مشكله في الناقه الحل يالنشاما

[السومر]

السلام عليكم

شريت ناقه من سودانيه بالحراج متوثمين في ناقه خلفه كلها قردان واليكم المشكله مع الصوره

الناقه كانت فيها مشكله اللي هي القردان ولقيت في ديسها الجروح هذي

وهي خلفه ما يمدي الجرح يطيب مع العلم مكان الحلب على جنب الجرح

لكن في الصوره وكان مقدمة الديد مقطوع

وابي الحل لا هنتم واليكم الصوره

[مصيول]

لاحول ولاقوة الابالله ياخي مكان الجرح صعب يطيب دام ولدها يرضعها
لكن افطمه وغط الجرح عن الذبان
وجرب البخاخ الازرق ينشف الجرح
وجرب المر دق وذرة على الجرح
الله يشافيها أن شاء الله ويطرح لك فيها البركة ..

[نقوة الغوش]

وعليكم السلام
الناقة باين عليه انه مجمعة حليب الله يستر عليها
هذه الحاله اكثر الاحيان تصير :
احلبه اذا درّة الناقة تفادي للنزر وتراء الناقة اللي مثل ناقة ماشاء الله يخرب ديده اذا مادومت على الحلب.
آما بالنسبه للقردان رش جرة وانا ما انصحك الحين اصبر لين يطيب الجرح.

آتمنى اني افدتك ولو بالشي القليل

[السومر]

الله يجزاكم خير

لكن اذا حلبتها كأن ولدها راضعها بينزل دم من الجرح وانا ودي اني

افطم ولدها واتركها حتى تطيب

لكن هل يسكر الديد بسبب الجرح لانه فتحت الديد قريبه من الجرح صايره على الطرف

[راع الريمة]

اللللللله يعينك...يخوي مشاكل الديد ماتجي غير بالناقة اللي حليبها كثير....أنا حلفت ماعاد أشري ناقة حليبها واجد...لغبت عنها تورمت ولتركتها ضرت ولدها..

لكن الله يباركلك فبها ومثل ماقالوا الاخوان..اعزل ولدها وإذنه صغير لازم تحلبله من ناقة ثانية...ولا تنسى البخاخ الازرق وان شاء الله انها تطيب...ومرلك على بيطري يمكن عنده علاج أحسن

قدامها العافيه

[ساحووق]

مرحبا اخووووي

مثل ماقالو الاخواان

عليك بالبخاخ الازرق ورش على ديدها مائ بااااارد

وانتبه وووواحذر لاتقربهاااااااااا الجرررررررررررره ااااابدااااااااا مع الجررررررح

[نقوة الغوش]

الغالي لاتفطم ولدها ماهو بلازم اهم شي لايرضعه مع الديد المجروح
والديد ماراح يسكر بسبب الجرح
راح يسكر اذا تأخرة عن الحلب بحكم انه كثيرة حليب
آحلب الديد المجروح على الخفيف لجل ماينزر ويخرب
::
عسى الله يشفي ناقتك ويطرح فيها البركة

[SS1]

اغسل الديس بالجرة والمويا البارد قبل ياتي الدود

وطقها بالشماله كي لا يرضعها الحاش ابد واذا تقدر تحلبها لا تترد عشان مايحفلها الحليب

[السومر]

جزاكم الله خير

ومنكم نستفيد يا نشاما

[مخاوي الطعس]

مع كلام اخوي الشمري....؟

[منصور الاسعدي]

اخوي مثل ماقالو الاخوان البخاخ الازرق والفازلين تراه ممتاز زحازل ان تنظفها على طول ونتبه من الجره لاتجي المكان الي فيه الجرح لانها تسبب تسمم

[أبوجهاد التبوكي]

الله يعينك...

[رحال 6]

الغالي لاتفطم ولدها ماهو بلازم اهم شي لايرضعه مع الديد المجروح

والديد ماراح يسكر بسبب الجرح
راح يسكر اذا تأخرة عن الحلب بحكم انه كثيرة حليب
آحلب الديد المجروح على الخفيف لجل ماينزر ويخرب
::

عسى الله يشفي ناقتك ويطرح فيها البركة

أنا مع كلام أخوي الشمري

لكن أزيد عليه لا تعلف الناقه (مكعب ولا برسيم ) فقط تــبــن بوجه العدو وماء علشان يخف الحليب مره وبعد ما تشفى الناقه الله الله بالعلف هذا من واقع تجربه

[السومر]

يا جعلكم ويا والديكم الجنه

الله يجزاكم خير

[رراعي ريمان]

سلام عليكم مسيتم بالخير


يا السومر عندي نفس مشكلت ناقه لقيت لها حل
كان لقيت الحل افيدنا