رابطة ملاك التريل البليزر + الأنفوي ( التريلفوي ) -‏ الجزء الثاني

[trailblazer99]

السلام عليكم ورحمة الله وبركاتة

عيدكم مبارك وكل عام وانتم بخير أخواني اعضاء منتديات مكشات بعد الزحمه ,, << خخ

المهم يآخوان نخش في الموضوع دووغري
طآل عمركم انا عندي مشكلة في حساس الحراره الخارجي ,, يعطي قرائة أوب صحيحه ,, معلق على 10 درجات ,,
ولمن أودي السيارة على المغسله وأخلص من غسيلها وأشغل السيارة يعطيني سالب 35- ,, ويجيني تحذير يطلع بالشاشه تنبيه إمكانية حصول جليد << وانا ابقق عيوني واقول وشسالفه خخخخخخ ,, جليد في السعودية وفي هالحر والصيف عاد هذي قوية ,,

المهم طآل عمركم بحثت عن مشكلة هالحساس ,, لانهم هم مسبب مشكلة ثانيه وهو أنه التكيف لمن اشغله يصير حآر !! وهذي مشكلة بعد !! ,, ومايضبط التكيف ويصير بآآرد الا لمن يرجع الى حالتة الطبيعية اللي هي 10 درجآت ,

فـ بحثت هنا بالمنتدى وحصلت الحل أنه بتغيير حساس الحراره الخارجي ,,
ورقم القطعه هو 25775833

المهم انا من سكآن الأحساء ورحت كل محلات قطع الغيار الامريكي ,, المغلوت والعلوان وبآوازير وكل محلات القطع الغيار ماحصلت عندهم هالقطعه !!

وكل واحد يسألني متأكد من هالرقم اقول لهم ايه متآكد , وانا بصراحه مش متأكد لاني ما اعرف شكلها لاني شفت واحد من الاعضاء حاط الصورة هذي ويقول انه هذي القطعة المطلوبة !!








8
8
فـ انا طشفت وانا ابحث عنها وماحصلتها !!


فـ بحثت عنها في موقع أمازون الامريكي وحصلت القطعة بنفس الرقم اللي هو : 25775833 ولكن مآني متأكد منها !! فقررت أني أسدح لكم الصور من الموقع عشان تأكدون لي !

وهذي صورت القطعة من الموقع :



وهذا رابط القطعة في موقع أمازون الإمريكي :
http://www.amazon.com/ACDelco-25775833-Ambient-Temperature-Assembly/dp/B0031I9ZJK

فـ المطلوب قطع الشك باليقين ,,

هل القطعه أعلاه فعلاًُ هي الحساس الحراره الخارجية ,, حق البليزر ولآآ لآآ ؟؟

لآنو خلاص قررت أني أتهور واشتريها وأجيب مندوبهآ من برا وغير كذا سعرها بـ 3 دولآر وكمن سنت << الله يديم الرخص ,, والله يعينآ على النصب اللي صآير عندنا في السعودية ,,

إنتظر ردكم وعذراً على الإطالة ,

أخوكم
أمير الرياضة ,

صباح الخير
أخوي أنا شريت الحساس ب20 ريال من الجميح قبل 7 شهور تقريبا
المشكله كل محل يطلع بسعر ؟ أوتومول الدمام قال لي 90 ريال
تحياتي

[123google]

اخوي قبل تغيير حساس الحراره الخارجيه سوله رست ممكن انه شغال لكن يحتاج رست

و طريقة تسويله رست :

من لوحة التحكم بالتكييف تضغط الثلاث ازرار مع بعض في نفس الوقت
MODE
FRONT
REAR

واذا ماأعطاك القرائه الصحيحه وقتها يحتاج تغيير

[امير الرياضه]

anwar-1
شكراً لك عزيزي ,, على التفآعل مع مشكلتي ,, ومع الاسف رحت أكثر من محل وخبرته عن المشكلة قبل لا أعطية رقمها ويقول لي جيب رقم القطعة ولمن جبت لهم رقم القطعة قال لي من وين جايب الرقم خخخخخخخخخخخخخخ رديت عليه يْ عزيزيْ جايبه من المريخ مثلاً ,,

