ما هي افضل انواع الغنم؟؟؟

[صقر البحيرات]

وعليكم السلام ورحمة الله وبركاته

بما إنك لم تدخل السوق ولا تعلم طبيعة السوق
أعطيك بعد النصائح ربما تحتاج إليه :
.. أولا: رابح إن شاء الله في تجارتك .. والله يفتحها في وجهك ( والتجارة شطارة )

ثانيا : تقوا الله .. والبحث عن المصداقية في البيع والشراء

ثالثا : تحتاج إلى دورة اسبوع تتفرج على سوق الاغنام .. وتعرف طرق البيع والشراء .. وكذلك تعرف رغبت المستهلكين

رابعا : إن بداية كل تجارة ( تأخذ بالقليل اليسير ) وتجرب نفسك وبعدها تبدأ في شراء زيادة من الاغنام

خامسا : جميع الاخوان كفوو ووفوو ... وأكيد أن كل شخص يعطيك ( ماوجد في بيئته وأنتشر فيها )
فأهل الشمال والشمال الشرقي ..( النعيم )
( نجد الوسطى ) النجد

( الجنوب والغربية ) الحري ..

وكل واحد له هوا .. شف أهل المنطقه اللي انت متواجد فيها ..ماهي رغبتهم ..!!

.. سادسا : ابعد عن الدين قدر الإماكن .. ( ادري انه مستحيل ) .. !! لكن حاول ( تدين)

سابعا : وهي تأكيد على النقطه الرابعه .. لأني رأيت كثير من الشباب يدخل السوق في إندفاع دون معرفه ولا تعقل

فيرفع السعر .. ويبدأ .. في زيادة الاسعار ويعطي في الراس أكبر من قيمته المعروفه ..(( أكبر من قيمة التفريد ))

وبالتالي يكون (( قد خسر هذه التجاره )) .. وانسحب ... أو تراكم عليه الدين عند المجازفه ..

ونسي أن الريال يجيب الريال .. وهكذا .. ولا هي قفزات من الريال إلى الالف

ثامنا : الهدوء عند الشراء وعدم الاستعجال وترك الحسد والغل ..(( الارزاق قسمها ربا العالمين ))

وأخيرا : عليك بالاستخاره ومشاورة كبار السن وأهل الحلال .. في الاسعار والكميات والسحب و ...إلخ

أتمنى أن تكون الصورة واضحه .. لك

ونحن بالخدمه . إذا أشكل عليك أمر ..


دعواتي لك بالتوفيق والربح الوفير ..

[عطيب ومايغيب]

الاخوان يقولون النعيم طعم

انا اقول النجديه وخاصه التي تعيش في البر وللعلم البدو لم يبقا احد منهم الى القليل

النجديه من نجد وشمال احلا طعم ولاتنسى البيئة لها دور

النعيم من الشمال والصمان وطالع برضه ماهي شينه

الله يوفقك

[ابو شدون]

عليك بالنجدي واذ تبي نجد طيبه مره مره رح لم الدلم عندهم شي يروع من حلاه وكبره وموفق خير حبي

[ساحووق]

لالاتعدا النجدي وووووووبس

[سفاري 9]

نصييييييييييحة من راعي حلال
النعيم زينة لاكن ماترفع راسها من المعلف
عليك بالحري اكله ممتاز وادنى ماسمنه وقل امراض
وفي الصحن يجملللللل
وانا من اهل نجد ومجربها لحمتها زينه بالحيل
وفي البيع مرغوبة

[رادار2009]

والله ما قصر صقر البحيرات .. كفى ووفى ...
واذا سالتني انا ايش افضل قلت الحري ...يا بعد قلبي عليه ..وعلى فكره ترى فيهن مزايين وفحول تصل 150 الف انتبه تشتري اي شي ..وبعدين تقول ابي اغير انتاجي ادرس الوضع زين وانصحك بالبحث بالنت اقل شي شهر مع النزول يوميا لحراج الاغنام ثم تتوكل وتستخير والله يوفقك بتجارتك وجعلها خيرا لك ولاهلك ومن معك ..

