تخطيط لرحلة إلى النماص .... يأهل الخبرة .

[AHMED989]

السلام عليكم ورحمة الله وبركاته ... مساكم الله بالخير
بالصيفية إن شاء الله نويت أسافر للنماص الله يسهل بس أخوكم أول مرة يروح للجنوب ، إذا بالإمكان من أهل السفريات والخبرة يفيدونني عن :
* الطريق الأسهل وقليل المخاطر .
* الشرح بالتفصيل بالمسافات بالكيلو بين المدن والقرى التي سيتم المرور عليها .

*** علماً أنني من سكان القصيم ***
ولكم الشكر الجزيل .

[AHMED989]

معقولة 32 مشاهدة ولا فيه ولا رد واحد يجبر الخاطر .

[اسعاف1980]

بسم الله
حبر خاطر بالتوفيق انشاء الله
انا من الشرقيه كان ودى افيدك
اخوك ابواحمد

[AHMED989]

شكرا على مرورك اخوي اسعاف 1980

ما لي الا انتظر الله يجيب الفرج .

[AHMED989]

89 مشاهدة ولم يرد أحد ؟! ياللهووووول ؟!

[ابراهيم2009]

مساك الله بالخير
طبعاً النماص لها أكثر من طريق بس بما انك من أهل القصيم فية طريق مريح للجنوب الى هو تطلع من القصيم على طريق البجادية عفيف ظلم بعدها يجي مفرق الخرمة ورنية وبيشة يسار تروح يسار الى بيشة وبعدين يوجد لوحات الى خميس مشيط ومن ثم النماص الطريق اكثر من رائع الى خميس مشيط بس عيوبة بعض الغبار بعد ظلم
والطريق الاخر من الطايف الى النماص طبعاً طريق رائع مرره بين الجبال واحلى مشي معها من الطائف الصبح والخيار الاول والاخير لك رحلة موفقة أن شاء الله

ودي واحترامي

[AHMED989]

اشكرك أخوي إبراهيم2009 وما قصرت وفيت وكفيت .

[الهواوي_1]

السلام عليكم ....خذ الوصف من الرياض...تمسك طريق الحجاز كنك بتروح مكة....لك خيارين للوصول...بعد 580 كيلو بعد اخر محطة في ظلم تتجه يسار 70 كيلو للخرمة 150 كيلو رنية 150 كيلو بيشه وكل هالطريق انت في صحرا يعني الخط كف ولو انه غير مزدوج من بعد بيشه تتجه 100 كيلو توصل العلايه وهنا تعتبر وصلت الحجاز والبراد (الخط طلوع) النماص من العلايه حول 80........ الخيار الثاني تطلع من الطايف واحسب حول 450 كيلو بس ممتعه ومرهقه بنفس الوقت عشان اللفات والطلوع والنزول واذا السيارة جمس الله يعينك راح تمر اولا بالباحه 200 كيلو وبعدها بلجرشي وبعدها خثعم والعلايه بس انصحك بعمل جدول اذا بتكون رحال والديرة فيها مناظر حلوة للي يعرف واذا كنت تبي النماص انصحك تحجز سكن قبل تطلع وانا اعرف شاليهات مرتبه هناك ممكن اعطيك رقمهم لان عيب المنطقه عامة غلا الاسعار بالشقق ...والنماص صغير وحلو وبجنبه تنومة احلى بس اسال قبل تروح
واي خدمة ممكن افيدك

[AHMED989]

مشكور أخوي : الهواوي 1
عز الله انك ما قصرت ، ما نستغني عنك وعن خدماتك يالطيب .