المهم في الأخير قال لي , مش متوفرة عندنآ ,,

الآخ العزيز / بليزر فيراني
والله تهورت ,, وطلبتها ,, ولكن راح أكتب لكم سالفة صارت معآآي بخصوص القطعة بعد الرد هذا لكن حبيت اشكرك على التفاعل مع مشكلتي ,,


الأخ الكريم / trailblazer99
مسسساء النور والورد المنثور ,, ايه والله صآآدق كل واحد يطلع لك بسعر مع إنه مايتعدى سعرها الـ 11 ريال ,,

المهم الوكآآد اني طآل عمرك ,, طلبتها من النت ,, واليوم الصباح ,, مريت عند قطع غيار وكالة الجميع بالأحساء ,,
وحصلتها بسسسعر موطبيعي وأرخص من الموقع الإمريكي وبصراحه أستغربت وقلت يآآولد إشترها الله يديم الرخصصص ,, واتهور وأشتريها هههههههههه مع اني طلبت من الموقع الأمريكي ,, ولكن ماتوقعت الوكالة بتكون مررا رخيصة لهدرجة ,,

المهم طآل عمرك حصلتها في الوكالة بـ، 13 ريال وسوا لي خصم الشيف وطلع سعرها بـ 11 ريال ,,

وإن شاء الله راح إنزل الفآتورة وتقرير مصور عن الشراء والقطعة في مشاركتي اللي راح تجي بعد لحظظظـآت , وشكراًُ لك عزيزي ع التفآعل ,


أإهلأإ وسهلأإ عزيزي , 123google
شكراً لك ع الشرح والطريقة ولكن انا شفت هذا الشرح وهو أنك تسوي رست ,, وبالفعل سويت رستآر ,, وطلع لي قراءة مش صحيحه ,, حيث أنه تحول فجأة الى سالب خمسة وثلاثين -35 ,

وطلع لي تنبيه في الكمبيوتر ,, تحذير تحذير تحذير إمكانية حصول جليد ,, خخخخخخخخخخخ ,

فـ اللي صار إني غيرته ,, وحطيت الجديد وقلت يالله خلني أجرب مرا ثانيه اسوي ريست بالحساس الجديد وبالفعل ضبط معآي وطلع عندي في البداية 50 , بعدين سويت ريست مرا ثانية طلع عندي 51 ,, المهم جلست إتمشى بالسيارة الين ضبط معآي الى 48 ,,

والتكيف بصراحه مشاء الله تبارك الله صار مثل الثلج ,, وبآآرد أبرد من ذا قبل , وماتوقعت أنه قطعة زغنطوطة بيكون لها تأثير في التكيف لكن سبحآآن الله تغيير الوضع وصار التكيف بآآرد , ولله الحمد ,

إنتظروا تقريري في ردي القادم

وشكراً لكل من سآآهم وتفآعل معآآي بخصوص مشكلة هذا الحسآس الأرعن ,

تحياتي لكم
Swimer9

[امير الرياضه]

بسم الله الرحمن الرحيم .. وبة نستعين ,
السلام عليكم ورحمة الله وبركآتة .. أما بعد ,

إخواني .. السآدة أعضاء رابطة ملاك التريل بليزر , مرحباً وسهلاً فيكم فرداً فرداً كلن بأسمة ههههه ,,

طآل عمركم راح أتكلم لكم عن مشكلة واجهتني في سيارتي التريل بليزر مديل 2002 LTZ وسبق واني وضحتها في ردي السابق .,

وهي مشكلة في حساس الحراره الخارجي ,, يعطي قرائة مش صحيحه ,, وطول الوقت معلق على 10 درجات ,, بينمآ الحرارة الخارجية تكون احياناً فوق الـ 30 أو 40 أو 57 خخخخخ .,


المهم هذي صورة لتوضيح المشكلة : لآحظوا الصورة معلق على 10 درجآت !!





وكممممآآن لجيت أودي السيارة على المغسله وأخلص من غسيلها وأشغل السيارة يعطيني سالب 39- ,,

لآآحظوا الصورة : يعني معقولة درجة الحرارة بتكون 39 تحت الصفر خخخخخخخ !!




وكممممآآن يجيني تحذير يطلع بالشاشه تنبيه إمكانية حصول جليد<< وانا بكل إستغراب اقول وشسالفه خخخخخخ ,, عآآد تخيل جليد في هالحر والرطوبة وعز والصيف خخخ ,, وكمآآن لمن اشغل التكيف يكون حآآآر مرررأ ,, وهذي مشكلة بصراحه سببت لي بعض الإحباط في زمن الحر والصيف !!