[دل البحار]

موضوعك جميل جميل والله يبارك لك في شريتك
ترشيحي لك
الحري النعيمي
النجدي ،
وتعتمد على المرعى اذا بترعيها يعني تاكل من حشائش الارض فكلها طيبه أي منها واذا بتأكلها من أكل البيت والخبز الناشف وغيره فأنصحك لاتشري ولاتربي خذ جاهز من الحلقه أنظف وأصرف وأوفر لك من التربيه لأنك بتخسر عليها وما يجي طعمها زين وتكثر فيها الامراض، الا في حالة أنه فيه لها معى بيجيلك لحمها طيب ومرقتها أطيب او تشري من الي ترعى من اهل الحلال،

ملحوظه:-
كي تعر فانها ترعى اذا حوافرها قصيره وطبيعيه فهي ترعى
أما اذا حوافرها طويله فمعناته تربية منازل وأنصحك لاتقرب منها

[محب الشبه]

العرب قطها في البر وتوكل على الله

[طالب المعرفه]

والنجد اطيب واكثر لحم وهذا معروف
ولكن موطن النجد في النفود التي تتعايش فيها
والله يرزقك في مالك ومال المسلمين
تحياااتي لك

[سندهم]

عليك بالنعيمي زي اللي بهالصورة
لا طلوع ولاشي والطيب يتاوم يعني بالسنة تجيب النعجة (أربعه)
وأحرص باللي لون رأسه أحمر +وخشة اطول.

[ذيب طي]

النجدي ماله مثيل يارجل , تجيك نآآهيه ورآآهيه
اما النعيمي شكله يغريك لكن لاسلخته غدا تيس , الا مارحم ربي . وجرب علق نعيمي ونجدي جنب بعض ورح تحكم بنفسك .

[داعي خير]

السلام عليكم
اسمع يا اخوك نصيحة راعي شبوك وسوق
اتكلم لك عن الرياض ونجد عموما
وفيه فرق اذا تريد التجارة أو تريد للاستهلاك الخاص
اذا لك ولبيتك وضيفك فعليك بالنجد وبالنسبة للطلوع (الخراج)تجي فيها كلها حتى النعيم والمعزى وصحيح انها في النجد اكثر لكن ترى اذا عزلت اللي فيها خراج ما يعدي الباقيات
واذا ودك بتجارة ذبايح فعليك بالنعيم
واذا تريد انتاج فعليك بالمعزى ثم بالنجد
وصاحبنا هذا انا اشهد انه نصحك

الاخ الكريم
بالنسبة للطعم
فاللحوم تتاثر بالعلف المقدم للحيوان وعمر الذبيحة والحالة الصحية والبنية من ( سمن وضعف )
اما بالنسبة للانتاج وكثرته فالمعزا والنجد في المقدمة حيث يصل الانتاج الى 3مواليد في بعض الحالات
الحبص المتاوم فيها اقل من النجد والمعزا
اما النعيم فقليل منها اللي تنجب اكثر من واحد
الامراض
تعتبر النعيم اكثرها تحملاً للامراض ثم المعزا ثم الحري واخيراً النجدي
بالتوفيق لك في مشروعك باذن الله

ولا تنسى ان تنويع العلف للحلال يعطي طعم رائع للحم
(برسيم - شعير - رودس - ذرة - علف مزارع) اذا تريد ان اللحم يكون احسن شي لازم تشكل لها طبعا اكثر شي الشعير والبرسيم والباقيات على خفيف

ونصيحة ابعد عن الوافي يعدم كبودها ويسود باللحم واللي يميز يعرف نكهته في اللحم

[السومر]

النعيمي ولا تشاور

[العواد 2]

أستغفر اللهَ كـثر مآ أذنـبـت
وأخ‘ـطِـيِـتْ .~

.............

[ابن عكاش]

الاخ الكريم

بالنسبة للطعم
فاللحوم تتاثر بالعلف المقدم للحيوان وعمر الذبيحة والحالة الصحية والبنية من ( سمن وضعف )
اما بالنسبة للانتاج وكثرته فالمعزا والنجد في المقدمة حيث يصل الانتاج الى 3مواليد في بعض الحالات
الحبص المتاوم فيها اقل من النجد والمعزا
اما النعيم فقليل منها اللي تنجب اكثر من واحد
الامراض
تعتبر النعيم اكثرها تحملاً للامراض ثم المعزا ثم الحري واخيراً النجدي
بالتوفيق لك في مشروعك باذن الله
,,,

كلام خبير عز الله جاب العلم