معاناتي مع الجمس2001...الدبل...طرمبة البنزين...واقع لا خيال

[سوبر VTC]

السلام عليكم و رحمة الله

طبعا هذه معانتي مع الجمس كتبتها من اجل الفائده لاعضاء منتدانا الاعزاء

طبعا معي جمس 2001 دفرنسين و اللي صار لما مشى 25000 الف كيلو طلعت للبر و شبكت الدبل الخفيف و

و اجي مكان به هيار و اشبك الدبل الثقيل و يوم اني طلعت من الهيار يوم انتبهت و تطفى لمبات الدبل اللي يسار

و لا اقدر افصل الدبل و ابلش بعمري و يفرجه الله و اقوم على فيوزات الدبل اللي عند البطارية و ابدا افصلهن و

اشبكهن عدة مرات و الحمدلله اشتغلت اللمبات و يوم صار عقب كم يوم تبدا تطلع رسالة افحص الدبل اللي فوق

امبير الضغط او الكمريشن تولع و تطفى عدة مرات و قمت ودخلته الوكاله قالوا عندك الدينمو حق اللي

يعشق الدبل طبعا لونه اسود بحجم علبة صابون الفيري خربان و طبعا غيروه على الضمان و الحمدلله الى الان تمام

مكتوب عندي بالكتالوج يتم شبك الدبل الخفيف و انت تمشي الى حتى 80 بشرط ترفع رجلك عن البنص

حتى يعشق اما الدبل الثقيل لابد من الوقوف تماما

المشكلة الاخرى اللتي ارهقتني مشكلة طرمبة البنزين بعد ما مشى الموتر تقريبا 90000 الف كيلو

طاح امبير البنزين و بدا مره على النص و مره على مصفر واحيانا على الربع و اتوكل على الله

و افك التانكي و لقيت الطرمبة منكسره من عند القوائم الثلاث السست المراد غيرت الطرمبة

بوحده جديده و اجلس فتره و الدعوه تمام يوم دريت و طاح الامبير مره اخرى و بدا يلعب على

كيفه و يوم فكيت التانكي لقيته منكسره يالله من الشكوى لك و جلست افكر انا و الوالد وش اللي

يخليه تنكسر طبعا استنتجنا بما ان التانكي ممتد بالطول من امام الكفر الخلفي الى اسفل مرتبة

السواق يعني مسافة مترين تقريبا بالطول فوجدنا انه اذا كان بالتانكي نص البنزين همن مسكت

فرامل بشكل فجائي جاك البنزين يمشي مليون همن ضرب الطرمبة من تحت و هذا اللي يخليه

تنكسر لانه لا توجد في اسفل التانكي تكايات يمين و يسار الطرمبة بحيث انه ما تتحرك من

ضرب البنزين ايضا لا توجد قواطع بالتانكي او حواجز بحيث انه تخفف صفق البنزين

و طبعا تركيب الطرمبة يكون بهدوء و جعلها عمودية قدر الامكان

المراد قمت على الطرمبة الثالثة اللي انكسرت و حطيت قفزان للقوائم الثلاث في اعلى الطرمبة من

الداخل على شكل جبيرة زي تجبير اليد المكسورة طبعا ضبطت الدعوى سافرنا لمكه و يوم اقبلنا على

ديرتنا و بقى 40 كيلو يوم طاح الامبير ههههههه الله يعين و يوم صار بعد كم يوم و افك التانكي

و لقيت الطرمبة منكسرة من تحت من عند نهاية القوائم الثلاث حيث يوجد بلاستيك يضم القوائم

الثلاث و مكبوس بجرم الطرمبة طبعا حامت كبدي و قمت و جخرت اربع فتحات بجرم الطرمبة

بواسطة الدريل و ربطته با سيام بحيث ان السيم يمسك بلاستيك القوائم الثلاث مع جرم الطرمبة

طبعا الدعوى طلعت تمام التمام و نجحت مية بالمية طبعا الطرمبة مجبسة فوق و تحت

قفزان و اسيام هههههههههه

طبعا الطرمبة القطر حقه اللي فوق او الداير من اعلاه بلاستك و هذا اللي يخليه تنكسر من القوائم

الثلاث من الاعلى طبعا لو تشوف طرمبة الجمس م2005 تلاحظ انه حديد لذلك صعبه جدا انه تنكسر

لكنه ما تركب عندي لانه حجمه كبير

المراد بعد فتره سافرت انا و اهلي للرياض و يوم خلصنا اشغالنا يوم جيت اشغل و عيى يشتغل الموتر

و ادخل يدي ما بين السست و الكفر و احرك الفيش و الحمدلله اشتغل الموتر لاحقا فكيت التاكي للمره

الرابعه لقيت الفيش عليه كربون و متوسع من الحراره و اخذت فيش من التشليح و حطيت شحم بالفيش

الذكر و كذلك الانثى حتى ما يكربن او يحتمي او يتوسع و احط الطرمبة بسطل عشان اتاكد انه سليمه