وهذي صورة للتنبية اللي جنني : امكانيه حصول جليد !! << خخخخخخخخ




المهم طآل عمركم تم البحث والتحري ,, عن سبب هذي المشكلة ,, وبعد عنآآآ من البحث أتضح إن سبب هذي المشكلة هو: حساس الحرارة الخارجية خربان وغير كذا له إتصال أو له علاقة في التكيف سوا بشكل مباشر أو غير مباشر وله تأثير ع برودة مكيف السيارة ,,

فـ بحثت هنا بالمنتدى وحصلت الحل أنه لآبد من تغيير حساس الحراره الخارجي عشان تنحل مشكلتي ,,

ورقم قطعه المطلوبة للحساس هي: 25775833


فـ اللي حصل إني رحت كل محلات قطع الغيار الامريكي الموجودة في مدينة الأحساء ,, أبتدائاً من المغلوت والعلوان وبآوازير وكل محلات القطع الغيار ماحصلت عندهم هالقطعه !!

فقررت أني أتهور وأجيب هذي القطعة من الولايات المتحدة الإمريكية ,, دخلت على موقع أمازون الإمريكي الشهير ,,

وبحثت عن القطعة بنفس الرقم الوكآد اني حصلتها بـ 3 دولأإرات وكمن سنت , << يآزين الرخص !!

بينمآ تبآع عند بعض محلات قطع الغيار عندنا في السعودية بـ 40 أو 90 ريال << هذا اللي ينقآل له النصب والإحتيال ضد الموإطن المسكين الضعيف ,, وكل محل يلعب بالسعر على كيف كيفة ,,



وهذي صورت القطعة من موقع أمازون :



وهذا رابط القطعة في موقع أمازون الإمريكي :
http://www.amazon.com/ACDelco-25775833-Ambient-Temperature-Assembly/dp/B0031I9ZJK


المهم بعد ما تأكد انه هذي القطعة المطلوبة ,, قمت بشرائها بنجآح !! وتم خصم المبلغ من بطاقتي الفيزا ,,


فـ اللي حصل أنه اليوم ,, الصباح كان عندي كم مشوار ,,
المهم وانا بالطريق مريت عند الشارع الملكي اللي هو عندنا بالاحساء مشهور بقطع الغيار ,, وقفت عند أوتوستآر ,, << وقلت في نفسي خلني أساله عن القطعة يمكن موجوده عنده ,

عطيته الرقم ,, وطقة بالكمبيوتر ,, وقال لي القطعة موجودة !! وانا فرحت قلت كفووو عز الله إنك شنب خخخخ ,, بس يافرحة ماتمت قال لي هذي القطعة موجودة في الجبيل وسعرها يتراوح من 50 الى 60 ريال ,, << خخخخخخخخ ياشيخ النصب بس !!

قلت له زين يالله مع السلامة ,,


المهم وكالة الجميع بالأحساء جنب أوتو ستآر وكنت نآوي أمش لاني غاسل يدي من الوكالة ولكن قلت في نفسي يآولد خلني اشوفة وأتأكد من القطعة وهم أتأكد من رقمها اذا صحيح أو لآآ ,,

ولكن المصيبة أأني حصلتها بسسسعر موطبيعي وأرخص من الموقع الإمريكي وبصراحه أستغربت وقلت يآآولد ليكون مش هي أو قطعة ثاانية ,, ولكن لمن جابها لي وفتحها ,, طلعت نفس القطعة اللي طلبتها من موقع أمازون الامريكي ,,

فقررت إني أتهور وإشتريها الله يديم الرخصصص ,, والحمدالله تهورت وشريتها هههههههههه مع اني طلبت من الموقع الأمريكي ,, ولكن ماتوقعت الوكالة بتكون مررا رخيصة لهدرجة ,,

المهم طآل عمركم حصلتها في الوكالة بـ، 13 ريال وبعد حب الخشوم والعلوم الزينة عمل لي خصم الشيف وخصم ريآلين ,, وطلع سعرها بـ 11 ريال فقط ,,

بصراحه شي يدعو الى الإستغراب أنك تحصلها في الوكالة بـ 11 ريال بينما تبآع في المحلات التجارية ,, بـ 50 أو 60 أو 90 ريال !!

