روضة ملهم مالك روحة عقب اليوم ان قاله الله

[مفتون صيد]

السلام عليكم ورحمة الله وبركاتة
صباحكم جميل يا اخوان

امس كتب الله لي روحه الى روضة ملهم

طبعا ماشاء الله كانت بعض اجزائها مربعة بسبب الري اللى موزع عليها والربيه فيها متركز بالقرب من ليات الري فقط

المهم تعتبر ازين ما في نجد الان اقصد الشبه متاح للجميع

المهم مالكم بالطويلة ............

جلست انا والاهل فيها تقريبا من اذان العصر يقال اني ما راح القى احد وقت اختبارات طلاب

مع ذالك زحمة والله ماشاء الله

المهم اللى لفت انتباهي وشد نظري الحماية اللى ليس لهم صلة باسمهم .... المفروض يسمونهم مخربين العشب موطين العشب

المنظر اللى شدني انهم مصروف لهم جيوب ربع طبعا ما لها اي صفة رسمية يعني ما فيها ختم لونها ابيض سياراتهم
يعني بالعربي خوي

ما فيه الا سيارة متهالكه نيسان قديم واقف على جال الطعس يراقب من بعيد والظاهر انهم من الحرس الملكي

المهم يوم جت الساعة 4 وفيها تقريبا ما تشوف الا هالربوع النيسان والظاهر مركبين لها هدرزات يعني انولاع الازعاج ( تقل رايحين يراقون ويطعسون )
ما غير يمترون الروضة من داخل وصايرة الروضة ولا كنها كنبل مربعات من كثر تقطيع هالاخويا لها ولا بعد يحدون العالم اللى يجي حولها بسيارته ... طيب التمس العذر له يمكن ناسي يهوجس ما يعرف الصح وسبب فعلهم هذا كله انهم يحمون الروضة

انا اقول لابد حماية الروضة منهم هم وليس من الكشاته اللى جالسين على جال الروضة

طيب فيه حل افضل ياخي حبس الروضة وخلاص انتهى الموضوع

يعني ولا يزعلون اخونا اللى هناك في الروضة يذكروني اول ما مسكنا السيارة وحنا صغار في البر تحس انهم فرحين بالامر الموكل لهم مع اني اكاد اجزم اني راعي الروضة لو يعلم بهالامر منعهم عن فعلهم هذا

[ابو سليماان]

تسلم يالامييير

[عاشق السيل]

وعليكم السلام ورحمة الله وبركاته ،،

روضة ملهم تقصد فيها روضة الأمير عبدالعزيز بن فهد ؟؟؟

لأن كل اللي تقوله شفته قدام عيني بروضة الأمير عبدالعزيز بن فهد ،، أسأل الله أن يفكها من راعي الباترول الربع الأبيض خاااااصة !!!!

[سيف خنذف]

راعي الباترول الابيض قد مرنا وانا شاب الضو ...والموتر مهوب غريبن عليه ..سلم ..قلت اقلط قال تقلط معك العافيه

لكن الضو لازم تطفيها ...قلت نار تميم ماتطفي ...قال ونعم ..

قام يتلفت ثم قال راعي الحلال الي عنا جنوب وش يصير لك ..قلت له بنيخي وبن عمي لزم

قال السلام عليكم

!!!!

[بر الوالدين]

يالربع مطلوب وصف دقيق للروووووووووووضه

أطلع من الرياض و بعدين وين أتجه --------->

وجدنا هذا الوصف و ياليت وصف أدق من ذلك

طريق الرياض بإتجاهـ >>>>>> القصيم

بعد أول نقطة تفنيش صلبوخ للخارج من الرياض

يأتيك كوبري معبر جمال تأخذ يمين مع المعبر
بعدها مباشرة فيه ردمية ( طريق ترابي ) يتجه للشرق
إلى أن تقترب من نقا كبير قرابة 10 كيلو
( الرمية قد تختفي معالمها قليلاً لكن لا يهم أهم شي اتجهه نحو الطعس الكبير )

بعدها يجيك حرف T ردمية اخرى تأخذ يسار حوالي 8 كيلو

تأتيك بوابة الروضة بجانبها طلحة كبيرة . ( هنا الموقع )

فهل هذا وصف سهل ؟

أن كان فيه وصف أقل مسافه من ( الثمامه مثلاً )

يكون أسهل و أوضح

[بر الوالدين]

.......................................

[ابو محمد 276]

يالربع مطلوب وصف دقيق للروووووووووووضه

أطلع من الرياض و بعدين وين أتجه --------->

وجدنا هذا الوصف و ياليت وصف أدق من ذلك

طريق الرياض بإتجاهـ >>>>>> القصيم

بعد أول نقطة تفنيش صلبوخ للخارج من الرياض

يأتيك كوبري معبر جمال تأخذ يمين مع المعبر
بعدها مباشرة فيه ردمية ( طريق ترابي ) يتجه للشرق
إلى أن تقترب من نقا كبير قرابة 10 كيلو
( الرمية قد تختفي معالمها قليلاً لكن لا يهم أهم شي اتجهه نحو الطعس الكبير )

بعدها يجيك حرف T ردمية اخرى تأخذ يسار حوالي 8 كيلو

تأتيك بوابة الروضة بجانبها طلحة كبيرة . ( هنا الموقع )

فهل هذا وصف سهل ؟

أن كان فيه وصف أقل مسافه من ( الثمامه مثلاً )

يكون أسهل و أوضح

هلا اخوي امسك طريق العاذرية وجهك شمال وامش واتعدا النقا الكبير (الهرم الكبير يسمونة الكشاتة) وما يردك الا بوابتها بالتوفيق

[طير الجو]

السلام عليكم يالربع
بالنسبه للروضه وراعي الباترول الابيض والباترول الاحمر واليوكن الاسود
الله يشغلهم باعمارهم حيث انهم اشغلونا حنا خيمنا فيه من يوم الربوع الى عصر الجمعه ومخيمين بالنفود وقالو شيلو خيمتكم قلنا بامر مين نشيلها قال بأمر عبدالعزيز بن فهد قلنا له عبدالعزيز بن فهد اكيد انه مايرضى انكم تطردون الناس الي فرحين انهم شافو ربيع قال لا يطردك ويصدمك بالسياره صدم قلت ماتخسى الا انت ولا اني طالع لو على ارقبتي وانا مخيم بالنفود الي على جال الروضه وانتم لعبتو بالروضه تقل بزارين قال والله ان تطلع والحين يجيك الحرس الملكي ولا جاني احد الا هو واخوياه كل اشوي يجي واحد مره يحسنون اسلوبهم ومره يهددون وحنا نقول خير انشاء الله الى ما مشينا ونصيحه لاحد يفك خيمته الا لما يجيبون لك الامر ترا ماعندهم امر ولا شي ما ادري وش سالفتهم

[احب الكشتة]

صحيح جيوبهم تحس انها ملك ماهيب تبع جهه حكومية ولاكن كنت فيها الاربعاء الماضي ومحد قالي شي