ܓ ܓܨ ██ كبسة هرفي في جبال طخفه ██ بحضور نجوم مكشات .. من أخوكم / الاطلسي ܓ ܓܨ

[ألأطلسي]

بسم الله الرحمن الرحيم

السلام عليكم ورحمة الله وبركاته

يسرني أن أعرض لكم من خلال هذا الموضوع

إحتفائيتي بنجوم مكشات الأعزاء قبل إسبوعين

أبو مشعل
قرناس صلا
الكايف1
مجرهد الليل وأخيه فارس
أبو فيصل 2009
خالد القنص
أبو عايد
الحاضر الغائب [ رعد الصحراء ]

أهلاً وسهلاً بمن حضر

مرحباً ترحيبة الليل بقدوم الصباح
أسفرت بقدومكم وإستهلت وأمطرت
ياهلا وإعداد مالبارق من الغرب لاح
تو ما الافراح تمت وشمسي نورت
قصر التعبير بالشعر ونرجو السماح
والقصيدهـ عن مشاعر لكم ماعبرت
لكن بقلبي مشاعر سعادهـ وإرتياح
وفرحتي فيكم ماقد على البال خطرت

بدايتنا

مساء الاربعاء .. المكان جبال سواج [ جنوب الرس ]

جلست في قفرٍ عن النزل داوي .. بين أمره وسواج شبيت ضوا
الاطف الهاجس بشغل القهاوي .. وأدرج نظر عيني وكيفي مسوا

تقهوينا قبل المغرب وعينا من الله خير

وهذي قهوتنا بعد صلاهـ المغرب وبعد أن إكتملوا الربع

وشبينا النار .. قدوع وزبدهـ .. ووجيه تفتح النفس وديبان وعقارب

آآآآآآآهـ يا أم جنيب مرت من جنبي

صورهـ للجبال

أمانه ماشكيت من الوله بين المحاني .. وماجزعت من الفراق وكبر غله
كانك تذكرني مع الخلوهـ ثواني .. أنت في بالي ترا العمر كله

أصبحنا وأصبح الملك لله . . وأنتقلنا الى جبال طخفه
وشبينا النار

إذا مريت في بالك تذكر يالغلا شيئين ..
محبٍ عاش لعيونك ومات لخاطر عيونك

جينا للثقيل وما أدراك ما الثقيل
قطعنا البصل

وهذا الراس حسحسناهـ

وهذي ذبيحتنا كما تشاهدون

هذي طبختنا والطريقه واضحه

يتبــــــــــــــــــــع .. << ~

[ألأطلسي]

بدون تعليق

هذا أبو مشعل يطعم الطلي [ زد عليه زد عليه ]

قطعنا السلطه .. تسلم الأيادي يا أبو مشعل

أضفنا المرق على الرز بعد ماشخلناهـ

وهذي خلطتنا [ كشنة الرز ]

وأضفناهـ على الرز

وتم تحريكه

كشنة البصل والزبيب

هذا الرز بعد ماكتمناهـ

حطينا الكشنه على الرز

يتبـــــــــــــــــع ..<<~

[ألأطلسي]

اللحمه إستوت

و خلص الرز

يقول تكفى ياقرناس فكني من أبو مشعل ذبحني [ آع كح آع كح ] وش هالحار ذا

وهذا مكاننا ..

الاماكن كلها مشتاقه لك .. والعيون اللي انرسم فيها خيالك
ماهو بس انا حبيبي .. الاماكن كلها مشاقه لك

هذا إهداء للغالي خبير التغطيات الميدانيه
في منتديات مكشات
الشريف سعود
[ أبو فهد ]

تستاهل أكثر يالغالي

اقلطوا الله يحيهم . . كل واحد ويجلس بالمكان اللي يناسبه

وختاماً ..

يعلم الله إن كل واحد من أعضاء مكشات له حق ..
وأي عضو يمر على ديرتي الرس يبشر بالسعد
الله يحييكم بدون ذكر أسماء .. واللي بيراسلني على الخاص الله يحيه

عين فراش وعين غطاء

و أتمنى ينال هذا التقرير على رضاكم

دمتم في حفظ الرحمن

أخوكم / أبو داحم ..

مفاجئة بانتظار الجميع
الرجوع الي الرد رقم
63
مع الكايف1

[عبدالله الجري]

ماشاء الله تبارك الله

دائماً مواضيعك كاملة الدسم يامال العافيه يابو عبد الرحمن

الموضوع يشدني كلما برقت بهالصورة



اعدام

عسى ماهو حق البارح

لاهنت على الطرح يالغالي

والحمد لله على السلامه

،،،،

ابوصالح

[قرناس صلا]

وعليكم السلام ورحمة وبركاته

حيا الله معزبنا وغالينا ابو عبد الرحمن

الكشته هذي تستاهل الشاعريه والابيات الحلوه منك

الله يكثر خيرك وانعم الله عليك يا صاحب الكرم والجود وما قصرت

دائما ما تجمعنا مع نجوم و شباب مكشات. هذا بحد ذاته

جميل ومكسب بارك الله فيك.