[مسافر1]

هلا بك اخي الكريم
نعم يوجد أكثر من طريق
لكن الطريق من القصيم حتى ظلم هذا لا شك تعرفه
بعد ظلم يوجد عدة طرق أقربها هو
بعد ظلم مباشرة وهو أول كبري لوحة تشير إلى الراغية تسلك هذا المخرج وتذهب يسار طول الطريق 90كم
حتى الخرمة هنا يوجد طريقين
الأول تذهب على الخرمة تربة وتسلك هذا الطريق حتى تصل مفترق الطريق بمنتصفه بين الطائف والباحة تذهب يسار للباحة ثم تواصل مباشرة وهو الأفضل
الثاني من مفرق الخرمة تواصل حتى رنية ثم يأتي مفرق يسار بيشه ويمين سبت العليا تذهب يمين حتى تصل تقاطع طريق الباحة أبها تأخذ بسار وبعد 80كم تأتي النماص
يوجد طريق الطائف وهو أن تواصل بعد ظلم حتى الطائف ثم تسلك طريق الجنوب ويوجد كذلك طريقين طريق الجنوب والطريق السياحي وكلها توصل للباحة
لكن طريق الجنوب أفضل بكثير وأقرب أما لمن يريد أن يشاهد جميلة يسلك الطريق السياحي وهو بعد الطائف تقريباً 30كم يمين .
تلك هي الطريق الأماكن التي تستحق الزيارة سيكون في رد آخر بإذن الله

[AHMED989]

الله لا يهينك أخوي مسافر 1
كفيت ووفيت مشكور على هالشرح ، بيّض الله وجهك .

[alisabr]

اذا انت مو مستعجل وتمشي على مهلك رح للرياض ومنها مع الحوطه والافلاج والدواسر وتثليث وبعدها تطلع لك لوحات عليها المسافه المتبقيه على خميس مشيط ومنها لابها وريح في ابها يوم دعايه ولو عجبك الجو فهي اكثر مناطق سياحيه وحاول تاخذ معلومات وارقام دليل للاتصال على شقق وفنادق النماص قبل ماتوصل لها
لانها بتكون زحمه
طبعا من ابها للنماص مسافه معقوله فوق 140 كيلو لكن الافضل لها بالنهار تمشي الخط مناظره جميله وجو معتدل وبارد في الليل
الطريق من ابها للنماص مع طريق الطايف فيه لوحات ترشدك للطريق
لكن انصحك تبحث عن حجز للفنادق او الشقق قبل ماتوصل علشان ماتتعب في البحث

[محمد البخات]

أخي الكريم

السلام عليكم و رحمة الله و بركاته

المعذرة على التأخير لأنني لم أشاهد الموضوع الا اليوم .

الأخوة ما قصروا جزاهم الله خير

أقترح عليك أن ان لا تسلك طريق رنية لأن الطريق خطير لمن لا يعرفه لكثرة الجمال و قلة محطات الوقود و ورش السيارات في حال العطل لا قدر الله .

و بدلاً منه طريق الرياض الطائف خاصة لو كان لديك نية عمرة و الراحة في الطائف يوم او اكثر

فالطائف يمتاز بالفاكهة الصيفية و منتزهاته الجميلة مثل الشفا و الهدا

و اذا كان لديك اطفال سيجدون الملاهي بكثرة في الطائف و لديهم منتزه الحدبان بالشفا و القرية الخضراء (فلل بمسبح) و منتزه و ألعاب الكر المائية في الهدا غيرها الكثير .

بعدها طريق الطائف أبها الذي يمر بالباحة و بلجرشي و شمران و بلقرن و النماص و تنومه .

كل هذه المناطق بها الكثير من المنتزهات .

الطريق المقترح الثاني هو طريق الرياض وادي الدواسر خميس مشيط لكنه يفتقد للمناظر الجميلة بطول 1036 كم ثم من خميس مشيط لأبها 30 كم ثم من أبها للنماص 150 كم .

أتمنى لك من الله التوفيق و السلامة .

[AHMED989]

شكرا أخويALISABR
شكرا أخوي محمد البخات

والله ما قصرتو على هالمعلومات . لكم مني كل الشكر .

[اللؤلؤالمكنون]

مشكور أخوي : الهواوي 1


شاليهات
ممكن رقمهم
لك مني كل الشكر .