رابطة ملاك اسد الصحراء ( الاكسبدشن4×4 / 2×4)الجزء الثاني

[ابو الفهد111]

ممكن من زمان راعيه ماغير زيته ويوم غيرته انت تغير صوت المكينه؟

شكراً اخوي ( يكفيني نظره)... على تجاوبك
لكن مااتوقع .... لأن الصوت مرتفع زي ( الحنه)

نبغى المزيد
من آراء الخبراء لاهنتم ...

[ابو الفهد111]

ممكن من زمان راعيه ماغير زيته ويوم غيرته انت تغير صوت المكينه؟

شكرا اخوي ( يكفيني نظرة )على تجاوبكـــ
لكن مااعتقد لان الصوت صار اعلى من اول زي .. الحننننننه

نبغى المزيد من آراء الخبراء ..... لاهنتم

[ابو الفهد111]

اخواني أعضاء الرابطة

السلام عليكم ورحمة الله وبركاته
اتشرف أن أنظم الى هذه الرابطة الرائعة والمفيدة
وعندي إستفسار

شريت اكسبيدشن قبل اسبوعين خليجي 2007 ايدي باور ماشي حول التسعين الف كيلو
والموتر لله الحمد والمنه نظيف
ووديته للوكالة للتشييك وتغيير الزيوت
وتم تغيير الزيوت والبواجي وكلف فوق 1500
المهم لاحظت ان صوت المكينة مرتفع عن أول
عند ماتدعس على الدواسة وتحرك السيارة تسمع الصوت وعلى تغييرات القير تسمع الصوت يزيد .
علما أن الانبير بين الصفر والواحد
وضغط الزيت مرتفع عن النص الى ثلاث ارباع المؤشر
مع العلم ان السيارة كان صوتها هادئ قبل مااوديها الوكالة ولاتسمع الصوت المرتفع للمكينة

استفساري

هل تغيير الزيت أو نوعه يسبب ارتفاع الصوت أو يؤثر على السيارة

ورأيكم أيش السبب ؟؟؟؟

وفقكم الله جميعاً ... وشكراً لكم مقدماً

نبغى المزيد من آراء الخبراء .... لاهنتم ...

[يكفيني نظرة]

نبغى المزيد من آراء الخبراء .... لاهنتم ...

شيك على تماتيك المروحه..

[عود رمث]

السلام عليكم

مساكم ربي بكل خير وعافية

يوم جانا المطر قبل اسبوعين .. الله يعيده علينا وعليكم .. فتحت قزازة الراكب على الآخر ، يوم بغيت أرفعها عيت تحرك ... رحت للبيت وغطيتها بسفرة نايلون عن المطر وبعد ما وقف حاولت بكل طريقة أن أرفع القزازة لكن بدون فائدة .. قلت ( ما بدهاش زندك ولا مت ) فكيت ديكور الباب والعازل الداخلي ورفعتها بالكهرب مع رفعها بيدي من تحت وشوي شوي حتى أخذت مكانها ... رجعت الديكور وخليتها مغلقة لمدة يومين أو ثلاثة ... حتى نشفت تماما ..

الآن ماشية تمام التمام ..

المشكلة إذا جاء مطر تبي ترجع علتها ... فهل لها حل ؟؟؟

ما زلت انتظر .....

[يكفيني نظرة]

ما زلت انتظر .....

اذا كان رفعها باليد مع الكهرب ثقيل فممكن يبي لها تشحيم المجرى الحديد..
اما اذا كان الكهرب لايعمل بعد المطر ممكن التماس..

[طبح]

ياخوان الكاميرا الخلفية صارت ماتشتغل لما اعشق الرويس - 2007 ايديبور

كانت تشتغل قبل ادخل الموتر للصيانة بالبيان وقالوا لي ماللبرمجة حقت المكينة علاقة بتوقف الكاميرا يمكن اعدادت الشاشة تبي مراجعة او تعديل .

احد يعرف ؟

فائدة للجميع : تغيير زيت وفلتر القير - قيمة اجور - عند البيان بمية وخمسين - البيان اللي بشارع المعارض .انا ضحك علي ترايستار وقال بـ 800

[عود رمث]

اذا كان رفعها باليد مع الكهرب ثقيل فممكن يبي لها تشحيم المجرى الحديد..
اما اذا كان الكهرب لايعمل بعد المطر ممكن التماس..