والحمد الله على السلامه من ام اجنيب وغيرها .. لكن رعاية الله ثم
جمال الموقع واصرار الشباب شجعنا على السهر والمبيت فى حضن ام جنيب

وكثر الله خيرك وجزاك الله خير , عرفتنا على رجال كفو وما قصرتوا جميعا بارك الله فيكم .

وهذي صورتين هديه دعما للموضوع

تقبل تحياتي ومودتي

مغليكم ابو عمر

كثر الله خير ك يا ابو داحم

فاتك الجح يا رعد

[مخاوي دابذريع]

والله وانعمت ,,,, سلمت يا بو دحيم وعليكم بالعافيه ....

[قوافي ( أم نهار )]

مبروك انجومنا وان شاء الله دوم
الصورجميله والسفره عامره بنعم الرحمن

بالهنا والعافيه
تحياتي
..قوافي..

[خالدالقنص]

الله يحيك ويبارك فيك ياابو داحم ويجزاك الجنه

انت راعي الاوله الله يجزاك الجنه

جمعتنا معه الوجيه الطيبه
ابو مشعل والكايف وابو عايد ومجرهد وفارس وابوفيصل

الله يجمعنا وياكم في جناته

والطلعه كانت من اجمل الطلعات ياابو داحم
لكن وين صور الهرفي الجبلي .

والجحححححححه .

قل امييين يابو داحم
الله يحرصك من كل شر ويحميك ويخلف عليك
ويحرم وجهك النار

مهما كتبنا لانوفيك حقك

[بوخليفه77]

وعليكم السلام ورحمة الله وبركاته

هلابك اخوي العزيز
الاطلسي
وهلا بكل من معك ونعم فيك وفيهم
ماقصرت بياض وجه
ونعم وسبع انعاااام
وشغل مرتب ومظبوط
وانشاء الله الزياره عن غريب
نشوفك ونشوف الوجيه الطيبه الله يجمعكم بجنته
تحياتي

[علي العساف]

يازين طخفه لاكسى جوّها الغيم=وذعذع عليك اعصير منها البرادي
وانت امتمركي شرقي الجرف واتهيم=بالمنظر اللي من جماله ينادي
في سهلةٍ عقب السيول المعاريم=ألين من السجّاد صنع الأيادي
لحظات لو ودّك تحبك المناظيم=في وصفها قصّرت دون المرادي
احسب لها من ست قبل المعاتيم=الى الفجر والجوّ رايق وهادي
خصٍّ وفي مجلسك نقوة شغاميم=ربعٍ غلاهم ساكنٍ بالفؤادي
لا جيتهم تلقى معزّه و تكريم=وكيفٍ مراكينه بجال الرمادي
وسوالفٍ يشفق عليها المضاريم=منقيةٍ لّك مثل تمر النقادي
سجّة عمر ولاّ الليالي مجاهيم=مرّه تسرّ ومرتينٍ نكادي
لو جيت ابذكر بالسنين المقاديم =أعدادهن مازوّدن بالعدادي
لكنّ تكياتي ورا روضة خريم=مازالت اتطّوّف علي برقادي
يوم الزهر بمفتّحات المكاميم=يغري بياضه ما طغى من سوادي
ما داجه الطرقي ولا حافه امقيم=بِكرٍ جماله كل الاحيان بادي
عنيت له والقلب شفقان وامحيم=حاديه من همّه على البعد حادي
لو طوّل المسرى ونام المناديم=لا جيتها بتقول مامرّ عادي
من قصرها راحت سواة الهذاريم=ولاّ السراب اللي زمى بالحمادي
راحت وخلّت لي بقايا تلاويم=أهيم معها اليوم في كل وادي
واقول ياربي عليك التراحيم=من سوجتي رجلي على غير قادي

[ع العمرو]

ابداع منقطع النظير الصورة من موضوع سابق لاخي الاطلسي امد الله في عمره على العمل الصالح.

