سؤال بخصوص فراش النوم

[خليل909]

السلام عليكم ورحمة الله وبركاته

ناوي اخذ فراش نوم ومحتار بين نوعين الاول الدريويش والثاني الفصول الاربعه ومحتار مادري اي واحد فيهم افضل بالنسبه الدريويش عيبه الثقل والحجم الفصول الاربعه يبدو لي خفيف ولاكن ماعلم عن جودته وهل هو دافي في البرد امل من لديه علم يفيدنا عن هالنوعين فقط .

[م.سعيد]

الفصول الاربعة ممتاز..خذه وانت مرتاح

[أبو شيري]

راح تتعب بهذا الموضوع أذا توسعت بالنقاشات

لكن خذ أقرب واحد من اللي ذكرت كلها متقاربه

وكلها ما راح تستخدمها إلا في الشتاء لذلك لاتحط ببالك الفصول الاربعه تستخدمه بالصيف

[خليل909]

بيض الله وجيهكم جميعاً وفعلاً الموضوع متعب شوي لاني بحثت عنها ولقيت الفراشين متقاربه لبعض .. وأنا رايح البيت قبل الظهر معرض القاضي قريب مني ومريت عليهم واخذت الفصول الاربعه لاني بصراحه من اول فضلته على الدريويش

[قليقلان]

اخوي خليل
ابي انصحك وانت بكيفك
انا اول مثلك ادور الدريويش والقاضي ومدري وشوا
الين طلعت للرياض ومريت محلات الخيام بالغرابي عندهم نوع يسمونه ايضا الدريويش
تنزاني ومن داخل فرو تركي على ذاك الوقت سعره الظاهر ١٤٠ وشنطه له ب٣٠ ريال طبعا هم يفصلونه
من واقع تجربه موسمين ممتاز جدا وانسى البرد

[الاطار]

رح الهدف شارع التخصصي في الرياض .....عندهم اكياس نوم متطوره ومريحه جدا في النوم من واقع تجربه

[سعــود]

ارشح الفصول الاربعه من انتاج القاضي للموسم الرابع على التوالي وانا استخدمه في برد اقصى الشمال وبعد استخدام عدة انواع من فرش النوم

[خليل909]

بارك الله فيكم جميعاً والاخوان الي عطو رايهم اقول رايكم المبروك وع العين والراس ولاكن ماني من سكان الرياض ولا عندي روحه قريب لرياض والتفصال عندنا مايصلح ابداً الموسم الماضي اخذت فراش تفصال اول نومه بالبر تجمدت من البرد والحين توكلنا على الله واخذت القاظي الي هو الفصور الاربعه

[مزعل.كوم]

ولاتنسى تاخذ خيمة المبيت تعطيك ذرا وزود دفى

[ناصح]

تفضل هذا الموضوع مفيد لك

http://www.mekshat.com/vb/showthread.php?t=455249

[خالد الخطير]

ولاتنسى تاخذ خيمة المبيت تعطيك ذرا وزود دفى

خيمة المبيت من القاضي اساسيه لعدة اسباب

1/ تصد الهواء وتحركاته والغبار والمطر

2/ تخفف من جو البرد بالشتاء

3/ تحميك بعد الله من الحشرات والدواب من عقارب وافاعي

[خالد الخطير]

كل ماكان الفراش ضخم وكبير ومليان حشوه كان افضل

حنا مو زي الاوروبيين !!

هم يمشون على رجليهم داخل غابات فبالتالي يبحثون عن فراش خفيف للنقل وسهل التسفيط !!

اما حنا عطانا الله السيارات ننقل عليها اغراضنا ونجلس جنب سياراتنا !!

فبالتالي مسألة الثقل السياره الي تحملها ومانحملها على ظهورنا !!

غير انه بالنسبه لي يهمني الراحه بالدرجة الاولى ، لانه اذا مارتحت بنومتك خرب جوك بالطلعه وجسمك يكون تعبان مره !!

لانك بالفرش الخفيفه تحس بالارض تحتك ويتعب ضلوعك ومفاصلك وتقوم كل جسمك اوجاع ورضوض

لذلك اقول وجهة نظري الواحد ياخذ الثقيل والواسع الكبير واذا البرد عادي دخل معك بطانية صغيره

الراحه يارجال هي الاهم ، الحشوه و الوسع اهم شي بالفراش

[خليل909]

اخوي خالد وجهت نظرك محل تقدير ولاكن انا بالنسبه لي اعتبر كبر الفراش وثقله عيب فيه وبالنسبه الدفاء والراحه وسع الفراش لايوجد فرق بين الفراشين وقولتك تقوم متكسر اذا مارتحت من اول الشيبان يتلحف بفروه ويتوسد حصاة ويقوم الصبح حيله حيل حصان اهم شي الفراش يكون دافي ونقله سهل ولا ياخذ عليك مكان كثير وهذا شفته بفراش الفصول الاربعه سهل النقل ولاهو ياخذ مكان كبيرفي السياره

[AL-BDER]

كلام خالد الخطير .. خطير!
اقصد صحيح

[مريقب العيفار]

كل ماكان الفراش ضخم وكبير ومليان حشوه كان افضل

حنا مو زي الاوروبيين !!

هم يمشون على رجليهم داخل غابات فبالتالي يبحثون عن فراش خفيف للنقل وسهل التسفيط !!

اما حنا عطانا الله السيارات ننقل عليها اغراضنا ونجلس جنب سياراتنا !!

فبالتالي مسألة الثقل السياره الي تحملها ومانحملها على ظهورنا !!

غير انه بالنسبه لي يهمني الراحه بالدرجة الاولى ، لانه اذا مارتحت بنومتك خرب جوك بالطلعه وجسمك يكون تعبان مره !!

لانك بالفرش الخفيفه تحس بالارض تحتك ويتعب ضلوعك ومفاصلك وتقوم كل جسمك اوجاع ورضوض

لذلك اقول وجهة نظري الواحد ياخذ الثقيل والواسع الكبير واذا البرد عادي دخل معك بطانية صغيره

الراحه يارجال هي الاهم ، الحشوه و الوسع اهم شي بالفراش

الفراش اذا كان حجمه كبير ياخذ حيز بالسيارة

اكثر الشباب يكشتون على صوالين واذا كان الفراش كبير وكانو حوالي الخمسة تبلش

بالفرش ما تلقى لها مكان