المعزب000000 وقدْره الكاتم !!!!!

[النبهاني]

بسم الله الرحمن الرحيم

السلام عليكم ورحمة الله وبركاته

اخواني واخواتي المكشاتيه

الله يجعل اوقاتكم كلها هناء ومسرات

واليكم هذه السالفه متمنياً ان تحوز على رضاكم

--ْ

قبل كم سنه كنا ثلاث انفار اصحاب مع بعض دائما

وساكنين في احد المدن الكبيره من مدن مملكتنا الحبيبه طبعا اثنين متأهلين وثالثنا عزوبي

وفي يوم من الايام صاحبنا العزوبي عزمنا على الغدا وقلنا له تم والله يقويك

عقب صلاة الظهر جيناه بشقته طبعاً لحاله ساكن وقعدنا نتقهوى ونسولف والكاتم يدهر بالمطبخ

وشوي يقوم للمطبخ يبي ينكب الغدا 00تاخر علينا ونسمع القربعه00 رحنا للمطبخ

وش السالفه يابو فلان قال القدر انكسرت عروة طباقته

حاولنا به وجبنا زراديه ومفك ونقعد كلنا نغلغل هالقدر نبي طباقته تنفك وعجزنا عنه

قلنا له00 اتركه وابشر بالعوض ونروح لاي مطعم ونجيب منه غدا

قال ابد ما أتغدا الا من اللي بها القدر ان شاء الله

رفيقنا عنيد وراسه يابس وقم والقط القدر ولهلمه بهكالجريده وقال تخاوونن ولا تحترونن قلنا الا نخاويك لكن وين

قال بس امشو

ركبنا السياره وقعد يفتر بنا بهالشموس وهالحر

كانت الساعه حول ثنتين ونص

قلنا انت وين تبي وش تدور قال ابي بنشر00 هاه هاه وش تقول

قعدنا ناظر بعضنا وقمنا نضحك المهم لقينا محل البنشر ودخلنا عليه بقدرنا

طارة عيونه البنشري متهول

وبعذره الناس تدخل عليه بكفر وحنا بقدر

قال البنشري وش تبون قلنا نبيك تفك لنا طباقة هالقدر

ماقصر البنشري ثبت القدر واستسلم القدر لكن وشو عقبه وتجيه كم صقعه بالليور والمطرقه لين تخلخلت الطباقه قلنا بس00 بس00 يكفي

ونعطيه 5ريال حق بنشرالقدر

ونلهلمه بجريدته وننكس للشقه وندخل ونحط الغدا ونقعد ناكل ونكركر

ونلب الغدي ونخلي الصحن يلق ونلتفت للقدر القضيه ونستدنيه وناكل الحكاكه

من لذة غدا هالقدر اللي طعمه بالراس الى هالحين

وسلامتكم

محبكم النبهاني

[نجم000الشمال]

ما شاء الله اخوي النبهاني
مهابيط العافية ، اكيد بيكون لذيذ بعد هالتعب
بس ما احد سبقكم على ها الطريقة منعذر البنشري
وزين انه الظهر ما فية زباين ولا كان لقيناكم في اليو تيوب ههههههههههه

كل المحبة يالغالي.

[وردة النفل]

ههههههه
انا صار لي مثلكم ورميت القدر
يعطيك العافيه ع القصه الظريفه
وتستاهل

[ابو الشبرميات]

النبهاني مشكور على السالفة الطريفة

وما الومكم لو مانسيتوا طعم الغدا

تستاهل التقييم
***
3 نجوم

,,,

[أبوعبدالرحمن0]

وعليكم السـلام ورحمة الله وبركاته

أهــــــــلاً بحبيبنــا النبهـاني

منظــر القـدر عنـد البنشري مضحـك وطـريـف

مشكـــور على السالفة الممتعــة

[بن جعيثن]

قويه البنشر مره وحده هههههههههههههههههههه

[برق شرق]

و عليكم السلام و رحمة الله و بركاته ..

كفووو والله ..

اقول ما تعطيني رقم خويك العزوبي ؟؟!

ههههههههههههههههههههههههههه

يعجبني الاصرار اللي عنده ..

تستاهل أربع نجوم يا " النبهاني " ..



.. دمت في أمان الله ..

[قوافي ( أم نهار )]

حياك الله اخوي
سالفه زينه .اما فكرة البنشر صراحه غريبه واشوا اللي لقيتو حل لعشاكم
عاد عقب الحسر يجي طعم غير قد صار معي نفس الشي بعيد الضحيه وما عرفت افكه الابعد تعب وشاكوش ومفك ويالله ياله انفك
مشكور اخوي امتعتنا كعادتك بسواليفك
***
تحياتي.اختك
..قوافي..

[أبو رافع الظاعن]

مساك الله بالخير ...يا النبهاني

قصة رائعة ...

وسرد حلو ...

وعساكم أطعمتوا راع البنشر من بطن القدر ؟

كان يرغب القدور أكثر من الكفرات ...

تستاهل أربع نجوم ....

[فهد الهلالي]

هلابك يالنبهاني
قصه رائعه وسرد اجمل
تستاهل النجوم

على موضوعك
وانت ذكرتني بهذه السالفه هذا البيت
وحالي اللي مثل حال العزوبي ,,, عشاه حب ولا لقى من يسويه
ثلاث نجوم
تحياتي

[ع العمرو]

النبهاني مشكور على السالفة الطريفة

[ابو سمر]

والله ما لكم حق ،، وش هالبخل ؟ خابركم يا أهل النبهانية كرماء ..

الرجال عزوبي وحالته حالة وتطيعونه يعزمكم وأنتم متأهلين ؟ يمكن يبي يلمح لكم إنكم تعزمونه ..

الطبخ أحياناً متعة بس غسل الصحون والقدور قضية .. والله يعين العزوبية ..

وموفقين إن شاء الله ، وعسى الرجال تزوج بس ولا عزوبي إلى هالحين ..

[محمد الظاهري]

اولا الحمد لله ان الغا تمت على خير
هاذا اهم شي
وخويكم مبين انه ذكي
ولكن منظر القدر عند البنشر
منظر يحسد عليه
هههه
اشكرك على السرد
وننتظر القادم وخاااصه من المورثيه
تحياااتي لك
اخوك

[حمود 1430]

ماشاء الله تبارك الله

عليكم أنت وقدركم اللزقة

[النبهاني]

ما شاء الله اخوي النبهاني

مهابيط العافية ، اكيد بيكون لذيذ بعد هالتعب
بس ما احد سبقكم على ها الطريقة منعذر البنشري
وزين انه الظهر ما فية زباين ولا كان لقيناكم في اليو تيوب ههههههههههه

كل المحبة يالغالي.

هلا وغلا بخوي نجم الشمال
الله يعافيك اي والله بعذره لوتفاجاء يوم شاف القدر
والحمد لله هاكالوقت مافيه لايوتيوب ولا غيره
الله يسعد ايامك ويحفظك
وشكرا على مرورك