إحذر من بواجي (دينسو) لسيارات تويوتا

[ساري 111]

السلام عليكم

بإختصار ,,

احذركم من بواجي (دينسو) اللي يبيعها عبداللطيف جميل

والبديل هو بواجي (NGK) وللعلم بواجي (NGK) هي اللي تجي شد بلد من اليابان مع الموتر لكن عبداللطيف جميل مايوفرها

التجربه اللي مريت فيها هي كالتالي

بعد مامشى موتري 150 الف قلت خل اغير البواجي وليتي ماغيرتها لان الموتر كان صافي ومامثله ابد ..

طبعاً يوم فكيته لقيته (NGK) واللي عطون الوكاله (دينسو) رجعت لمهم قلت ابي نفس شد بلد قالوا مافيه غير(دينسو) قلت الشكوى لله نركبه
بعد ماركبيته بـ 10 الاف طاح عزم الموتر شوي يوم وصل 20الف اذا الموتر بنمره ضعيف ومهدي صار يقطع اذا دعست !! واذا دعست فجأة والموتر واقف قطع

مع ملاحظه اني مشيت ببواجي (NGK) اكثر من 150 الف والموتر صافي وعزمه تمام وماعندك بأحسن منه !!!

الشاهد رجعت للوكاله وناقشتهم قالوا هذي البواجي اللي عندنا حدها 15 الف

رحت دورت برااا على (NGK) وماحصلته رجعت للوكاله ونشبت لهم وقلت اطلبوها لي
بالاخير قالي السوداني ابقولك وين تباع بس فكنا
قالي رح لوكاله الحاج علي رضا وكيل ميركوري ومازدا راح تحصله عنده <<كان قلت لي من اول يازول ليش تمرمطنا

المهم اني رحت للحاج واخذتها منه بـحدود 60 ريال
وركبتها ورجع موتري اللي انا خابر والحمدلله

فهذي نصيحه لوجه الله لأصحاب جيوب التويوتا مايقربون بواجي (دينسو)

وكل ماعليك هو خذ رقم البوجي من الكتالوج ورح للحاج علي رضا قله ابي بوجي (NGK)

وهذا رقم بوجي (NGK) بالنسبه لـ جيوب تويوتا 6 سلندر بخاخ راس واحد 2007 وتحت bkr5ekb-11 مع ملاحظه انه لازم يكون البوجي رأسين


وبالنسبه لـ 8 سلندر ماادري كم رقمه بس تلقاه بالكتالوج واذا ماعندك كتالوج قلي بس انا جبيبه لك


أؤكد لازم تأخذ رقم البوجي معك قبل تروح لانك لو رحت بدون الرقم ماراح تستفيد شي لان ارقام البواجي كثير وماايدرون ايهم اللي يركب على موترك

والسلام عليكم

ساري 111

[rigidman]

وعليكم السلام ورحمة الله وبركاته

زين ما سويت الان جي كي ممتازة

على حد علمي ان بواجي دنسو صينية وليست يابانية مثل ما يعتقد بعض الاخوة ولها منتجات اخرى مثل المكانس الكهربائية وغيرها

اطيب تحية

[ابوصالح77]

بارك الله فيك أخوي ساري 111
معلومة جديدة
وفعلاً البواجي ما يطولن معي
وش صناعة بواجي (NGK)
تقبل مروري

[ساري 111]

دنسو صينية وليست يابانية

حياك الله اخوي
دنسو شركه معروف انه يابانيه ومتخصصه بالقطع الكهربائيه لكن البواحي اللي تجينا شكله مضروبه او مغشوشه او انه ماتجي نفس الرقم ..

وش صناعة بواجي (NGK)

وبارك فيك اخوي اابو صالح
الـ (NGK)صناعه يابانيه

[alimuhammed]

هذا البراد و ما يعمل

يظهر عيوب القطع

تجربة رائعة ومعلومات مفيدة بارك الله فيك

على فكرة تغير الرقم يسبب مثل هذه المشكلة حتى لو البواجي نوعيتها ممتازة
يعني لازم تأخذ بواجي متوافقة مع الكويل و الاسلاك

[احمد الشمال]

الله يجزاك ألف خير على المعلومه.

لكن فقط لجيوب التايوتا؟

[ساري 111]

على فكرة تغير الرقم يسبب مثل هذه المشكلة حتى لو البواجي نوعيتها ممتازة
يعني لازم تأخذ بواجي متوافقة مع الكويل و الاسلاك

نعم صحيح
حياك الله و يعطيك العافيه اخوي

الله يجزاك ألف خير على المعلومه.

لكن فقط لجيوب التايوتا؟

وإياااك اخي العزيز
بالنسبه لي صارت التجربه مع جيب تويوتا السيارات الاخرى تمنيت عندي معلومه عشان افيدك فيها
لكن دائماً وابداً احرص يكون الموتر مثل شد بلد اللي تفك منه ركب مثله بالضبط

[الصارم 444]

الله يجزاك خير ويكثر من امثالك لكشف غش المتلاعبين بالمواطنين

[sameer_1798]

بارك الله فيك وانا اقول ويش فيها بواجيهم صارت ماتطول معي
طيب ياخوي سعر 60 ريال للواحد ولا 6 بواجي

[راعي الفيوجن]

الله يجزاك خير وانا هالايام مغير بواجي موتري وصاير ينفض وحالته حاله وفعلا كان فيه فرق في البواجي
لاكن المشكله وشلون اجيب رقم البواجي لاني جدعتهن
ودورت في الكتالوج ومالقيت شي
وش السوات موتري شاص 2008 بريمي

[مواسي الطعوس]

التويوتا ال 4000 الفورتنر والاف جي : تجي جهه نجك والجهه الثانيه دنسو.ولو غيرت عنهن مايصفي الموتر

[مواسي الطعوس]

التويوتا ال 4000 الفورتنر والاف جي : تجي جهه نجك والجهه الثانيه دنسو.ولو غيرت عنهن مايصفي الموتر

ليش ثلاثه من نوع ....وثلاثه من نوع اخر.

[صقر أمه 506]

^ ^ ^
مافهمت ..؟؟
قصدك لو اغير النوعيه الموجوده في الموتر شد بلد .. مايضبط ؟؟

[جي اكس ار2000]

الله يجزاك خير الجزاء ويوفقك لكل خير تريده ويجعلك تعيش عيش السعداء ويحفظك من كل مكروه والمسلمين والجميع يقولون امين

[لن أمل من العطاء]

يا شباب
في كل كاتلوج سيارة

ايا كانت صناعتها ياباني او كوري او امريكي

لازم تجد في كاتلوجها في قسم البواجي 3 انواع من البواجي من شركات مختلفه

يعني اليوكون القى في كتالوجه ثلاث شركات ايه سي ديلكو وان جي كيه ويمكن موتور كرافت او دينسو

وكذا الحال في كل السيارات