مشكلة بعد توضيب الكامري(2002) والله تعبت

[JJJJJ]

السلام عليكم

ياشباب عندي مشكلة تكررت بعد توضيب الكامري 2002 اربعة سلندر
بعد ماوضبتها قالي الورشة امش 1000 كيلو تمر ين لاتتعدى 100 وبعدين امش عادي
وخلصت 1000 كيلو وبعدين مشيت عادي ويوم وقفت اعبي بنزين ا اسمع صوت طقطقة
كذا طق طق طق وااضح ونفس الصوت قبل التوضيب وتقفل معاي دافع فيها مبلغ وقدره واخرتها طقطقة واروح للورشة قعد يحاول يمين يسار قالي لازم نفك المكينة مرة ثانية
وفك المكينة قالي بستم واحد و السبائك اللي بالذراع وغيرت بستم واحد مع السبائك وبعدين رحت امرنها من جديد ونفس الطريقة مشيت الف الوضع ok ثم صرت عليها امشي عليها كذا اسبوع وصوت المكينة مضبوط وسافرت فيها جدة ورجعت الرياض والمكينة ماعليها
لين ماصار لها شهر وهي كويسة امس وانا جاي من طريق القصيم وكنت ماسك خط تقريبا 150 كيلو متفاوت في السرعة عند نقطة التفتيش الا واسمع طق طقطقطقطق صوت اقوى من ذاك اليوم تحطمت صراااااااااااااااااااااحة وش السواة ؟؟؟ انا صراحة شاري كل شي اصلي الا قطعة وحدة ماحصلت مقاسها بالوكالة ولا قطع الغيار الاصلي الي هي السبائك اللي بالعمود الظاهر متحركة وشريتها من محل مادريي شسمه الظاهر المنيفي بالصناعية خاص بقطع التوضيب مافيه الاهو ياباني ماهو اصلي اللي بعد الاصلي بس يقول زين ومحد يبيع المقاس الا هو وهي حديده عادية هل ممكن تكون هي السبب لانها ماهي اصلية من الوكالة ؟؟ او من الورشة شغله زي وجهة ؟؟
ولو افترضنا انها من السبائك لانها ماهي اصلية 100/100 وش الحل مالقيت نفس المقاس
هل لو اغير عمود الكرنك من التشليح ولا انخرط او انخرط بس يكون متوفر له مقاس
للسبائك اصلية من الوكالة ؟؟ وهل تسوى اني اغير العمود كامل عشان السبائك ؟؟
ولا اذا غيرت العمود كلها تجي سبياكها معاها ؟ وكم سعر عمود الكرنك في الوكالة ؟ وكم سعره مستعمل واسف على الاطالة والله مقهوووور ومادري وشسوي ؟؟

وش السواة ؟ ولكم الدعاء

[K.S.A.A]

الله يعيننا وياك يالغالي . هذا التوضيب وهذي مشاكله.
لكن ودي أنك ذكرت تفاصيل التوضيب بالتفصيل .
وهي :
هل خرط السلندر ؟؟
هل غيرت البساتم كلها ؟ وهل العمود جديد ؟
انا من خبرتي البسيطة أن الصوت من العمود.
والعمود لازم تغيره جديد مهما كلف الثمن .
اما بخصوص القطع هل موجوده او لا ؟ فأنا والله ماعندي خبر ولاعمري أمتلكت كامري بصراحه
وتويوتا من الوكالات الغنية عن التعريف هل يعقل ان مايتوفر لديهم سبايك !!!!!
المهم الله يوفقك يالغالي وودي أخدمك باكثر لكن هذا قد عرفي ( خبرتي )

[gomr-15]

انا اقول اخوي لو انك ما خذ لك مكينه من التشليح او المكاين الي وارد اليبان ازين

اول شي عليها ضمان وثاني شي انت تفك المكينه من السياره يعني تاخذ مكينه من سياره مصدومه

والمكينه ما تظررت ازين واضمن لن التوضيب مشاكله واجد وموب اي واحد يشتغل زين

[القناص-sniper]

يوجد مكائن رجيع من دبي ياليت الأخوان يفيدونك

وتحصلها اكثر شي عند المخارط

امل اني افدتك

[YUKON_GMC]

الصوت هذا صوت سبايك .. واعتقد هي اللي انت اشتريتها ماهي اصليه ..

ومع ان حتى اللي ماهو اصلي زين ويمشي سنه على الاقل .. لكن مشكلتك من حاجتين :

1- اما ان الورشه غشوك وركبوا لك قطع تجاري وماهي اصليه .. خصوصاً لو انك موكلهم يشترون القطع وترى هذي فيها تلاعب كبير من اللي مايخافون الله ..

