سلام عليكم يارجال
أتمنى تكونون بخير
هذا الله يسلمكم اليوكون تبعي موديل 2002 لون نحاسي << ماله دخل اللون بس كمل هرجك يالأخو
سم أبشر
أقول لكم الله يسلمكم ... كان فيه صوت قوي قبل شهور ..وديته لورشة ..قالوا لي ثلاجة المكينة ... صلحوه لي ...وبعده صار مية مية الصراحة
بعد ما طلعته من الورشة ... صار مايشتغل على طول
يعني مهوب من أول نقرة مثل أول ...
يعني عشان يشتغل ... يبي لك تفتح السويتش لحد ماتولع اللمبات << الخطوة اللي قبل التشغيل مباشرة
اقول لكم عشان يشتغل تمام ...يبي لك تسوي هالحركة مرتين وتشغله بالثالثة ويشتغل تمام
لكن محاولة التشغيل من أول نقرة مايشتغل ...أو يشتغل ومابه حيل أبد أبد ... يعني ضغط المكينة يكون أقل من واحد ...يعني تحس ان ماله نفس يتحرك
لكن لما أسوي الحركة اللي كتبت فوق اللي هي ثلاث مرات يشتغل ويكون ضغط المكينة تمام
عاد انا رجعته للورشة نفسها ...شيكو عليه ..يقولون الموتر مافيه أي مشكلة
يالحبيب وش لون مافيه اي مشكلة ... قال أبد مافيه شي
قال لي واحد طرمبة البنزين ...قلت له طرمبة البنزين انا مجرب عطلها ..لما تكون ماسك طريق يسخن ويطفى
مجرد ماتلبق على جنب وتشغله من اول نقرة يشتغل
لكن هاللي حصل شي جديد علي
المشكلة منول ماشية الأمور لكن بهالحر الواحد مابه حيل يحتري لمين شتغل الموتر ...يبي يشتغل على طول عشان يشغل المكيف
فـ وش رايكم يامكشاتيين الله يسلمكم ؟
قال لي رفيقي ان المشكلة احيان تكون بحساس عمود الكرنك
ما أدري
أبي رأيكم
فيه شي ثاني بارك الله فيكم
ريموت اليوكون أجلد مرة وحدة
أجلد أي انه انطفى مرة وحدة وبدون أي سابق انذار
وديته لمحل ....قال البطارية ضعيفة ...غيرها لي بجديدة ونفس المشكلة
أبد أبد مايشتغل
مع انه قد طاح قبل فترة ...بس انه اشتغل عقب هالطيحة ..
فـ وش رايكم الله يسلمكم
أنا اليوم فكرت قلت ممكن له فيوز بالسيارة متعطل ..هل الإحتمال صحيح ؟
شي ثالث وأخير
الموتر ياكل مطب ...خصوصا بالجهة الجنوبية << صارت أرض مهوب موتر
قصدي الله يسلمكم ...من الجهة الخلفية اليمين
أعتقد انه مساعد خربان لأني لما أضغط على الموتر من عند الصدام مايعطي ليونه بالحركة ..بعكس الجهة اليسرى
.
.
.
هذا بارك الله فيكم كل مالدي
وجزاكم الله خير ورفع قدركم
أخوك أبو شكاع ... من أمام الموتر ...وأنا أجرب بالريموت أغديه يشتغل