و اشغل و يشتغل الموتر و همن ركبت الطرمبة و شديت التانكي و عبيته بنزين و ياللمصيبه عيى يشتغل

الموتر ههههههههه و افك التانكي للمره الخامسه و اطلع الطرمبه و ابفحصه بلمبة فحص و لقيت شي تافه جدا

ما يطري على البال طبعا الطرمبة داخل الجرم و به سلكين كهرب و ماص لقيت السلك الماص منقطع السيم او

السلك اللي داخل ربل السلك بمعنى انه قدام عينك مشبكوك السلك بالطرمبه لكن من الداخل منقطع شي تافه جدا

و قمت و صلت و صله للكهرب و للماص تقريبا طول الاصبع و الحمدلله ضبط الموتر لا حقا حصلت عند

الجميح طرمبة الداير حقه اللي فوق حديد و هذا ميتغاي لانه باذن الله ماراح تنكسر ابد طبعا سعره 950 ريال

اما البلاستك ب750 و تحرص عليه تنكسر كالعاده طبعا شريت الطرمبه الحديد من الجميح لكن تعبت بالتشاليح

و انا ادور الفيش حق طرمبة الحديد لانه اكبر من فيش الطرمبة البلاستيك و اغلب المواتر اللي بالتشاليج الفيش حق

طرمبه بلاستيك و صعبه انك تركب فيش البلاستيك لانه الطرمبه الحديد الروس الانثى حقاته كبار طبعا قصيت

الفيش القديم و ركبت الفيش حق الحديد و حطيت عليه رصاص حق الكاويه اللي عند محلات التلفزيونات طبعا فكيت التانكي للمره السادسه وركبت الطرمبة الحديد و حطيت الطرمبة البلاستيك اسبير لو قدر الله اخربت الطرمبه الحديد و

الحمدلله الامور تمام التمام لكن تصدقون ان فك التانكي غثاء لابعد الحدود لكن تعودت و صار الامر طبيعي طبعا رحت لحقين المكيفات و فحصت ضغط الطرمبة طبعا توجد ابرة زي حقت تعبئة

المكيف يسار ثلاجة المكينة فوق ماصورة البخاخ حيث يتم شبك اللي و الموتر يشتغل و طلع الضغظ عال العال

60 و اذا صار الضغط اقل من 40 فهنا يضعف عزم الموتر و هذا يدل على ضرورة استبدال الطرمبة لكن لا

تشري طرمبة كاملة مع الجرم و انما اشتر الطرمبة لوحده و ضعها مكان القديمه و اما اللي اللي داخل الجرم

اكبسه بزراديه و حط عليه قفيز او سيم
للمعلوميه /// جميع الطرمبات الثلاث اللي عندي ضغطهن تمام لكن الجرم منكسر و انا رهمت وحده منهن افرغ

بواسطتها تانكي البنزين يعني اسرع من الشفط باللي

البعض يمكن يقول هاذي قصة حياتك لكن هذا اللي جرى

للمعلومية اصلاح الطرمبة و فك التانكي بالبيت و اخذت خبره بحكم ان والدي ميكانيكي سابقا لكنه معتزل عسى الله يطول بعمره

تحياتي لكم

[ذيب صعافيق]

ياصبرك --------صارت ألف ليله وليله:d

[Magellan]

يؤ يؤ يؤ ......وش ذا وأنا أخوك
تذكرني بمعاناتي مع جوالي النوكيا .....كل يوم في خرابات ومع ذلك أحبه
لكن أنت صراحة قريت موضوعك وأنا رايح للدوام ..وقلت يالله صباح خير
وش عنده أبو الشباب يحبرث على طرمبة البنزين،وحط يدي على قلبي قلت لايطفي فيني الموتر من زود الوسوسوسة ...
بس تنبهت قلت أنا بوسط الرياض ولو طفى أقرب لوموزين
وشكلك دايم في معناة، السفاري ماخذ همك وشكلك تتوجس منه الخيفة كل مرة ،مسامير ثلاجة وكتاوت طرمبة وو ..
بس أحس فيه علاقة بين الجمس والسفاري ما أدري ليش ..وإلا أقولك ماسمعت بمباحثات إندماج نيسان مع GM يقولون قربت خلاص وحول مايصيرون سوا سوا ..
يعني الأمريكان يبون يصممون ثلاجة الفتك ولهاتها واليبانيين يبون يضبطون طرمبة البنزين
بس.. على طاري الجمس 2005 ، ترى بالفعل من عام 2004 تم تغيير نظام الوقود في الجمس بحيث حطوا فلتر البنزين داخل التانكي وهو فلتر حديد مايحتاج تنظفه عشان كذا غيروا مسامير الطرمبة ..
وأقول كان الله بعونك وأشكرك لتبصير أخوانك المساكين ، لأننا بحاجة للتوعية وبالفعل المفروض الواحد كل ما خرب عليه شيء بالسيارة ياخذ نص ساعه تفكير وتأمل قبل مايفر على الورش بحيث يحاول معرفة وإستنتاج الخلل ومسبباته ، وأعجبتني حركة الترهيم وفك المسامير والتربيط ،والحبرشه حول فيش الطرمبة ..


