السلام عليكم ورحمة الله وبركاته
حياكم ربي جميعاً اخواني واخواتي المكشاتيه
وياهلا ومرحبا بزوارنا
سافرت لفتره ليست طويله خارج سعوديتي الحبيبه وابتعدت عن مملكتي الغاليه ..
لكن سمح الوقت لي للأختلاط ببعض الشخصيات الهامه من السيدات من ضمن من تعرفت عليهم مساعدة مركز شرطه وكانت تقيم بالشارع المواجه لمنزلي..
شدها لي التقيد بالحجاب حتى لو وقفت بالشباك او الجلوس قليلاً بحديقة المنزل..
تعارفنا وقهويتها قهوتنا اللي ادمنتها وعشيتها يوم كبسه ولزقت لين صار شوي وتنام عندنا بيوم اجازتها..
بيوم عزمتني لنادي للرمايه وذهبت معها وبصراحه كنت مبسوطه ..
اكتشفت انها جايبتني تتفلسف توريني انها تجيد الرمايه بالمسدس حق الشرطه ابو 9 مللي على بالها انها فطينه والله لو اللغه زينه كان قلت لها على مين ياماما انتي تدربين عليه 4 سنين وكل ما صقعت حدى خطوط الدواير تقول عندكم الحريم يحملون سلاح؟؟
وانا أطالعها بسكوت ودي ابقسها بس ياغريب كن اديب..
وبعد ماقضت من العرض المنفرد قلت لها يسمحون لي اطخ ناضرت وبأستغراب تعرفين ؟؟قلت احكمي على النهايه!!
انا كنت احسب ان اللي يصوب على الوسط يعني النقطه الحمراء يصير تب اثره لا هذا عند العسكريه يصير جاب العيد
الممتاز اللي يجيبها على اول خط اسود بالدائره..
هي فهمتني هذا قبل ما أبدء..
سميت بالله وصوبت وجت بالخط الاسود المرتفع !! قالت :
لالا صدفه عيدي
عدتها وبرضه على الخط الاسود المرتفع!!
تحمست الشرطيه وودتني لساحه فسيحه تتبع النادي وهي مفروشه كلها نجيله على قولتها بتغير نوع السلاح وان صوبت صح لي مكافئه من النادي تعتبر مكافئه لأني زائر
وعطتني شوزن.. وفيه جهاز يطلق اطباق مثل اللي يسمونه عندنا الطبق الطائر ويلعبون فيه البزران
ونفس الشي جبته وقعدت تناظر انتي وين تعلمتي ؟؟
بغيت اقولها على بعارص سطحنا
قلت لها بالصحراء حقتنا
المكافئه كانت عباره عن الذهاب لمدة يوم واحد للغابه ومدتها من 6 صباحاً إلى 4 مساءً
وبيعطوني سلاح مسموح به لصيد الغزلان وهو ياخساره نسيت اسمه اللي يعرف اسمه يذكرني فيه لو سمحتو
وهو عباره عن بندق بس بسهم مهوب رصاص
والله ولا عمري شفته إلا بمجلات او أفلام
لكن المسأله تحدي وانا بنتك يالسعوديه مستحيل .. رحنا وغزلانهم مايبيلها بحث قدامك تناقز و فهمت وشلون استخدمه ..
وعقب ساعتين مشي لقيت لي غزاله وابي أصوب ما قدرت سبحان الله عقب بعارص غزلان انا بحلم ولا علم
دعيت بقلبي ياربي ياحبيبي انا عبدتك امتك ابنة امتك وعبدك اللهم انصرني وسميت وكبرت واطلقت الرمح او السهم وبرقبتها فرفشة وماتت..
بغيت اموت من فرحة الانتصار ما همتني الغزاله ورجعت بيتي ما ادري ويني من فرحة انتصاري ..
اللي يضحك بها الموضوع انها ما عاد جت بيتي ولا كنها تعرفني
بس مهوب مهم المهم اني انتصرت وصراحه كان شي عظيم بالنسبه لي..
تحياتي
اختكم
..قوافي..
15 نوفمبر 2015 - 16:514 نوفمبر 2015 - 21:27
 |
رد مع اقتباس
المشاركة الأصلية كتبت بواسطة فهد الهلالي
