15 نوفمبر 2015 - 16:514 نوفمبر 2015 - 21:27 منتديات مكشات


::::::: تابعونا على تويتر مكشات :::::::


مرحبا بكم في منتديات مكشات

::::::: تطبيق مكشات للأجهزة الذكية :::::::


تفعيل العضوية

إرسال كود التفعيل

مركز تحميل الصور

باحث قوقل لمكشات

الرصد الجوي

رادارات المناطق

إستعادة كلمة المرور

تنبيه : منتديات مكشات تمنع عرض أو طلب الأسلحة أو الذخائر بكافة أنواعها ، كما تمنع طرح مواضيع عن أي أسلحة عسكرية
النتائج 1 إلى 10 من 10

الموضوع: ديوان الشاعر / عبد العزيز السبيعي

  1. ديوان الشاعر / عبد العزيز السبيعي

    بسم الله الرحمن الرحيم
    السلام عليكم ورحمة الله وبركاته
    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي
    (((المقدمه)))
    الشاعر / عبد العزيز السبيعي- من الشعراء المميزين والذين أثروا قسم الموروث الشعبي في منتديات مكشات بالقصائد الجميله والمعبره وقد قامت الإداره مشكوره بجمع هذه القصائد في
    دواوين خاصه لكل شاعر وهي إذ تقدم ذلك إنما تسعى لحفظ جهود شعرائها وجعلها
    في متناول القارئ وهي تقدر للشاعر مايبذله من جهد وتفان ٍ في هذا المجال

    ((السيرة الذاتية))

  2. مشاركة: ديوان الشاعر / عبد العزيز السبيعي



    [line]

    ((بطاقة الشاعر الشخصية ))

    ""
    الاسم- عبد العزيز سعود ال حمد العريني السبيعي

    =من مواليد بلدة رغبة في اقليم المحمل بنجد عام 1395هـ

    =قلت الشعر في سن مبكرة

    =من هواياتي القراءة في كتب التاريخ والانساب والسيرة . واحفظ الكثير من القصائد لكبار الشعراء القداما من فصحى وعامية ، ولدي الكثير من القصائد التي تجاوزت200 قصيدة جاهزه
    للنشر تطرقت فيها لجيمع اغراض الشعر نشرت
    الكثير منها في المنتديات
    الشعرية وعبرالصحف
    ================
    ===

  3. مشاركة: ديوان الشاعر / عبد العزيز السبيعي

    منذ ثلاث اشهر والنبي علية الصلاة والسلام
    يتعرض لحملة شرسه من قبل عباد الصليب في مملكة الدنمرك
    الصليبية وهذا مادفعني لهذة القصيدة التي ارجو ان تكون
    في موازين اعمالي

    """

