تجربتي مع الجيب اللاند كروزر الـ 6 سلندر و 8 سلندر.

[بر وعزبة]

السلام عليكم ورحمة الله وبركاته

الصراحة والدافع لهذا الموضوع كثرة الكتابات حول الفرق بين 6 و8 سلندر
وكل يوم طالع لنا موضوع جديد وكل يوم واحد كاتب لنا ودي أشتري جيب
6 سلندر أو 8 سلندر ومحتار وش رايكم وش آخذ والصراحة أنا عشت نفس
التجربة يوم جيت أباخذ جيب موديل 2000م قبل ثلاث سنوات
وسألت أهل الشور الطيب ونصحوني بالـ 8 وبعدها بعت الـ 8 وشريت 6 سلندر
ومن خلال تجربتي للسته والثمانية راح ألخص بعض الأمور المهمة ..

وراح نبدأ بالفرق الأول وهو ( السعر )

الـ 6 سلندر أرخص من الـ 8 سلندر بحوالي 15 ألف ريال والصراحة بعد الاستعمال
وعند البيع ما في فرق كلهم ما شاء الله يمشون بسرعة وماهي من السيارات الي
تنشب بالحلق وتغص وأنت ما بعتها الله يذكر بالخير الباجيرو الي كان معي غصه
والله شهرين إلى ان بعته .

الفرق الثاني الراحة والقوة وصرفية البنزين )

نجد في الخطوط الـ8 سلندر ملك الجيوب في الراحة والقوة وشيخ ولا يوجد له مثيل
طبعاً مقارنة بالجيوب الي مثله مو يجي واحد ويقول اللكزس هذا شيء ثاني.
والصراحة أنا ماني راعي سرعة الـ 6 سلندر حلو مش بطال لكنه شوي مزعج
إذا تعديت 140ك .
وبحكم إني ماني راعي سفريات كثيرة يمكن تكون مره بالسنة أو مرتين الصراحة
فرق معي السته سلندر داخل الديرة بالخفة والراحة وصرفية البنزين أقل من
الـ 8 داخل الديرة فقط أما الخطوط فالـ 8 أحسن بكثير حوالي 20 ريال لطريق مكة
وإذا عرفنا سرعة الرياض لا تتعدى الـ 80 بسبب ساهر فالـ 6 سلندر أحسن .
أما العزم فالأكيد أن الـ 8 أقوى بكثير من الـ 6 لكن الواحد يفكر إذا ماكان راعي
سرعة يمشي على هونه .

الفرق الثالث : ( قطع الغيار )

الصراحة هذا الفرق الي يستاهل والي جرب مو مثل الي ما جرب الـ 8 سلندر
قطع غياره أغلى بكثير من الـ 6 سلندر وفرق واضح للعيان نبدأ
& بـ الفحمات فرق حوالي 80 ريال .
& الزيت ما في فرق .
& سير التايمن الـ 8 سلندر كل 100 ألف وسعره حوالي مع شغل اليد 1500ريال
أما الـ 6سلندر كل 300 ألف يتم تغيره .
& المساعدات الـ 6 سلندر أرخص بحوالي 50 ريال .
& الهوبات الـ 6 سلندر أرخص بحوالي 130 ريال .
& السيور بأنواعها الـ 6 سلندر أرخص بحوالي 20 ريال .
& عموما الـ 6 سلندر أقل خربات من الـ 8 والي جرب أكيد بيتكلم .

الفرق الرابع : ( الصبر والمطبات والمشي بالطرق الصحراوية والنفود )

الصراحة الـ 6 سلندر زين تحس إنه ددسن تكرفه ما يضره شيء عكس
الـ8 سلندر حساساته كثيرة ويخوف مو زي الـ 6 سلندر أقل حساسات
اما في البر عز الله الـ 8 ماله مثيل لكن الـ 6 مش بطال يجي منه ونفس المطب
ما فيه فرق يسن الـ 6 و الـ 8 سلندر .