[الشريف سعود]

ماشاء الله تبارك الله أستاذنا الحبيب الكريم الفاضل


الأطلسي

كفو وألف والنعم بجميع أعضاء الرحلة الكرام


المعزّب كريم والضيوف كرام


والله يابو داحم شوقتنا لهذه الخيمة الضاربة جذورها في التاريخ


بالكرم الحاتمي المشهور وشكل الأمور تتجه نحو هذه الخيمة


لا متابعة خرائط ولا مواقع طقس




متّعك الله بالصحة والعافية كما أمتعتنا بهذه الصور الجميلة والرفقة الطيّبه


أشكرك على الأهداء ومايجي منك إلا الطيّب يابوداحم


بوركت حفظك الله وآمل إبلاغ سلآمي لداحم وسعود الله يحفظهم

[الكايف 1]

وعليكم السلام ورحمة الله وبركاته
ماشاء الله تبارك الله

الاخ الغالي /الأطلسي

الله يخلف عليك ويستر عليك
يابوعبدالرحمن
دايم راعي الاوله
هالرحله فاتت ناس وفاتتهم الجحه بعد
الله يجمعنا وإياكم ووالدينا بجنات النعيم
طعم هالجمعه من غير عدد بآخر الجمجمه
الله يبارك بالجميع ويكتبه بميزان اعمالكم
بارك الله فيك ورحم الله والديك
ننتظر منكم المزيد
تقبل مروري

والسلام عليكم


...................

صور وأحداث اثنا الرحلة


اقتباس:
المشاركة الأصلية كتبت بواسطة انسانه؟

ماشاء الله تبارك الرحمن

جعله مداخيل العافيه
احس الخروف ذبحتوه وهويضحك

يعطيك الف عافيه وربي يبارك فيك..

بعد اذنك يابوعبدالرحمن
الاخت انسانه اجبرتن اقول أن الضحكه حقيقيه
افلحتي اختي بارك الله فيك
تمتلكين حاسه خارقه واليكم قصة الخروف الذي ذبح وهو يضحك
بعد مانزلنا عفشنا والخروف رأى الارض من الاعلى وبسم الله طب محيفرا
ويطلق لأرجله العنان بجبال طخفه والحق لاتلحق
وين يالأخوان الحقوا اوريكم الشغل هذي جبال مهيب علومكم
وبعد مطارده لمدة نصف ساعه بالسيارات والارجل
وإذا به ينظر الينا من الاعلى وهو يضحك الشاطر يلحق
ما دري ان فيه واحد من الشباب معوه خرازه وماشاء الله عليه
أذكروا الله عليه
من مسافه بعيده وهو يتفرج علينا ويضحححححك سدحه بطلقه وحده مع المذبح
الباقي بالصور والتعليق



الخروف بالاعلى تحت الصخره الكبيره وهو مذبوح بالخرازه شف بعد المسافه




وصله الصياد وكمل عليه بالسكين



إذا طاح الجمل كثرت سكاكينه




احد الشباب تزحلق وفكه الله الحمد لله على السلامه يا....................




يتفقد الاصابه برجله وجت على خير




تحامل على نفسه ومشى




اطلع عشق الدبل




باقي شوي وتاصل




وأخيراً وصل للأعلى ويشوف اصابته جت سليمه ولله الحمد




بعد النزول للأسفل




الشباب بعد الوصول للأسفل ومعهم الصيده




غسل من هالغدير وأنقض التعب
هذامالدي وهي زبدة الرحله لكل من سأل
ومنهم الاخ الغالي خالد القنص يسأل عن الخاروف الجبلي
ودمتم بخير
وأعتذر يابوداحم للمداخله
ابوصالح

[برق السيل]

ماشاء الله تبارك الله

الله الله على هذا الابداع وهذا الشغل السنع

طيب وكرم وعلوم رجال وصبة الفنجال وطبخة جابتلي الجنان

ابوداحم بيض الله وجهك على هذا التقرير وهذه الرحلة المكشاتية الجميلة

التي جمعت الرجال الي مثلك وشرواك ... ونعم بالحاظرين

وبلغ سلامي للجميع

اقول اذا جا الصيف ورني شطارتك في الطبخ راح يبداء الدوري الي مثل العام

تراني الان مسوي حلف مع ابوعبدالمجيد تعرف هو سمي ولا بد انه يدعمني وانا ادعمه

والمواضيع راح تكون هجمات مرتدة

وبعدين اشوفك تزين علاقاتك مع ابوفهد وش القصه

الله الله من حصل اصحابه نسى احبابه

وتسلملي على هيك شغل مرتب

ولك مني فائق تقديري واحترامي

محبك

برق السيل

[منتعش]

ما شاء الله .... تبارك الله
لله درك يابوعبدالرحمن طبخة حلوة وخلطات مميزة
تسلم يمينك على هذه الطريقة والصور الجميلة
وبصحبة رجال كرام يفتخر الشخص بمعرفتهم
وأهم شي خلطة الفلفل حقت البارحة
رعاك الله وبارك فيك وألف بين قلوبكم وجمعكم على خير .