*~*, رابطة مـــــلاك الجموس الحوض ,*~* الجزء الثاني

[m7md_7000]

السلام عليكم ورحمة الله وبركاته

يا أخوان أنا بإذن الله تعالى بأشتري سلفرادو غماره ونص

والهدف أني أريح سيارتي وأستخدم الوانيت أستخدام يومي

وأخترت غماره ونص لأن الغماره ما يكفي أهلي والغمارتين كبير وشكله مو حلو

والصراحه ببالي أفكر وتعديلات ودي أني أظبطه بعد ما أشتريه

والتعديلات هي :-
1- أصبغه لون مطفي
2- أركب له جنوط وكفرات عريضه ( GT)على ما أظن.
3- أرفعه رفعه بسيطه يعطيه هيبه ورزه.
4- غالباً راح أغير لونه إلى رمادي مطفي ( ما أدري ليش عاجبني هاللون)

أول شيء وش رايكم بالتعديلات؟ ووش تنصحوني فيه؟

ثاني شيء أنا حصلت لي سيارتين سلفرادو على قد فلوسي ولكنهم يختلفون بالموصفات واللون

السلفرادو الأول : موديله 2006 / الواجهيه الجديده / أمريكي / لونه أحمر / ماكينة فورتك 6000 / دبل أرضي / قزاز عادي / السعر تقريبا 38 ألف

السلفرادو الثاني : موديله 2002 / أمريكي / لونه كحلي / ماكينة 5300 Z71/ دبل زر / رفارف ( فخوذ ) / السعر تقريبا 28 ألف


أي السيارتين تنصحوني فيها بالتعديلات أللي ودي أضيفها عليه ؟
خاصه أني متخوف من شكل الجنوط العريضه والترفيع على المفخذ!

علما بأن إذا شريت الأحمر راح أخليه مثل لونه بس أصبغه مطفي والجنوط تصير سوداء
أما الكحلي غالبا راح أغيره الى الرمادي

ارجوا الأفادة والنصح

ولكم الشكر والتقدير

[فرّاس]

السلام عليكم ورحمة الله وبركاته ..

اسعد الله اوقاتكم بكل خير .


الحقيقة أنا بحاجة للنصح والمشورة من " أصحاب التجربة " في الجموس سييرا ..

وخلال هذا الاسبوع ان شاء الله راح اقرر شراء احدى هذه الفئتين .. فبماذا تنصوحوني ؟؟

1ـ سييرا 2500 HD

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــ


2- سييرا 1500 z71

انا لاأسئل عن سعر السيارة ومواصفاتها لأني اخذت صوره كامله عن الاسعار والمواصفات ..

أنا سؤالي عن ( الإستخدام والأفضلية ) .. وبالحقيقة أنا أميل لــ سييرا 2500HD نظراً لأرتفاعها وقوتها وطول الصندوق .. إلى أن نصحني أحد الاخوان بالبعد عن هذه السيارة تحديداً لأنها على حسب كلامه مزعجه على الخطوط الطويله وثقيله جداً داخل المدينة وكثرة اعطال الدفرنس والدبل ... المهم انه خلاني اترددّ كثيراً !

فقلت مالي إلا سؤال اخواني المكشاتيين اهل التجربة والخبرة .. وبأذن الله القى عندكم الراي السديد والمشورة الطيبة . وجزاكم الله كل خير

[جوالأجواد]

اخوي انا معي 1500 موديل 2010 واروح فيه كثير للبر خصوصا الدهناء والصمان فوجدت فيه القوه والراااااحه سواء في الطرق او الصحراء او قلة استهلاك البانزين وقوة المكيف في الصيف
علما اني شريته بناء علي نصائح اهل هذا المنتدي فوجدت ما قالوه حقا اطال الله اعمارهم
اما 2500 فما جربته

[باترول 1987]

اخوي عليك بالـ hd قوه وراحه

[GMC4Ever]

يا هلا ومرحبا بك أخوي فرّاس وحياك الله... والله يوفقك للي فيه الخير.

أخوي بالنسبة لل 1500 z71 فهو ممتاز جداً وخفيف وذرب في البر والمدينة واتوقع الناس ترغبه أكثر من 2500.

أما بالنسبة لل 2500 HD فهو أيضاً جبار وقوي ويتحمل حمل أكثر بكل تأكيد من الـ 1500 لكن ما أتوقع أنه راح يكون بذرابة وراحة الـ 1500.

أنا أشوف أكثر الناس المستخدمين للبر والمدينة يشترون 1500 واللي طلعاتهم للبر واجد ياخذون فئة z71. أما بالنسبة للـ 2500 فأغلب ما أشوفه مع الشركات والمؤسسات وبالطبع فيه من يستخدمه استخدام شخصي.

وبالتوفيق إن شاء الله تعالى،،،

[* ابو باسل *]

يا هلا ومرحبا بك أخوي فرّاس وحياك الله... والله يوفقك للي فيه الخير.