جمل الله حالك

نعم رفعها مع الكهرب ثقيل ... والكهرب يعمل ولله الحمد ..

طيب كيف أشحم المجرى يعني يبي فك ديكور الباب ؟ والشحم نوع خاص أو أي نوع ؟

وفقك الله

[يكفيني نظرة]

جمل الله حالك

نعم رفعها مع الكهرب ثقيل ... والكهرب يعمل ولله الحمد ..

طيب كيف أشحم المجرى يعني يبي فك ديكور الباب ؟ والشحم نوع خاص أو أي نوع ؟

وفقك الله

هلاا بك اخوي عود رمث..
فك الديكور حق الباب وشف الحديده اللي تمشي عليها البكره وشحمها وشحم البكره بعد..
الشحم خذ هذا الرابط وشف شرح الاخ اصيل حجازي هو ابخص مني بالانواع الزينه:
http://www.mekshat.com/vb/showthread.php?t=438239

[شادي النهار]

السلام عليكم ورحمة الله وبركاته
اخواني اعضاء الرابطه اطال الله بأعماركم في طاعته وفعل الخير لكل مسلم .

اليوم جايب معي لكم مشكله في موتري ويمكن تكون في أي موتر ثاني .
أولاً : سيارتي موديل 2006 إيدي باور دبل
ثانياً : إذا دخلت الرمله وأنا مشغل الدبل وعند المحلات الشديديه يكتم الموتر وتحس إنه يبي يغرز وانا ضاغط الله يكرمكم على البانزين تحس انه ما يعطي نمبره ثانيه وعند ما يجي يوقف يعطي نمره قويه ويمشي .
هل هذي عاديه أو مشكله في السيارة ؟
وإذا فيه مشكله علموني وين القا الورشة والميكانيكي والكهربائي الزين والي سعره معقول علماً بأني من سكان شرق الرياض ؟
ثالثاً : أنا ابغير الزيت والصوفه والفلتر للقير وين أفضل مكان غير الوكالة ؟
رابعاً : عندي صوت في الماكينة إذا هي كانت بارده وشغلتها وبعد ما أحميها وعند ما أمشي في صوت خرفشه هل هي من بكرة سير مروحة الماكينه أو سير الماكينه الداخلي .
خامساً : هل لازم اغير سير الماكينه الداخلي وعند كم أغيره .
سادساً : هل الدفرنش يغير زيته كل فتره أو ما يغير أبد وإذا هو يغير كل كم ؟
أنا عارف أني طولة وكثرة بالأسئلة بس أنت إن شاء الله صدوركم واسعة وإن شاء الله تفيدوني وتفيدون كل واحد صارت له مثل هذه المشاكل .
ودمتم بخير .

[يكفيني نظرة]

السلام عليكم ورحمة الله وبركاته
اخواني اعضاء الرابطه اطال الله بأعماركم في طاعته وفعل الخير لكل مسلم .

