فزعتكم غيرت دينمو الفتك 2009 مرتين ويحترق

[صقرالعارض]

السلام عليكم اخوتي وعسى الجميع بخير عندي مشكله بالنيسان فتك 2009 قبل اسبوع سافرت عليه وفي الرجعه بدت لمبات الطبلون تولع وتطفي والامبيرات بدت تلعب والحمد لله وصلني للرياض ماقصر ويوم جيت اشغله مااشتغل وشركته وديته للكهربائي قال من الدينمو ولازم تغيره جديد لانه الاكتروني ورحت وشريت واحد اصلي ب2250 بعد الخصم واليوم رجعت نفس المشكله بالدينمو الجديد وفضت البطاريه لان الدينمو احترق ونسأل الله العوض هل احد مرت عليه هذه المشكله لاني ودي اوديه للوكاله لاكن انتم ادرى مني بها فاذا احد منكم يعرف كهربائي ممتاز للنيسان بالرياض يدلني عليه وله مني الدعاء طولت عليكم ولكن اعذروني .

[الباثفندر 3.5]

اخوي تأكد من امبير بطاريتك هل هو نفس رقم الامبير الصحيح للباترول؟؟؟
اذا كنت مركب بطاريه اكبر يصير منها الدينمو يخرب بسرعه
تأكد من اللي قتلك عليه

[رسيس نجد]

الله يعوضك 0000
غريبه الكهربائي الي غيرت عنده الدينمو ما علمك السبب 0
في الصناعيه الخرج مراكز كبيره افضل من الوكاله واكثر امانه 0

[رفيع المقام]

قد يكون امبير البطارية عالي مثل ما قالوا الاخوان أو انك مركب بطارية اضافية بطريقة غير صحيحة.

[العمده 0ون0]

وعليكم السلام ورحمة الله وبركاته
الحمدلله على السلامة
الله يعوض عليك بخير وماتشوف شر
اخوي صقرالعارض
الشباب مايقصرون الله يخليهم ان شاء يفيدونك
غريبة الكهربائ ماافادك
الصراحة انا ماعندي خلفية عن كهرباء الفتك لاكن اتكلم بشكل عام
شييك زين زين على اسلاك وافياش الدينمو الخارجية الكهرباء والماص لايكون فيها شئ مجروح اومتوسع ومسبب ماص وكذلك علبة وقاعدة الفيوزات لايكون ماخذه حراره و سببت ماص بسبب الكربون لاسمح الله و تأكد من فيوز الدينمو او الكتاوت حق الدينمو اذا كان فيه واحد خارجي غير الموجود داخل الدينمو والله انا ماعندي علم او فكرة بالضبط عنها بس حبيت المساعدة قدر المستطاع 0
وسلامتك والجميع

[ميكا مكشات]

الله يعوضك خير

اذا اللفات الداخلية هي اللي تحترق غير بويبنة وكتاوت ولا تغسل المكينة

[K.S.A.A]

مثل الشباب شيك على أمبير البطارية
والأفضل إنك تغير البطارية وترتاح. أشتر بطارية جديده ودينمو وإن شاء الله تضبط معك
بعدين رح للتشاليح بتلاقي الدينمو رخيض بالحيييييل ممكن مايتعدى ال 500 ريال أفضل من الوكاله .

[محرين باالخير]

لاتكون مركب بطاريه اضافيه او مركب كتاوتات زنون او عامل توصيلات خارجيه وإلا البطاريه لو زاد امبيرها شوي ما منها مشكله

[وبل نجد]

اخي الكريم هل انت مركب بطارية أضافيه ولا لا؟؟

اما بخصوص امبير البطارية فليس له دخل في احتراق الدينمو ((إلا اذا كانت البطارية حجمها كبير جدا ))

وكلام اخوي (محرين الخير) عين الصواب

[حباتري]

معوض خير ان شاء الله

يمكن امبير البطاريه
او سيارتك تستهلك كهرباء كثير مره يعني زنون الزنو نتصرف كهربه كثر وتتعب الدنمو

خذلك من التشليح ومع بطاريه باقادر وتريح راسك

وبتوفيق

[صقرالعارض]

والله انكم ذيابه كلكم مع اني ماجبت طاري للبطاريه الاضافيه او الزنون لان كلهن موجودات وكنت شاك من البطاريه الاضافيه لان الي سواها بعد فتره البطاريه الاضافيه يجيها تعبيه بسيطه وتفضي الين احترق الدينمو الاول ويوم غيرت الثاني فصلت البطاريه الاضافيه وماشغلت انوار الزنون نهائي ومع ذلك احترق وهذا الي انا مستغربه وابي منكم كهربائي للباترول بالرياض ممتاز بارك الله فيكم اجمعين وجزاكم الله خير.

[صقرالعارض]

السلام عليكم ابشركم ضبط الفتك والشغله بسيطه بعد الخساير مع ابو هنود وطقته اليوم رحت للكهربائي سليمان الخطيب بورشة باترول ومن شافه على طول قال المشكله من اسلاك الفيش حق الدينمو وتتبع الاسلاك لقى واحد منقطع وشبكه ورجع تمام بارك الله فيه والحقيقه اني فرحان ان الي اكتشف المشكله وصلحها ســــــــــــــــــــــــــــــــــعـــــــــــودي ماشاء الله عليه

[الثويرات]

انا اقول يمكن من زيت الفرامل ناقص.؟؟؟؟


ياشين بعض ردود الاعضاء تجيب الهم.

وش دخل زياده امبير البطاريه في حراق الدينمو.


لو تضع 10 بطاريات في السيارة كلها مشبوكه على الدينمو ماعندك مشكله.

سبب تلف الدينمو هو الاستهلاك الزائد للكهرباء مثلا تشغل المكيف وتولع النور وتشبك ماطور هواء وتشبك ثلاجة سيارة وتشبك لمبكة الكبوت وتشغل حاجات كثيرة على الدينمو . الحين الدينمو معرض للحرق والتلف.

[صقرالعارض]

وسع صدرك ونخوك والدعوى استشاره وكلا يدلي بدلوه ولولا الله ثم هاالاخوان ماتوصلنا للمشكله فجزاهم الله خير على مرورهم الطيب وعلى مجهودهم وعلى وقوفهم معنى وفزعتهم فبارك الله فيهم جميعا.