2- اوانك لم تغير طرمبة الزيت .. وهي سبب التخبيط الاول والثاني والثالث ان ماغيرتها جديده واصليه

وبعدين ترى جميع الورش تعطيك ضمان على الشغل على الاقل شهرين ان حصل شيء خلال هذه الفتره يصلحونه مجاناً

والعمود دام انك تقول مالقيت له سبايك اكيد انه ماهو مضبوط ومخروط من قبل لين ملعون خيره

اشتر حتى لو مستعمل الاهم انه يكون صفر .. او 25 .. يعني اما ماخرط من قبل او مخروط مره وحده فقط

[4x4ofroad]

الكرنك علله العلل
واحيانا المخارط يكون شغلهم مو مزبوط
حاول تشوفلك كرنك ستاندر او يحتاج خرط اول خرطه والافضل انك تجع المكينه وتاخذ شي وارد اليابان ارخص من التوضيب واحسن

[ابوعمر5]

انا اقول اخوي لو انك ما خذ لك مكينه من التشليح او المكاين الي وارد اليبان ازين

اول شي عليها ضمان وثاني شي انت تفك المكينه من السياره يعني تاخذ مكينه من سياره مصدومه

والمكينه ما تظررت ازين واضمن لن التوضيب مشاكله واجد وموب اي واحد يشتغل زين

بالتجربة شريت مكينة وارد اليابان عن طريق دبي كاملة بما فيها دينمو الكهرب و كمبروسر المكيف وكل ملحقاتها ومضمونه وارخص واريح من التوضيب والحمد لله ماشية تمام

ادعو رب العرش العظيم ان يوفقك بما تمنى

[مركز حراره]

موقع الي يبيعون المكاين وارد اليابان صناعية العويضه

[s3eed]

اخوي صاحب الموضوع لاتستعجل
ممكن يكون حساس أسأل أهل الخبره عن هذي المشكله
والله يوفقك وتنحل المشكله

[بندرالعتيبي]

والله يامكينة موتري ددسن موظبه قطع ياباني مهب اصلي له اكثر من شهرين ولاشفت منه الاكل خير تمر من جنبه تقول مو شغال ماشاءالله شغل مظبوط عند واحد امين

[سوبر VTC]

اخوي هل لك جية الى بريدة ؟

الافضل لك و للزمن مكينة يابانية اقل ميزة بها
انه شد المصنع من اليابان مافكت

[JJJJJ]

يعطيكم العافية على الردود
القطع اللي غيرتها : طقم شنبر + طقم وجيه + سبائك (ياباني ) + عمود البستم واحد فقط + بساتم الاربع كاملة+ طرمبة زيت كل القطع اصلي الوكالة ماعدا السبائك من المنيفي والقطع انا شاريها بنفسي
السلندر كنت باخرطه لكن المخارط قالولي مايحتاج خرط السلندر ممتاز
الحين وش اسوي ؟ صعب اني اغير مكاينة بعد ماحطيت فيها
هل اروح ادور عمود كرنك من التشليح وتجي السبائك معاه؟ او اخذعمود كرنك من التشليح واشتري سبائك اصلية من الوكالة ؟ ودام القطع الياباني اقل شي يشمي سنة ليه عندي حدها شرين وطقطقة ؟ هل هي لاتتحمل الخطوط ؟؟؟
الي اعرفه ان مويدلات 2004 فما فوق هذي ماتنفع للتوضيب اما موديل 2002 وتحت تنفع بالراحة

وهل الماكينة اليابانية تختلف قوتها عن الماكئن السعودية ؟
لان فيه واحد يقولي مكائن وارد اليابن اللي بالصناعية صحيح نظيفة مرة لكن قوتها اضعف بكثير عن السعودي مادري وش رايكم ؟

[Bader-M]

بالتجربة شريت مكينة وارد اليابان عن طريق دبي كاملة بما فيها دينمو الكهرب و كمبروسر المكيف وكل ملحقاتها ومضمونه وارخص واريح من التوضيب والحمد لله ماشية تمام

ادعو رب العرش العظيم ان يوفقك بما تمنى

ونعم اراي على فكرة سعرها لا يتجاوز 2500 ريال بحد اقصى وضمانها اسبوع
تجدها في الصناعية القديمة بالرياض

شف اول ما تخذها غير الزيت و السيفون
وبعد ما تجلس يومين معاك مسك خط فيها 50 كم كفاية بسرعة مرتفعه نسبيا 120 كم
اذا سلكت معاك و ما تغير لون الزيت بسرعة وبعد ما يخلص الضمان
غير سير التيمن و غير ما الرديتر حط اصلي سعره لا يتجاوز 40 ريال و زد الباقي موية بطارية تطلع عليك الحبة 3 ريال بالكثير بالكرتون
على فكرة رقم محرك سيارتك 5S لا تركب 4S لان حجمها اقل (2000 سي سي)

تقبل مروري

[YUKON_GMC]

مثل ماقلت لك .. اسهل حل .. دزر لك عمود لم يخرط من قبل .. واخرطه 25 واشتر له سبايك ..

هذا في حالة لو فكيت المكينه ولقيت الخربان السبايك والعمود فقط او احدهما .. لكن لو لقيت مشاكل اخرى .. غير مكينه افضل لك ..

مع انك ماقلت وش وضع الضمان ..

[مغلي]

يبدوا انك طايح بورشه يتدربون
.
.
لذالك ... لاترجع لهم ... وريح راسك بمكينه من التشليح ... نظيفه ... والله يخلف على الخساير الي راحت