ل أصحاب الترهيم والخبره فزعتكم

[جمس82]

السلام عليكم ورحمة الله وبركاته

كيف حالكم يا أخوان عساكم طيبين
انا موضوع يالغالين غريب
يمكن تستغربون منه ...

انا يا أخوان صراحه من يوم انا
بالمتوسطه والجمس القديم الي هو
البهبهاني او الرفرف الاحمر مدري
وش يسمونه في راسي و اعشقه عشق
و ودي يوم من الايام يكون عندي واحد

ف الزبده اني ودي اشتري لكن الناس كلهم
القريب والبعيد يقولون انتبه منه
ب يطلبك ورشه 24 ساعه وفلوس و قروشه
وناس تقول الجمس راح زمانه الحين الجديد و بس

الصراحه كلامهم مقنع لكن مهما اقتنعت يرجع في بالي الجمس اعشقه .. ف فكرت وقلت يا ولد
ليش ما اشتري جمس يعني نضيف نوعن ما
وابيع مكينته لان الناس حضرتني من المكينه القديمه يقولون ب تشيب راسك في الورش
و ببيع القير و اركب له مكينه وقير جديده
الي هي مثلا مكينه جمس 2007 او اي موديل جديد لاني معرف صراحه وش المكينه المناسبه
بس الزبده انها مكينه جديده

طبعا يا اخوان هذا كل وبتستغربون مني
لاني ما بسوي ذا كله عشان تفحيط او تطعيس او مجاكره لا لا انا يا اخوان ما اتعدا 120 سواقتي سواقه شايب ابغى استخدام يومي اروح فيه الدوام اتمشى فيه اسافر فيه طرق بعيده الامارت مكه الكويت يعني الفين كيلو

ف الزبده يا اخوان بالمختصر مكينه وقير جديده
بس البدي قديم يعني بس ادق سلف واشيك عالزيوت بس وامشي وانا مرتاح ماهو امشي و يدي علي قلبي لا يطفى ولا شي


ف وش رايكم ووش ملاحظتكم ووش نصايحكم لي
تكفون يا اخوان افيدوني بالسلبيات والاجابيات
والله يجزاكم خير .. اخوكم عوض

[ابو نايوفيتش]

والله يالغالي عز الله البهبهاني مثل العملة النادرة ، يستاهل ان الواحد يشريه

ومثل ماقالوا الخوف من المكينة وقرارك بتركيب مكينه اشوف انه ممتاز

والله الله اذا شريت واحد لا تنسى تاخذ بنا لفة عليه