اليوم جايب معي لكم مشكله في موتري ويمكن تكون في أي موتر ثاني .
أولاً : سيارتي موديل 2006 إيدي باور دبل
الله يعطيك خيره ويكفيك شره.
ثانياً : إذا دخلت الرمله وأنا مشغل الدبل وعند المحلات الشديديه يكتم الموتر وتحس إنه يبي يغرز وانا ضاغط الله يكرمكم على البانزين تحس انه ما يعطي نمبره ثانيه وعند ما يجي يوقف يعطي نمره قويه ويمشي .
معي 2008 هذي طريقته ولذلك اعشق القير بالنفود وارد نمره يدوياً..
هل هذي عاديه أو مشكله في السيارة ؟
يبدو لي انها عادية..
وإذا فيه مشكله علموني وين القا الورشة والميكانيكي والكهربائي الزين والي سعره معقول علماً بأني من سكان شرق الرياض ؟
ان شاء الله ان مافيه مشكله..
ثالثاً : أنا ابغير الزيت والصوفه والفلتر للقير وين أفضل مكان غير الوكالة ؟
انا من سكان شرق الرياض وابوصف لك ورشه بصناعية النسيم معاملها ومغيَر زيت قير موتري اكسبديشن 2008 عنده وغيرت سير خارجي وبواجي ومصفي بنزين وفرامل خلفيه وشغله ممتاز( صناعية النسيم تدخل يمين من طريق سعد بن عبدالرحمن ووجهك شرق قبل الغامدي لقطع الغيار وتتعدى التقاطع اللي بزاويته يمينك الضحيان واول لفه يمين لف معها بيصير قدامك T شف الورشه على حجاجك الايسر اسمها جميله فيها ياسين هو الفني )
رابعاً : عندي صوت في الماكينة إذا هي كانت بارده وشغلتها وبعد ما أحميها وعند ما أمشي في صوت خرفشه هل هي من بكرة سير مروحة الماكينه أو سير الماكينه الداخلي .
احتمال يكون من الصاجه تحت قير السياره كان عندي صوت يقرقع وزاد ومع الوقت يزود واكتشفت انه من صاجة حماية القير جايها ضربه وانعفتت وتطقطق وفكيتها بالبيت وعدلتها وراح الصوت..
خامساً : هل لازم اغير سير الماكينه الداخلي وعند كم أغيره .
والله انا مثلك ودي اعرف بس المشكله لازم تروح الوكاله وتسأل الفني والةكاله حجز مواعيد وشغله..
سادساً : هل الدفرنش يغير زيته كل فتره أو ما يغير أبد وإذا هو يغير كل كم ؟
اي نعم يغير كل 80 الف او 100 الف كيلو ولتغييره طريقه خاصه على مراحل اول شي تفضي ربع زيت الدفرنش وتحط الزيت الجديد وتمشي به 7 الاف كيلو ثم تفضي نصه بعد 7 الاف وتزوده جديد ثم تمشي به 3 الاف وتفضي شي بسيط وتحط دواء الحنه ( عشان مايون الدفرنش) وهذه الطريقه اخذتها من اخي اصيل حجازي في هذا المنتدى في خيمة اعطال السيارات.
أنا عارف أني طولت وكثرت بالأسئلة بس أنت إن شاء الله صدوركم واسعة وإن شاء الله تفيدوني وتفيدون كل واحد صارت له مثل هذه المشاكل .
الله يحييك وبالعكس يعجبني اللي مفتح مخه ويهتم بسيارته مهوب مقفل واذا راح فتره على السياره معه لقيته يأشر بالشارع وموتره خربان..
ودمتم بخير .

وانت بخير وحياك الله والله يبارك لك في موترك..

[jasser]

السلام عليكم ورحمة الله

وفقكم الله وبارك جهودكم ومتابعتكم
ونعتذر من الجميع لعدم التواصل الدائم

شكرا لكم ودمتم بالف خير

[عباااس]

السلام عليكم
اكسبدشن 2010
ودي اركب عليه شاشة DVD للأطفال بالسفر
وقالي راعي الزينة انها ماتركب لعدم وجود مكان مناسب بسقف السيارة لأن السقف مليان مواصير التكييف ويخاف يشقها بالدريل
وش رايكم افضل مكان لتركيب الشاشة
وبعد وش تنصوحني فيه من اكسسوارات
وسلامتكم

[نواف 94]

السلام عليكم
اكسبدشن 2010
ودي اركب عليه شاشة DVD للأطفال بالسفر
وقالي راعي الزينة انها ماتركب لعدم وجود مكان مناسب بسقف السيارة لأن السقف مليان مواصير التكييف ويخاف يشقها بالدريل
وش رايكم افضل مكان لتركيب الشاشة
وبعد وش تنصوحني فيه من اكسسوارات
وسلامتكم

اخوي وشرايك تشتري لهم اباد واخبر فيه قطعة تثبت الايباد
1- منها توفر حق السديات
2- منها تحمل لهم العاب يلعب فيها اكثر من واحد

[ابو محمد ....]

اخوي وشرايك تشتري لهم اباد واخبر فيه قطعة تثبت الايباد
1- منها توفر حق السديات
2- منها تحمل لهم العاب يلعب فيها اكثر من واحد

قبل فتره نصحت الشباب انهم يشيلو فكرة الدي في دي .....إزعاج
وفكرة الجلاكسي تاب والاي باد روووووووعة