رايكم يـ الربع . . . محتار ( نعزمه ويعتذر / و يعزمنا و نوجبه )

[بر الوالدين]

السلام عليكم ور حمة الله وبركاته

أسعد الله أوقاتكم بكل خير

يالربع : هذا رجال ما شاء الله عليه يوجبنا و يلزم و كل ما أخذ له ذبح و عزم

يحب الجمعه و اللمه و الإجتماع و خاصه إن كنا عنده ( عقب صلاة العشاء )

ما يطلعنا إلا متعشين / و الحقيقه إنه مهب كل جلسه ولكن غالباً

الآن بالنسبة لي ( خجلت من كرمه ) و ودي أعزمه و لكن الرجال ما ودهـ يكلف على أحد

و نظراً لإرتباطه ما ودهـ يواعدك ثم يصادفه موعد مهم و يعتذر منك

يعني مثل ما تقول خله بظروفه و هالظرف ما بعد صدف ( و الله حاله ) مرتبط كثير

أنا جتن فكرهـ ( وبي رايكم ) وهل يصير / ينفع / تمشي / عيب مهب عيب /

ألا وهي إني بعزمه في مكانه ( إجتماعنا في إستراحه ) . . . . شلون

يعني أقوله شف يبو فلان ( أنا اكتب لكم بإختصار ) يا إنك تواعدنا و عد ما نخلفه و نتمم عليه

أو إن عشاكم يالربع في هالمكان ( بعضهم ما أعرفه ) فقلت دام الإستراحه معروه ، أسهل

بالعربي ( بعزمه و عشيه هو و ربعه في مكانه )

( الحقيقه صرت ما عاد أروح / و إذا رحت تعذرت بالعائله و طلعت )

شراااااااااااااااااااااايكم





.

[ابو بدر العتيبي]

السلام عليكم
انا رايي توجبه في الاستراحه هو وخوياه الي معه متى ما يبي
مجرد راي

[بر الوالدين]

راي طيب يالبدر / و متى ما يبي > أخاف يمسنا بأسابيع و شهور

[برق الجهمه]

وعليكم السلام
من رايي تعزمه عندك واذا وافق
ماوافق تعزمه باستراحته خصوصا اذا انه خويك وجمعتكم ماهي رسميه

[المستشآر]

وعليكم السلام

من رايي انك تعزموه بمحلك واذا تعذر

لا تشور خذ عشاك ورحلوه بالستراحه

[مورد الهايب]

الشاذلية مثل فنجال القهوة وأنا أخوك
أعزم الرجال في محلك وإن ماوافق أخذ ماجوبه وود لإستراحته
والسلام على أبو سليمان

[بر الوالدين]

لا هنتوا يالربع

هذا اللي يب يصير و رايكم و شوركم نتبعه

و إن شاء الله إنه يتبع لنا ما نطلبه

إن وافق ولا عاد ماجوبه في محله نقومبه

يعني مهي شينه يا جماعه <<<< رايي إنها حسب ظرف ضيفك

ولا الشينه إنك ما غير تقلط عند غيرك ولا تقلطهم عندك وكلن و ظروفه

[روضة الافلاج]

اذا كنتوا تجتمعون في الاستراحه دايم يعني هو عنده وقت فاضي , يعني بدال الجمعههاك اليوم في الاستراحه يجتمعون في محلك وتعزمهم .

[ثامر زهراني]

ما ازيد على راي الاغلبية
اعزمه في بيتك
وان اعتذر خذ عشاك للاستراحه
يمكن الرجال مايحب الرسميات

[نايف 1996]

حنا والله اذا جانا ضيف بالاستراحه وبكرا عشاء يجي غصب مايتعذر صح يقول مااقدر كثر خيركم بس حنا خليناه يجي بالعشاء..

[صقر البحيرات]

... وعليكم اللسلام ورحمة الله وبركاته

أشكر جميع الاخوان الذين ابدو رأيهم وأنا إذا تسمحلي .. أقول اللي عندي

( اخذت من جدي الله يطول عمره ..)) بعض الحكم وبعض الامور التي تغيب علينا . وهي تعبر عن الرجوله

... في أحد المرات طلب مني زميلي إنه يزورني عند الحلال يوم من الايام ونطق بحلف إني لا اضيفه ولا أذبحله ذبيحه
وانتظرت الرجال ..

يوم من الايام اتصل علي وقال سوف ازورك ومع رجال .. وصفت له المكان ومشى قاصدني

رحت يم خوالي لأحظر القدور لأني نويت اذبح ولا أرد عليه ( مع إنه ملزم إني ما اسوي شيء فقط يشوف الحلال ويوسع صدره )

وواجهت جدي عند الغنم وقلت واحد من زملاء جايني بالطريق وابي اخذ القدور وأبي اعزمه واناشبه

قال ايه (( ابو مشاري ترى العزيمه نوعين قال عزيمه (هاه. وجعل ذراعه وكفه مرتخيين ـ وقال وعزيمة هاه واشار إلى مدالكف والذراع ))

معناها : إن العزيمة تكون حاره واشعر الضيف بإنك صحيح تبي تذبح .. ماهو مجرد كلام عابر ضعيف عن قولت ماعزمته ..
او تقول عزمته وما وافق .. !!

(( الشاهد إنك تعزم الرجال واللي معه بالاستراحه ( ما انت عازم واحد ومخلي واحد )عزيمة حاره وكلام يجمد على الشارب .. ولا تكنكن ( تضعف كلامك ) وامش وقلهم بالموعد الفلاني .. )

يجون الحين يبون يسامون وقلهم صايره صايره .. ولا تجادلون

الحين يوافقون .. وهم يحددون عاد الموعد والمكان إذا ما يبون الرسميات .. وانت عاد تقدر الامور وتوزنها


اسف على الاطالة فقط مشاركة الاخوة في ارائهم

بالتوفيق .. وارسل لنا غريفه إذا استعزم