وفي الختام الصراحة اتمنى أن أكون رجل محايد بين الـ 6 والـ 8 سلندر
ولا أكون رجال متعصب للـ 6 سلندر أو الـ 8 سلندر
لكن هذه تجربة أحببت أن أنقلها لكم
ولا تنسوني من دعائكم

[برق الشمال-]

بيض الله وجهك ومقارنة ممتازة جداااااااااااا تقبل مروري

[سيف الظفير]

كفيت ووفيت يالغالي ولكن بالنسبة لي انا جربت 6 سلندر موديل 2009 ممشاه اقل من 50.000 قير عادي

ما كمل 6 شهور الا وابيعه واشتري 2009 فل الفل 8 سلندر وكلها لاندكروزر طبعاً


والنية على بركة الله بـ 5.7 الجديد

جربته وكرهت موتري

[سليمان الربيعان]

بارك الله فيك وجزاك الله كل خير ما قصرت
ما شاء الله تبارك الله اسلوب الشرح رائع وجميل

[alkitbee]

انا لا اوافق في الراي حيث انه لا يوجد وجهه مقارنه بين 6 و 8 من ناحية صرف البنزين والقوه والتحمل والعزم. 8 سيلندر الماكينه تمشي 500000 بدون صرفيه زيت ملحوضه و ذا سافرت مسافات وخصوصا في الصيف بتلاحظ الحراره ثابته......
الصراحه هذا راي من واقع تجربه..

[درب الشمالي]

الله يعطيك العافية على المقارنة
بس ولو الـ 8 سلندر لحــــــــالة

[الجال الطويل]

تحياتي للجميع -----انا اقول لاتوجد مقارنه فرق بين الثرى والثريا على شي حصل معنا--مره كنا برحله الى المناطق الجبليه في سوريا ومعنا ال6وال8 والله يابو سته في بعض المرتفعات قعد يباحث بمكانه قلنا الله يستر مايجيبنا عكبسي وعطي الله ابو ثمان يتنقز تقل يمشي حدور فرق واضح ----ترو سيارتي ابو سته-- عن لااحد يحسب ---والسلام

[بر وعزبة]

انا لا اوافق في الراي حيث انه لا يوجد وجهه مقارنه بين 6 و 8 من ناحية صرف البنزين والقوه والتحمل والعزم. 8 سيلندر الماكينه تمشي 500000 بدون صرفيه زيت ملحوضه و ذا سافرت مسافات وخصوصا في الصيف بتلاحظ الحراره ثابته......
الصراحه هذا راي من واقع تجربه..

حبيبنا أنا ما أقول أن السته أفضل من الثمانية من ناحية القوة لكن من ناحية التحمل أختلف معك
الثمانية حساساته كثيره وتخرب على طول في الطرق الصحراوية
لأنه مهيئ لمدن وليس للصحراء والبر عكس GXR مهيئ للبر والصحراء ونفسه الهدد

[قرم العيال]

تجربه حلوه .. لكن الكلام هذا عن الجيل القديم .. اعلوم الجيل الجديد !!

[ABO AL-HESH]

الزين سعره فيه ... وبعد بالمرتفعات ما فيه مقارنه ابد بين 6 و 8 وايضا لا منه نطحك الهواء..

[abuslman88]

أخوي بارك الله فيك
مجرب 8 سلندر راحة وقلة صرفية وخوي ما شاء الله تبارك الله
6 سلندر زين لكن ثقيل بالحيل

[أبو غدي1432]

أنا عندي gxr موديل (99)

بصراحة في نظري كرسيدا

ياني أروح عليه وأجي وأطلع فيه أماكن ما تتخيلها .

بسم الله ما شاء الله بعدين خفيف مو ثقيل.

صح ال vxr أقوى منه.

بس بصراحة عاجبني

[أطلال نجد]

بارك الله فيك أخي بر وعزبة
عز الله أنك ما قصرت كفيت ووفيت

[عبادل المالكي]

مشكووووووووووووووووو اخوي على الموضوع الرائع

[قناص مزاجي]

اخي العزيز

ال 6 سلندر افضــــــل اذا كان قير عادي

وال 8 سلندر افضل اذا قير تماتيك

وبحكم تجربتي انا افضل القير العادي