السلام عليكم ورحمه الله وبركاته
اهلاً وسهلا بكم اخواني الاعضاء
**********
اجدد لقائي بكم ومن خلال مسرتكم
وقصصكم الموروثيه الشعبيه الجميله
اخواني انتم تعلمون بان القصص مشهوره ومعروفه للبعض
ومنها الغير مشهور
هاذي القصه روها ناصر بن مسيمير
وروها الراوي منديل بن فهيد
ويقال بان منديل بن فهيد قد
روها على الراويه المعروف والكبير عبدالرحمن بن ابي حياء رحمه الله
ولا اطيل عليكم واترككم مع هاذه القصه
وهي قصة مثل
يا دليم قله هلا
كان فيه احد شيوخ الشعلان
ويقال انه سطام بن شعلان
وسطام عنده صبي واسمه دليم
كان ابن شعلان كل عصريه يفرشون له الخدم قدام البيت
فرش كبيره
وبعدها يتجمعون عنزه من كل كبيره وصغيره
شعارها وفطاحلتها ومسولفينها كلهم يجتمعون
وكان من عادات ابن شعلان اذا سلم عليه احد
ما يرد عليه السلام
يقول يا دليم قله هلا ودليم واقف عند راس الشيخ
وكل ما جاء احد في المجلس ووقف على حد الفراش
يقول سلام عليك يا الشيخ
يقول الشيخ :يادليم قله هلا
ويقول ادليم : يقول الشيخ هلا هلا هلا ثلاث مرات
وكل ماجاء واحد وسلام قال ابن شعلان يا دليم قله هلا
ويقول دليم هلا هلا هلا
لين يصك المجلس وعاد يبدا المسؤلف يسؤلف لين تغير الشمس
وهاذي عادتهم
وكان فيه احد من قبيلة مطير العريقه يقال انه زعل على ربعه
وقال انا ابي اجاور ابن شعلان
وراح ويوم وصل
وفي مجلس الشيخ كاعاده
جاء المطيري
وقال :سلام عليك يالشيخ
قال الشيخ : يا دليم قله هلا
قال دليم يقول الشيخ هلا هلا هلا
كئن صارت في خاطر الرجال
ويقول انا يقولي هلا بس كذا ما يقوم يسلم علي وما يصافحني
عاد قال المطيري ابيات قدام ابن شعلان
ياليتني جنبت خازن سلامه ....اما هزعت عنه يسار والا من يمين
من ذاق ركب الكور عاف المسامه.... ولا نكره الدوشان عقب الشعالين
يوم سمع ابن شعلان القصيده
قال اصبر اصبر انا يوم اقول يا دليم قله هلا على عيال ديرتي واعرفهم
وانا ما دريت انك غريب والعذر والسموحه يا رجال
قال المطيري اقول
ياليتني جنبت خازن سلامه ....اما هزعت عنه يسار والا من يمين
من ذاق ركب الكور عاف المسامه.... ولا نكره الدوشان عقب الشعالين
هاذا الي قاله الراوي ابيتين فقط
ويقال البعض انه بن دعسان الدويش الشاعر المعروف
وهاذ لم يذكره الراوي
ولا اعلم ما اسمه هاذا الرجل
وهاذا المثل يطلق على الي يسولف له شي بعيد
يقول يوه يا دليم قله هلا
يعني من بعيد
*******************
اخواني
ارجو ان ما قدمته يحوز لكم
وهاذا القصه من لسان الراوي إلى مكشات
ويقال انها قصه طويله وابياتها كثيره
لكن هاذا ما سرده لكم
ارجو ان ما قدمه يكون فيه الشي من المفيد
واعذروني اذا قد حصل اي قصور
هاذا ما استطعت ان اقصه لكم
وانتظروني في سالفه اجمل بأذ الله
وتقبلو تحيات
مــــــــحـــــبــــــكــــم
مــــــحـــــمــــــد الــــــــظـــاهــــــــري
رد مع اقتباس
المشاركة الأصلية كتبت بواسطة قوافي
