بداية الله يوفقك للي فيه الخير... وأعتذر مقدماً عن الإطالة بالرد
بالنسبة للفورد سواء اكسبيدشن أو اكسبلورر ما فيه رفاهية مثل اليوكن أو التاهو وأنا أعتبره دفش وثقيل وعندنا في البيت أسميه (الغثيث) والاكسبديشن كبير جداً وبيلبش فيه السائق إذا ما كان محترف خصوصاً في المواقف والزحمة.
بالنسبة لليوكن/التاهو ففيه نوعين طويل وقصير الطويل اللي هو مثل السوبربان والقصير تجي شنطته أصغر وكلها 3 صفوف يعني يشيل ما بين 7 - 9 ركاب وهذا مناسب لكم. وفيه أيضاً القصير يجي منه دبل و عادي. وأعتقد أن العادي مناسب لكم أكثر لأن ما أتصور أنكم بتحتاجون تروحون البر وهو أرخص.
وأنا من واقع تجربة لي شخصياً مضافاً لها ردود فعل وآراء العائلة أفضل اليوكن أو التاهو لأنه أريح وأكثر تماسك. في الخط اليوكن مريح جداً أكثر من الفورد وعلى مستوى الرساوة (الاستقرار) أنا بنظري اليوكن أكثر رساوة وما يناقز مثل الاكسبديشن وياكل المطب بدون ما يشعر أحد.
أما مسألة الصيانة وما الصيانة أختي، فالموتر اللي يهتم فيه راعيه ما يضره شئ بإذن الله
كان عندي شفر تريل بليزر 2002 دبل وما خليت بخاطري شئ ولا ديره إلا ورحتها فيه سواء مدينة ولا بر (والله مشيت أكثر من 60 ألف قبل ما يكمل السنة الأولى عندي) ومع ذلك الموتر يوم بعته نظييييف لأبعد حد لأني مواضب على صيانته ومحافظ عليه وحتى اذا طلعت البر أطلع بحشمه وبدون خبال.
والحين عندي يوكن GT موديل 93 مخصصة للبر والمشاوير القصيرة داخل المدينة وما شاء الله عليه أخو الجديد وأسافر عليه أحياناً.
وبالنسبة للعائلة عندي يوكن 2011 سافرت عليه إلى مكه من الشرقية وكانت رحلة جداً جداً جداً ممتعة والحمد لله وارتحت فيه لأبعد حد ووصلت مكه الله يعمرها من الشرقية ورجعت للشرقية وأنا مرتاح ولاني مكسر مثل أيام الاكسبيديشن والفي اكس ار كنت أوصل متكسر
مع كل الاحترام والتقدير لمعجبي الاكسبيديشن والاكسبلورر، فإن نزول سعرها مقارنة بالجي ام سي هو الدافع الأكبر لشرائها.
عموماً، إذا لقيتي تاهو نظيف وعادي بدون دبل فسعره راح يكون أقل بحدود 15-20 ألف عن اليوكن بدبل من نفس الموديل.
وأي استفسار أو تفاصيل تحتاجين لها عن المزايا والمواصفات الدقيقة اذكريها هنا وإن شاء الله الجميع ما راح يقصر معك.
وأعتذر عن الإطالة.