أتركم مع صور الفآتورة والقطعة :




صورة ثآآنية :












هذا الحساس ولآحظوا عليه الرقم الموقر :25775833 ,,
















المهم فتحت كبوت السيارة ,, وجلست أبحث عن هالحساس وحصلته في وجهي الوكاد اني أشيل القديم ,, وأحط مكانة الجديد ,, ومرا تركيبة سهل ,, مايستغرغ 30 ثآآنية ,,

وهذي صور بعد ماركبتة على السيارة :











وبعد التركيب رحت على طول شغلت السيارة وطلع عندي 10 درجآت وقلت في نفسي وشسالفة ,, ولكن تذكرت أنه ,, لآآبد من عمل برمجة أو ريستآآر ,, عشان يتعرف أو يتبرمج الحساس الخارجي مع السيارة ,,

وطريقة عمل البرمجة هي كالتالي :





والحمممدالله بعد البرمجة ضبط معآآي ^_^

لآحظوا الصورة كيف صار بالبداية عطاني 52 درجة ,,





بعدين !! بعد التمشي والترزز بالسيارة عطاني قرائة صحيحة لدرجة الحرارة الخارجية حيث أنه درجة الحرارة في الأحساء كانت :





والأهم من كل ذا الكلآم والهرج ,, أنه التكيف بصراحه مشاء الله تبارك الله صار مثل الثلج ,, وبآآرد أبرد من ذا قبل ,

وماتوقعت أنه قطعة زغنطوطة بهالحجم بيكون لها تأثير في برودة التكيف ,, لكن سبحآآن الله ضبط الوضع وصار التكيف بآآرد , وحلينا مشكلة الـ 10 درجات ,

وأنتظروني يومياً كل يوم راح أجي فيذا وأعطيكم درجات الحرارة الخارجية ههههههههههههه ..,


وفي الختآم
أرجو المعذرة على الكلآم الكثير والهرج الزايد ,, وأتمنى من كل قلبي ان يكون هذا التقرير نآل على أعجابكم

وأحب أشكر كلن من الأعضاء [anwar-1 وبليزر فيراني وtrailblazer99 و123google ] على تفاعلهم مع مشكلتي ,


خآآرج النص :>( وهالله هالله بالتقيم ترا والله تعبت , وانا اصور وأكتب , وأهرج ولكن يستأهلون اعضاء وزوار رابطة ملآك التريل بليزر )


مع خالص أحترامي وتقديري

أخوكم
أمير الرياضة .,

[123google]

كفيت ووفيت اخوي أمير الرياضة .,

[the fact]

السلام عليكم يا اخوان خرب كمبرسور المكيف للبليزر 2003 امريكي LS وما لقيته لا في الوكاله ولا المحلات فمن يدلني على الحل اذا فيه امكانيه تركيب كمبرسور سيارات اخرى او محل يبيعه بالشرقية ودمتم بود

[امير الرياضه]

كفيت ووفيت اخوي أمير الرياضة .,

الله يعزك ويسلمك يْ غآآلي ,

[امير الرياضه]

السلام عليكم يا اخوان خرب كمبرسور المكيف للبليزر 2003 امريكي LS وما لقيته لا في الوكاله ولا المحلات فمن يدلني على الحل اذا فيه امكانيه تركيب كمبرسور سيارات اخرى او محل يبيعه بالشرقية ودمتم بود

عليكم السلام ورحمة الله وبركآتة ,

طآل عمممرك في انا قبل شهر ضرب علي الكومبرسور , واخذت لي واحد مستعمل من مؤسسة ليان , في الاحساء بـ 1000 ريال مع التركيب والتنظيف والفريون ,,

ولكن ما اعرف اذا لهم فرع بالدمام أو لآآ لآنه عندهم فروع في الرياض وفي جدة والاحساء .

