حياكم الله اخواني
الموضوع واضح من عنوانه مقناص الى دولة ارتيريا .
اجتمعنا نحن وبقية الاخوان وراودتنا الفكره فكانت الاجابه من الجميع الموافقه وبشده على الرحله وتم الاتصال ببعض الاخوان في دولة ارتيريا والتنسيق معهم فما كان الرد منهم الا الترحيب وبشده واصرار على قدومنا وحددنا يوم للرحله وكان المنسق العام للرحله ابن العم ابو عمير الله يعطيه العافيه وفي اليوم المعلوم اتجهنا الى مطار الملك خالد الدولي ومالكم في الطويله اخذت لكم هالمقتطفات من الرحله وبشكل مختصر لمنتدانا الغالي مكشات وكذالك لمحبي مكشات
صورة محاتسيكم من مطار الملك خالد الدولي ويضهر في الخلفيه طياره يمنيه واللي حجزنا عليها .
وهاذي صوره بعد الاقلاع وكان الجو سحب على الرياض
وبعدها وصلنا الى دولة ارتريا وكان في استقبالنا الاخوان هناك وكانو حاجزين الفندق ومضبطين الوضع وهاذي صوره للفندقمن الخارج
وهاذي صوره من اليوم الثاني واخوي الاكبر حالف ماحد يسوي القهوه غيره
وبعد القهوه قررنا نروح نشتري لوازم الرحله واخذنا لكم هالصوره مع ملك الطاره ابو عبدالله
وبعد ماجهزنا طلبات الرحله شلنا عفشنا بتجاه المقناص وهذي صوره لمحاتسيكم وللعلم السيارات ثنتين وحده للعزبه والفرش والثانيه للمويه والديزل وخلافه (سياراتهم ديزل هناك)
وبعد شد الرحال ونزولنا مع طريق العقبه واللذي استغرق نزولا مايقارب الاربع ساعات اخذت لكم هالمنضر الجذاب والخيالي والسحب بالاسفل
وهذا احد الجسور بعد نزولنا من العقبه
وش رايكم نترك الصور العاديه وندخل في صور الصيد...؟؟
اول مادخلنا موقع الصيد صادفنا هالمزيون وهو اول الضحايا ( انا مستغرب من قرونه متعاكسه الى الامام وليست الى الخلف ولا اعتقد انه ادمي واختلفنا فيه انا والاخوان وياريت احد يفيدنا عنه )
وهذي صوره لدجاج الشنير والمتوفر بكثره هناك بأعداد كثيره اقل مجموعه 10
وهنا صوره اخرا لمحاتسيكم وفيها ضبي العفري ودجاج حبش والمتواجد بكثره هناك ايضا وبأعداد هائله
وهذا طير الحبرو ماسكه محاتسيكم وهو (الذ ماتذوقناه)
وهذي صوره له وهو حي
وهذي عشوه مشكله مابين دجاج حبش ودجاج شنير وارانب (والارانب بالنهار قبل المغرب توقف في الغابه وتصيد العدد الي تبيه )
العشى اوصال وريش ومضبي حياكم تفضلو
مضبي ضبي حياكم
وهذي احدا العشوات مشكله مابين كبسة طيور ومرقة ارانب ( سمو لاحد يستحي حياكم )
اضنكم شبعتو ياجماعه ...؟؟؟
نرجع للمناضر هناك شي خيال
شوفو الصوره العشب والغابه بالخلف اللي فيها الصيد
وكان لنا نصيب من حليب الخلفات
ارجو عدم الرد ((يتبــــــــع ))
رد مع اقتباس
المشاركة الأصلية كتبت بواسطة ابو عود