بس أهم شيء لو شريت موتر في السنين القادمة إن شاء الله علمنا ، عشان نهج منهن
وبالتوفيق

[سيف الظفير]

يا ليت دعمك موضوعك يا الغالي بالصور




سؤال//


هل مشكلة طرمبة البنزين موجود ة في الـ 2500/2006


مع العلم بأنك تقول من 2005 جاءت حديد


هل هالكلام مضبوط

[القصبي]

ياصبرك صبراة اي والله
انا الللي اعرف فية واحد من الجماعة معة صالون 2000 تصدق غير الطرمبة 4 مرات المشكلة يودية الى الوكالة ثم تخرب ثم يرجعة لهم الين باعوة وافتكو

[سوبر152]

[سوبر VTC]

ذيب صعافيق /// لا و انت الصادق كليله و دمنه:d :d :d تحياتي لك

سيف الظفير /// انت شفت بنفسي دفرنسين 2005 حديد لكنه كبيره و

ابحاول انزل صور تحياتي

[سوبر VTC]

ياصبرك صبراة اي والله
انا الللي اعرف فية واحد من الجماعة معة صالون 2000 تصدق غير الطرمبة 4 مرات المشكلة يودية الى الوكالة ثم تخرب ثم يرجعة لهم الين باعوة وافتكو

على كلام احد زملائي يقول معي 2004 و غيرت الطرمبه اربع مرات و كل مره تنكسر طبعا على الضمان

و انا بصراحه بالامور هاذي موسعن صدري و حاط بالبريق ماء طبعا قد يكون البديل عن الجمس الباترول او

الجيب لكن بصراحه الجمس بلحاله تخيل ناخذ راحتنا بالسفر وسيع و راسي بالخط و عزيز و حتى بالبر نفس

الشي

تحياتي لك

[سوبر VTC]

شكلك غلط بالرقم

[سوبر VTC]

ماجلان

و من الحب ما قتل

وحط يدي على قلبي قلت لايطفي فيني الموتر من زود الوسوسوسة

تخيل يطفاك بطريق خريص و الا بطريق الملك فهد و يالله

قطع بصل و طماط

و الباترول يهمن لانه مع رجال عزيز علي و لا تهون

ياماجلان

و ياليت لو يندمج الامريكان و اليابانيين

بس أهم شيء لو شريت موتر في السنين القادمة إن شاء الله علمنا ، عشان نهج منهن

ههههههههههههههه ياحبيلك يا خلفهم ابشر بعزك

شرفني مرورك

[ساري 111]

ههههههههه ياحبي لك اثر عبي هنا وانا ماأدري

تصدق توي اعرفك وعرفتك من معاناتك اللي انت كاتب

بس بيني وبينك بعذر الموتر وماورى جوده اللي صابر عليكم ماشاء الله .. كم رجل تسوقه ؟؟ ههههه

ياخي تذكر الجمس اللي كان معي 2001 مشى 200 الف وبعته مافكيت فيه صامولة
إلاطرمبة البنزين وماخربت بعد بس انكسر قوعه اللي فوق من ضربة رمثه!!

بس يبدو انهن توفيق هالمواتر

ماادري انت اخذت الطرمبة من فارس وصلحت لك او لا ؟؟(اكيد عرفتن الحين) هههه

[سوسة حطب]

مداخلة فيه واحد من الشباب معه صالون 99 الطربه كل فترة عطلانه مر به على خوي له وشار عليه أنه بدال ما يفك التانكي يقوم يشق له فتحه من داخل السيارة بحيث تكون تحتها الطرمه يفكها ومو شرط ينزل التانكي ويخلي معه وحده أسبير طريقة مجربه وناجه إلى الآن

[لن أمل من العطاء]

حياك الله اخوي

ولكن شكل الامريكي توافيق من الله بعضهم يخرب عليه كثير والبعض ماشاء الله تبارك الله بدون مشاكل

عموما

قلي هل الموتر اللي معاك هو 8100 او 6000

قلي اش نوع المحرك لاني ابافيدك بشيء

[ابوعقل]

حياك الله اخوي

ولكن شكل الامريكي توافيق من الله بعضهم يخرب عليه كثير والبعض ماشاء الله تبارك الله بدون مشاكل

عموما

قلي هل الموتر اللي معاك هو 8100 او 6000

قلي اش نوع المحرك لاني ابافيدك بشيء

على حسب الشفت اللي اشتغل بالسياره

[ابونوف الشلوي]

مشكلة الطرمبة في الموديلات كلها
وبالأخص الأستخدام
لأن عندنا شفر 1500 موديل 2001 استخدام
غيرنا الطرمبة مرتين ومعنا ما شالله عليه
لكن انت وانا اخك تكررف الموتر
وبعدين مكينة 2500 يشرب شرب الويل
في البنزين