    ابتدي بسم الله الرب والفرد المجيب.=رحمته لا خطيت لا شك غاية مطلبي.
    فاز من يطلبك عونك بصدق ما يخيب=يا الاهي لك خظعنا وسقنا المركبي.
    شبت الغيرة بنفسي ولا غيرك حسيب=أنت حسبي مع ملاذي وعفوك مكسبي.
    من زمان اصبح الحق فالعالم غريب=الامانه والحقيقة تهان وتسلبي.
    كل شي صار يحدث بها الدنيا عجيب =ولاتعدت حدها في الملا ماتحسبي
    ياهل التوحيد والدين يا سقم الحريب =كيف يطعن في محمد صليبين غبي
    انت يا نسل العواهر وملاك الزريب=انت جدانك امنول لجداني سبي.
    انت ياكلب الدنمرك والوجه الغضيب = القداسه والطهاره ابد ماتسلبي
    بلغو نسل الصليبي وعباد الصليب.=تبت أيدين الصليبي وتخسا وتهبي.
    اذهلتني حملة الغرب في جاه الحبيب=الأراذل من محمد نبيي وش تبي.
    يالرجال اهل العقيدة هل الغيرة نهيب= كلنا تيار واحد ودين ومذهبي
    والله انا دون عرضك فدا شب وشيب=دون عرضك ترخص الروح واهلي ونسبي.
    لاتهاون لاتخاذل تر المطعن عطيب=كيف نرضا يشتم احمد فداه امي وابي.
    ياهل التوحيد جرح الكرامة مايطيب=ارفع الراية على الكلب لاكنت اعربي.
    يانبي الخلق مايلحقك شك وريب=يامعينن باقين فالورا ماينضبي.
    لوتغيب الشمس يبقا شعاعك ما يغيب= دعوتك فالكون شمس ابد ماتغربي
    يا شفيع الخلق فالحشر واليوم الرهيب =مواقف مافية جاه ولابه منسبي
    ما كتبه الكلب لوهو تعداه الرقيب=عندها ناقف ولو كان جيناها حبي
    دام سلعتهم مكاييج واجبان وحليب=قطعوها واتركوها سلعهم مانبي.
    ولا نبي منهم مدرب ولانبغا طبيب= كيف نبلع مثل هذي عقب سب النبي
    ياهل التوحيد قومو ترا الموقف عصيب=كل نفس عند هذي تثور وتغضبي.
    يوم جاكم من هل الدين والدعوة نديب = دون هذي ما ندور ملاذ ومهربي
    والله ان الرأس من هول ما قالو يشيب = طار حلو النوم معها وكدر مشربي
    اصعب الصعبات هذي ولافوقه صعيب=انت يالي تفهم الوضع شايب مع صبي
    وادي حول من الضلع والجاري جذيب = لاسكتنا باكر السحب جتنا تسحبي
    كلنا نفداك يا احمد ولافينا غريب = من نطق بسم الشهادة وبمحمد نبي
    كلنا نفداك يا احمد خسا الغرب الذهيب = دام انا مسلم موحد فيا كيف اكذبي
    صار في صدري من الوضع والصاير حطيب=ونارها فالصدر بالله ياكيف تخبي
    وكان هاذي ماله عند من يفهم مجيب=احفروا قبري وحطوا على القبر انصبي
    ""
    الشاعر
    عبدالعزيز ال حمد
    السبيعي


