمت إني شريتها هي ألتيما 2005 و الله ياهي تعبتني

و كلفتني واجد واجد لو أقولكم أكثر من 30 الف ما أبالغ !!

اما السيارة الي تمنيت أقتنيها الشاص لبى و الله طلته

. .

[naifwww]

السلام عليكم

السياره اللي ندمت اني شريتها هي لومينا 2000 من شريتها ما تكمل شهر الا خربانه

و مسكت فيها خط لازم بعد ما ارجع اصوات وحراره


واللي ندمت على بيعه

سوبر بان 97 وقتها ما كان يستخدم الا نادرا

وبعته والله يوفق اللي شراه

[ابوو تركي]

اتمنى املك جيب VXR 2007

[برق الشرقية]

يعني أفهم من ردودك وردي أولا" ( أحم أحمم ) أن فعلا قديمك نديمك ، ون موديلات مادون 2000م لهلحين أكثر فاعليه وتحمل ؟ قبل نتسرع بالحكم نحتاج أكثر تجارب وردود وشاااااااااركونا .

[أبو مزنه]

والله اني بكيت يوم بعته بهبهاني 79
أذكر لين فتحت الكبوت عشان أغير الزيتأول شي أشوفه المكينه الزرقا
ما أقول الا الله يعوضني ويعوض الجميع

[برق الشرقية]

الله يعوضك بخير وقديمك نديمك ،،، وعجبني في ردك الحقيقة لما قلت الله يهني صاحبها فيه شي من حبك لأخيك ماحبيته لنفسك وشاكر مرورك

[برق الشرقية]

الله يعوضك وأشوى انها راحت شتبي الناس يقولون ( تير نيدو وراكب ماليبوا هههههههههههههههههههه )
شاكر مروك اخوي

[برق الشرقية]

دحوم 911 الكامري معروفه الكل يندم عليها خاصة الموديلات هذي لها دايم سوالف مع اصحابها
ويالله ان ترزقه وتوقفه عند بيته ذاك الشاص ويهنى بطلته وتحياتي لك ياعاشق تويوتا ههههههههههه

[برق الشرقية]

naifwww المشكلة الدعايات قاعده تلعب دور يعني يقول لك ان اللومينا مصممة للخليج ويلمع لها بالجرايد والتلفزيون وربعنا من بكره يقول بشتري لومينا لين عشنا ومازلنا عايشين في اكذوبه الإعلام والدعايات
أما الجموس زي اللي انت بعته 97 من افضل الموديلات والله يعوضك بخير

[برق الشرقية]

ابوو تركي الله يتمم لك امنيتك بس ماقلت لنا وش الموتر اللي ندمت انك بعته

[برق الشرقية]

ابو مزنه البهبهاني عاد ماعليه كلام وتلقاه للحين ماشي وبإذن الله مافيه مشاكل مهب مثل سيارات الحين مخاوية الوكالات والورش صار الواحد فينا يقلل من المشواير ويتعذر بزحمة شوارع وغيره وهي الحقيقة خوف من تلف السيارة مع كثرة الاستخدام حتى راحت بال ماعاد فيه ،،، شاكر مرورك .

[هوايتي مكشات]

باترول ربع 93