أخوي بالنسبة لل 1500 z71 فهو ممتاز جداً وخفيف وذرب في البر والمدينة واتوقع الناس ترغبه أكثر من 2500.

أما بالنسبة لل 2500 HD فهو أيضاً جبار وقوي ويتحمل حمل أكثر بكل تأكيد من الـ 1500 لكن ما أتوقع أنه راح يكون بذرابة وراحة الـ 1500.

أنا أشوف أكثر الناس المستخدمين للبر والمدينة يشترون 1500 واللي طلعاتهم للبر واجد ياخذون فئة z71. أما بالنسبة للـ 2500 فأغلب ما أشوفه مع الشركات والمؤسسات وبالطبع فيه من يستخدمه استخدام شخصي.

وبالتوفيق إن شاء الله تعالى،،،

الزيد على كلام اخي بالنسبه للاتش دي يستعمل اكثر شي لناس الي تحمل احمال ثقيله وتجر عربات ثقيله خلف السياره ان كنت من هذه الفئه فهو مناسب لك اما ان كنت تبي مدينه وبر وكرف بعد بس بدون حمل ثقيل جدا وبدون سحب مقطورات كبيرة تصل الى 5 طن وزنها فا الاف والخمس ممتاز ومناسب وتغلب قوته في خفته لان الاتش دي يغلب ثقله قوته ويستخدم للسحب والتحميل اكثر .
وتوكل على الله واشتر وصدقني بعد ماتشتري وتسوق وتجرب بتقول ليتني مادفنت نفسي طول هالسنين مع سياره غيرك ابد طبعا تقولها للجمس وصدقني لو بعته بترجع تشتري الموديل الجديد منه لانه ادمان واقولها وانا صادق .

[* ابو باسل *]

يا اخوان تعرفونها من رقم الشاصي

النظر لثامن خانه من اليسار لرقم الشاص :

بالنسبه لموديلات 2007 وما فوق فهي على النحو الاتي

اذا كان ثامن خانه هي حرف :

c : يشير هذا الحرف الى ان قوة المكينه 4800 سي سي <4.8 لتر >

j : يشير هذا الحرف الى ان قوة المكينه هي 5300 سي سي < 5.3 لتر >

k :يشير هذا الحرف الى ان قوة المكينه هي 6000 سي سي < 6 لتر >

------------------------------------------------------


بالنسبه لموديلات 2000 الى 2006 فهو لايخرج عن اربعة احرف وهي

T : يشير هذا الحرف الى ان قوة المكينه هي 5300 سي سي <5.3 لتر >

U : يشير هذا الحرف الى ان قوة المكينه هي 6000 سي سي <6.0 لتر >

G : يشير هذا الحرف الى ان قوة المكينه هي 8100 سي سي <8.1 لتر >

v : يشير هذا الحرف الى ان قوة المكينه هي 4800 سي سي <4.8 لتر >


-------------------------------------------------------

اما موديلات 1996 الى 1999 فهي على النحو الاتي :

وكالعاده الخانه الثامنه من اليسار هي المطلوبه

R : يشير الى ان قوة المحرك 5700 سي سي <5.7 لتر >

J : يشير الى ان قوة المحرك 7400 سي سي <7.4 لتر > <--- الشهير بـ 454 فورتيك


-------------------------------------------------------

اما موديلات 1992 الى 1995 فهي على النحو الاتي :

ايضا الخانه الثامنه من اليسار هي المطلوبه . وهي على النحو الاتي :

K : يشير الى ان قوة المحرك 5700 سي سي <5.7 لتر >

N : يشير الى ان قوة المحرك 7400 سي سي < 7.4 لتر >

-------------------------------------------------------

اما موديلات ماقبل 1992 فلاسف ليس لدي عنها اي معلومه . وساقوم بالبحث عنها
ان شالله


وارجوا اني وصلت المعلومه لك

ولا تنسى التقييم ....!

طيب انا رقم الشاصي
1GTPKVE08AZ235XXX

سييرا 2010 Z71 دبل 5.3

وثآمن خانة Zero
؟؟؟؟
يعني كيف؟

كلام اخي مكشاتي صحيح واعتقد فيه خطأ في الترتيب او القراءه للمواصفات اخي جميس دينالي حتى انا عندي رقم الهيلك يختلف عن الي انت كاتبه في الخانه الثامنه وموتري 5300 زد 71 2011فل الفل بالنسبه للجمس السيرا .

[* ابو باسل *]

السلام عليكم ورحمة الله وبركاته


اخواني انا ابي اشتري لي جمس صحن ابي قطع 10 لان استخدامي يومي

شرايكم بسييرا او سلفرادوا دبل

هل تنصحوني فيه او لا لان خبري بهم اول مايمدحون قطع 10 مادري ليه

وابي من موديل 2000 الى 2006 او 2007

شرايكم فيها من نحاية خرابات او اعطال وهل يفرق الدبل اذا كان ازرار هل اعطاله كثيرة ياليت تكفون تفيدوني

وكم تكون اسعارها تكفون الله يجزاكم خير

افضل شي نزل في الجموس من 2010 لان القير اختلف وبعض المواصفات والقير اختلف من 4 سرعات الى 6 سرعات وهنا اصبح للجمس قوة اكثر .

