( تصويت ) أفضل طريقة لحماية واجهه السيارة بالخطوط الطويلة والسفر ؟

[azd]

السلام عليكم
انا كثير الطلعات والسفر
من تجاربى
البرقع جيد لكن مع الوقت يرتخى وياثر لون السياره
عملت طريقه للربقع لكى مايرخا اخذت قماش النايلون كانه منخل لعمل المضلات وتضليل الزراعه الذى ياتى منه الوان وخاصه الاخضر وياتى ببعض الاوان وسيارتى ذهبى واخترت البيج ويكون على الاضائه بلاستك شفاف والقماش اسمه هركلين ويفضل صناعه استرالى استعملته سنوات ولايتحرك بسبب انه مثل المنخل وياتى القماش بانواع يدخل الهواء من 30 الى80 بالمائه وشكرا

[الحميدي123]

اكيد انا مع البرقع و لا تفكه الا لما ترجع ديرتك خله مشدود زين لان اذا ارتخى يخرب البويه
مع الهواء و افضل شي امش خلف سياره ثانيه تكون تمشي قدامك يستحسن تكون كبيره

المشكله مو في الواجهه المشكله في القزاز الامامي يتحفر ما ادري وش اعزله به و الاكتاف
و في بعض السيارات المرايا

[Al Rasee]

انا ضد حماية الوجه وغيرة لسبب انه لايوجد اي داعي .. خشتي اولى

[ALBDRANE]

وين القاه لاهنت

عند ساكو 59 ريال

[ارفع مقامك]

اتوقع النايلون الجديد

[عويض الوابصي]

فلم الشفاف افضل شيء

[أطلال نجد]

السلام عليكم ..
من عرفت استعمال السيارات وأنا ولله الحمد أسافر من دون البرقع ولا الفيري ولا الفلم الشفاف ولا شفت من الله إلا كل خير .
أرى يا أخوان أكثر ما يؤثر على مقدمة السيارة أثناء السفر هي ( السرعة ) خصوصاً وقت الصيف والسافي القوي .
إذا حسيت أن الجو غير صافي هدي السرعة إلى 100 - 110 وما راح تتأثر البوية بإذن الله مهما كانت قوة الرياح والرملة من واقع تجربة .
تحياتي

[عطارد]

سيارتك جديده او قديمه ما يهم المهم حماية مقدمة السياره من الرمل والعجاج اثناء السفر .
ما تسوى عليك لا راحت مقدمة السياره من العجاج تضطر تغير الشبك والانوار والكشافات وتصبغ المقدمه وشف كم التكلفه والعطله ويمكن ما يكون الشغل اللي تبيه يا اخوي ريح نفسك وركب الفلم الشفاف واحرص يكون من النوعيه الممتازه والتركيب عند متخصصين واطلب انك تشوف بعض السيارات اللي توهم مركبين لها فلم شفاف ودقق في تفاصيل التركيب

[ابو ياسر11]

البرقع مايفيد بالمرة يحك البدي عليك ويخرب البويا
التغبيرة أو الصابون ابتعد عنها تخرب الانوار وتعدم الواجهية كلها خصوصاً مع العجاج (السافي)
التلبيس الشفاف احسن شيء
أو بدون شيء افضل

[abnbtota]

السلام عليكم
بالنسبة لي علبه الفيري واسفنجه ضروري بالسيارة للطوارئ واذا وصلت غسيل على طول

لكن لفت نظري الردود لمواد حديثة واحببت ان اظيف هذا الرابط لللمزيد

[راعي التكسي]

طيب لو الواحد حط فلم الحماية الشفاف

وبعدين يحط فوقه البرقع

يصير إذا فلت البرقع مايعدم البودي

[azd]

السلام عليكم ..
من عرفت استعمال السيارات وأنا ولله الحمد أسافر من دون البرقع ولا الفيري ولا الفلم الشفاف ولا شفت من الله إلا كل خير .
أرى يا أخوان أكثر ما يؤثر على مقدمة السيارة أثناء السفر هي ( السرعة ) خصوصاً وقت الصيف والسافي القوي .
إذا حسيت أن الجو غير صافي هدي السرعة إلى 100 - 110 وما راح تتأثر البوية بإذن الله مهما كانت قوة الرياح والرملة من واقع تجربة .
تحياتي

شكرا على التعليق

[باترول.]

مشكلة فلم العازل مع الوقت يصير لونه اصفر بس خذلك بخاخ رش وامش

[أطلال نجد]

شكرا على التعليق

لا شكر على واجب

[الصارم 444]

على حسب الحالة

فكثير السفريات البرقع ممتاز

اما قليل السفريات فيري

اما فلم الحماية فلا ادري عنه لكن اشوفه على بعض السيارات قالب لونه اصفر من الشمس