  4. مشاركة: ديوان الشاعر / عبد العزيز السبيعي



    ((الوسمي))
    سميت بسم الله عضيم الجـلالـــي = رب الفلـك محيـي العضـام الـبوالي
    الواحد المعبـود منـش الخيـالـي = عـلام كـل الـغيب والي لانا فــات
    ""
    سامع دبيب النمل في ضلمـت اليـل = رب الـفـلك ورب طــه وجــبـريل
    نرجيك باسمك والدعـى والتـباهـيل = نشكي عليك ولاعـلى الـناس مشكات
    ""
    يخالق خلقه ومحـصـي عـددهـا = ويمحصياً اشعـوبـهـا مـع بـددهـا
    وبمحكم التنزيل عنـده وعـدهــا = لهل الكفر نار وهـل الخـير جـنـات
    ""
    انت الذي امرك مـن الكاف والـنون = ومجرى السفن فلبحر ومدبـر الـكـون
    وعالم خفايا النفس وماكان مـكنـون = ابرحمتك مـجـزل عـليـنا الـعطيات
    ""
    ويامحصـى أيـامـهـا والـثوانـي= بك نستعيتن وحيـثك الـمـستـعانـي
    ونشكي عليك اضروف هذا الزمـانـي= وقتن كثر فيـه الـفتـن والمــلذات
    ""
    بسمـك الاهـي يالعـظـيم الـتجينا = ولاغـيرك احدن يالعظـيم ارتـجـيـنا
    ان كان تـرحمـنا تـرانـا نـجـينا = وان كـان تـهلكنا فلافـيـه منـجـات
    ""
    ومـن بعـد هاذي نـشتكيلك ونرجيك = انـت الـمـلك واحـناابـحكمك مماليك
    نـومـن بـذالـك دون ريبً وتشكيك= ولانـعبـد الـطـاغوت وابليس والات
    ""
    نطلبك وسمياً علــى نجـد همـال = مـاعـاد يـبـقـا وادياً فيــه مـاسال
    سيله يذكر من علـى كـل مـدهـال= تـناقلـونـه بـينـهـم بـلبـشـارات
    ""
    وسيلـه يسـيل للـعرب كـل ديـرة = يـعــم الــوطــن وديــار شـــبـه الــــجزيرة
    دار القروم امـكـملـين القصــيرة = مـن فـوق نـجران الى اقصى القريات
    ""
    من الـشرق حتـى الـغرب مستـم غـيمـه = ســـبــع ليالي والـمـطــــر منـه ديـمـه
    ومنه المطر يسقي العروق القديـمه = ويـحـي هميد الارض من بعد مامات
    ""
    ولاسـحابً مـستـتـمً اخـيـالـه = بـرقـه حـقـوق وسـاريً بشتعاله
    كنه عسـير الـي طـوال اجـبـالـه = حقيـقـتـن يـطــفـي عـن الـكـبـد حـرات
    ""
    سحيـبـه وبـهـا الطهاء مثل الاذواد = لاجـن مـع الـقبله مع الصبح تنقاد
    لجن على حيرانهـن عـنـد مـيـراد = تـسـمع لهن في واسع الخد لاجات
    ""
    تسمع رعوده في سـحـابـه لهـا لاج = قـصـاف بـرقه يدعي الارض ترتج
    لاجا بـوداً سـيلـه واركـد الـعـج= اديــارنــا تــصبــح بـعدهــــــا امـريـفـات
    ""
    في بادي السماك بالـخيـر نـاشـي = نصبه من الماء انـهصـرثم طـاشي
    ومن السدا تقول غاشـيـه غـاشـي = ولارغـى درالـبـكـار العريـبـات
    ""
    ومـن بـعـد دوره بـيـجـي حـول شـهـريـن = تصــبح اريـاضـه كـنـهـن الـبـسـاتـيـن
    شـــيــن يــزيــل الـهــم والـسعــد لـلـعـين = هـذا الـفـرح لـنـفـوسـنـا والـمسـرات
    ""
    تـلـقـا الـطــيـور يـغــردن زيــن الالـحـان= مـن فـوق غصن ابزاهي الون قد زان
    وشـكـل ابـلـون الــورد مـن كـــل الــوان = يضفي على رسم المصور ابلوحـــات
    ""
    تـلـقـا الـزبـيــدي بـيــنـن مــن بـيـاضــه= يـلـمـع عـلـى الـخـد الـوسـيـعه نياضه
    نـجـنـيـه مـاجـا امـصـدر فـــي حـيـاضــه = ا ن اشـهـد لــجـنـيـه مـع الـقـاع لذات
    ""
    ويـمـا حـلا شــبت امـن الرمـث حـزمه = فـي مـدهـلـن صـابـه امن الوبل رزمه
    عـشـبـه تـمـايـل فـوق روضـه وحـزمـه = مـابـايــن كـود الـخـطـوط الـعـزيـرات