[ابراهيم الريس]

اخي العزيز واحد من الإخوان شراه قبل 15 يوم وعدله عند الصمعاني مساعدات امامية وغير الريش الخلفية وعدل الكمبيوتر ممتاز ولاتسأل طبعاً اتحدث عن 1500 z71

[مسير عليهم]

تجربتي لـ 2500

في المدينة متعب وثقيل شوي لكن بالخط والبر موتر يطرب القلب

وبخصوص معلومه الدفرنس والدبل انه يخرب في فئة 2500 اشوفها غلط لأنه مصمم للاعمال الشاقة ويتحمل اكثر

تخيل قبل كم شهر كنت على طريق الملك فهد امشيي فوق 100والولد الله يصلحه حاط يده على فرار الدبل ويلعب فيه يعني يشغل الدبل ويفصله سواها اكثر من مره بحركه سريعه والحمدلله ماتضرر

[سليمان الربيعان]

اشوف ان انتشاره بين الناس سبب كافي لنجاحه واثبات وجوده
1500 اشوف انه كافي وافي بعد ام 2500 لتحميل الثقيل والسحب المقطورات
عندي استفسار كم سرندل 1500 و2500
تقبل تحياتي...

[m.a.t]

عندي استفسار كم سرندل 1500 و2500
تقبل تحياتي...

هلا اخوي على خبري كلها 8 سرندل

[الجنرال98]

السلام عليكم ورحمة الله وبركاته
شباب انا عندي جمس سيرا بكب موديل 91، توني عامله اصلاحات كاملة للعظلات غيرت كل شي تعبان لو نص عمر، وغيرت ركب اربع وجلد مقصات واذرعه وعكوس وركبت كفرات ومساعدات اربع فحمات بريك.

المهم احس ان الكلتش اذا ضغطته كامل وعشقت بالنمره بس ارفع رجلى بسيط ويمشي الموتر، مو من مثل الموديلات الجديده الى النص ويمشي لان كان عندي 98 كان يمشي لمن ارفع الى النص او اقل شوي، واوقات مايرضي يعشق القير لمن ادبل كلتش كذا مره، وفي شي مهم اذا عشقت وجا الموتر يمشي لازم يعمل هزه بالموتر ويمشي وهاكذا. انا اتوقع من الكلتش قبل اتسرع قلت ابي اتاكد قبل اغير كلتش ودزق وفحمه وعلب. اتمنى الجميع يفيدني.

[ss33ss18]

السلام عليكم فيه غمارتين يكون شاص عادي موب طويل
بس انا بفيد صاحب الاعلان ان شاء الله ولاتهونون
انا مجرب الاثنين 1500 وال2500
بسم الله نبدا في1500
اقتصادي اكثر من ال2500
واخف في البيع والمشتراء
واريح فالاستخدام اليومي يعني اذا مامعك الى موتر واحد انصحك في ال1500 اوذف من ال2500
لان ال2500يكون 6 نمر

عيوب ال1500
يطول العمر والسلامه اذا انت راعي تحميل وخطوط بيبهذلك لانه ينزل من ورا واذا نزل يرتفع وجهه واذا ارتفع وجهه دخل الهواء من تحت والهواء يرفع الموتر من قدام ويبدى بالحذف وترديد النمر كثرتها تضر القير طبعااا


اما ال2500
ماشاء الله ماعليه كلام
صبور وعزم وقوه تحمل فالرمل والخطوط لاكن فالاستخدام اليومي مايصلح بثر فالمواقف والزحام ال1500ازين منه في الاماكن الضيقه
لاكن ال2500 ماشاء الله مهما تحمل فيه ماينزل ابد ولاتحس انك محمل شي
انا معاي 2500 غمارتين موديل2009 حملت فيه دباب كان ام 800 وزنه اضن موب اقل من1700كيلو بالقليل ماشاء الله مانزل ولا تحس انك مركب شي ورا
وامشي عليه 130 ولاتحس ولا فيه ترديد نمر ولا حذفه ابد راسي اكثر من يومه فاضي ما شاء الله


الله يدلك على الخير يااخوي ويرزقك الموتر اللي تتمناه


باختصار نصيحتي لك اذا انت راعي بر توصل مكانك وتكشت وبيقى موتر واحد للدوامات وللزحام ولاستخدامك اليومي انا انصحك في ال 1500
والباب والبابين والباب ونص كلها واحد على حسب الاشخاص اللي بيركبون


موفق خير يااخوي

[مسير عليهم]

مايبي لها شور

توكل على الله وخذه واهم شي الدبل