وهذا رقمهم دق عليه وأسأله :
0508882254


وكمان موجود كومبرسور ,, حق موديل 2006 , ومافي مشكلة يركب على 2003 في تشاليح الدمام عند الهافمون ,

سعره بـ 600 ريال ,

هذا رقم أبو عادل صاحب التشليح :
0503834300

وبالتوفيق وان شاء الله الاعضاء يفيدونك .,

تحياتي لك
أمير الرياضة .,

[the fact]

يعطيك الف عافية اخوي امير الرياضة

[خنشلية]

كل عام وانتم بخير. ودي اسال بس مدري بتجاوبون علي ولا لا لاني سالت كذا مره وطناش . ماعلينا. المشكله بليزر 2005 والتكييف مره يطلع دفعه حلو ومره ضعيف ومره يكتم. وديته امس قام الكهربائي يطقطق تحت الدرج يقول نظفت الثيرومستات؟؟؟ المهم المكيف مازال يرجع بقوه وشوي يضعف . ودي اعرف كلامه صحيح؟ يعني انظف الثلاجه ممكن يكون منها السبب؟ لان بداية المشكله فتحت الهوايه على سرعه ومن بعدها المكيف ماهوب طيب
شكرااااا

[anwar-1]

كل عام وانتم بخير. ودي اسال بس مدري بتجاوبون علي ولا لا لاني سالت كذا مره وطناش . ماعلينا. المشكله بليزر 2005 والتكييف مره يطلع دفعه حلو ومره ضعيف ومره يكتم. وديته امس قام الكهربائي يطقطق تحت الدرج يقول نظفت الثيرومستات؟؟؟ المهم المكيف مازال يرجع بقوه وشوي يضعف . ودي اعرف كلامه صحيح؟ يعني انظف الثلاجه ممكن يكون منها السبب؟ لان بداية المشكله فتحت الهوايه على سرعه ومن بعدها المكيف ماهوب طيب
شكرااااا

هنا لا يوجد خبراء فقط من صارت عنده نفس المشكله او عنده معرفه بها يرد عليك
وان شاء الله حد يفيدك من الاخوان

[Eng De Fa]

السلام عليكم ..
يا اخواني بالرابطة ... انا عندي تريل بليزر 2005 EXT ... و الريموت مش راضي يبرمج معي حاولت بالطريقة المعروفة بس ما في فايدة ... ببرمج بطلع صوت الزامور " البوري " و بتقفل الابواب و بتفتح بس ما بتثبت البرمجة و ما بشتغل الريموت بعدها ، بحاول من جديد بصير نفس الاشي !... ساعدوني احل المشكلة الله يسعدكم

[123google]

نامت الرابطه بعد افتتاح الجزئ الجديد


وكثير من الاعضاء النشطين اختفو !!!! وين راحو ؟
من 4 ايام مافي ولا مشاركه !


سؤالي مين طلع له Service Engine Soon بعد ماشال دبّة الرصاص ؟ وجدت الحل الأكيد اللي جربته على سيارتي و ضبط 100%

[هاوي البر]

عندي مشكلة يا شباب خرب على مكينة الزجاج الامامي الراكب وقمت باصلاحها لكن تفاجاءت ان السيارة اذا قفلتها بالريموت مره والثانية ما يعطيني منبه البوري مثل السابق والشي الثاني ان في السابق اذا عشقت القير بالدي يقفل البيبان واذا رجعته الى البي يفتح البيبان الان ما يسوي هذه الحركه والش السوات السيارة بليزر موديل 2007
وجزاكم الله خير

[mis7l]

نامت الرابطه بعد افتتاح الجزئ الجديد


وكثير من الاعضاء النشطين اختفو !!!! وين راحو ؟
من 4 ايام مافي ولا مشاركه !


سؤالي مين طلع له Service Engine Soon بعد ماشال دبّة الرصاص ؟ وجدت الحل الأكيد اللي جربته على سيارتي و ضبط 100%

ـــــــــــــــــــــــــــــــــــــــــــــــ
هلا فيك اخوي
بشرني عنك عساك بخير

انت أي دبه شلت هي ثلاث دبات اللي في المكينه او الوسطيه او الاخيره

هي اللي تطلع هذي العلامه اذا شلت اللي في المكينه وبنسبه لي شلت الدبه الاخير من سنه ونص ولا طلعت علامة السيرفس الحمدلله وقبل ست شهور شلت الدبه الوسطيه وركبت دبة بورلا وكذلك ماتطلع علامة السيرفس ولله الحمد وتحصل مقطع لسيارتي في الصفحه رقم 4