    ""
    يـفـرح بـه الـمسـلـم ويـفـرح بـه الـطـير = ويـفـرح بـهـا راعـىالـنـيـاق المعاشير
    ويـفـرح بـه الـي مـرزقـه جـمـت الـبـيـر = يـروي ابـها غرس اغصونه هزيلات
    ""
    ويـفرح بـه الي امن دهــر صابه الضـيـر = مـن كـثـرة الـتـعـلـيـف شاف المخاسير
    مـابـيـن مـنــخــول وبــرســيـم وشـعـيـر = يـقـعـد مـع اهــله مـاشـري فـتـريـلات
    ""
    منيت مكاشيت الخلا والعـسـاسـه = يـرتـاح قـلبه عقب مادار راسه
    ويجلي عن الراس المصدع اعماسـه = عـقب ضجيج العاصمه والدوامات
    ""
    برفقت رجالاً من هل الطـيب والكـار = اهل الـكرم والدين مع شبت النار
    والدله الي بين هـيـلً ومسـمـار = اهـل الـهروج الوافيه والجميلات
    ""
    ماهمهم فاصـيف روحـه لـغـاديـر = ولاهـم من الشرق المسما محادير
    ولاهم على الغرب المسيحي مصاديـر = بـنـو ابـفعل الطيب دور وبنايات
    ""
    وبين الحصان وبين خشم الـغرابـه = نـبـته يـسلي يـاعرب من مشابه
    (رغبه) هـواء قلبي ومرتـع شبابه = يـمـا لـنا فيها من العمر سجات
    ""
    وبين السباعه والكثير وام الشــــقـوق = فيهــا النـبات الغـض مـن كـل زمــلـوق
    د يــرة رجالً تحـمي الدار والنوق = حقـايق مـاهيب هرج وحكـايات
    ""
    يـاما حـموهـا قـبل حكم الجزيرة = يـوم انـهـا قـوم وخـيل امغيرة
    وكـم قـصتاً تـبقا مع الناس سيرة = عـندي علـى ذلـك براهين واثبات
    ""
    هـذا الـكـلام الـي يقـول العريـني= كـلام حـق ونـابـع مـن كـنيني
    متخـيرً مـن جــزلـهـا والسميني = يـعـجـب رجالاً ينطحون المهمات
    ""
    ويـناس تـرالـي مـانـع الغيث عنا = مـنـع الـزكـاوي وارباء في وطنا
    وتقـلـيدنا الـكفـار راحـت اشـيمنا = اهـل الـعـلوم الخايـبه والخبيثات
    ""
    وينـاس تـوبـو لـربكم وارجـعوله= بـزيـن العمل وادعو امن الله قبوله
    من قبل يومـاً ماتسـكـر اقـفولـه = رفــع الكتاب وطـوياً السـجلات
    ""
    ويـالله يـالله لاتـخـيـب رجــانـا =ابـرحـمـتـك يـارنـا مـلـتجانا
    يـاربـنـا الـرحـمـن تـقبل دعانا = يـاخـالـق سـبع الثراء والمجرات
    ""
    واختـامـهـا صـلو وذا خـير ماقول = عـلـى الـذي للخلق مبعث ومرسول
    نبيـنا الـشـفـاع في سـاعة الهول = عـد الـحـجـيج وعـد مانزل ايات
    ""
    قيلت في 15/6/1420


    ****

  5. مشاركة: ديوان الشاعر / عبد العزيز السبيعي

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي

    ((مكشات))

    .ياما حلا المكشات في مربع سال.=بأرض دماث والعشوب انبتت به.
    .سقاه نوا بأول الوسم شعال.=تقدح ابروقة والرعود أرعدت به.
    .نصبة تفدق كن مقدامة اجبال.=يسحب اقنوفة وألطها حوطتبه.
    .يشبة كما ذود على جال منهال=.حس المدوه بان يوم أوردت به.
    .ينقاد بمر الرب علام الأحوال.=سقى مناطق نجد واستبشرت به.
    .لكن هملوله الى صب شلال.=وديانها واشعابها حولت به.
    .وعلة من العارض الى الحد هطال=.يسقي لنا دار الدهور أجدبت به.
    . قفر خلا ماتاصله بعض الازوال.=واهل الثمامة ما بعد دوجت به.
    .ولازاحمك فيها تكاسي وعمال.=واهل التجمهر مابعد فحطتبة.
    .والعرق سالم ماختلف فية مرمال =.والي على الترهيم ماطعستبة.
    .نركب على الي لامشى بشهب الال.=كم واحداً صعب الدروب اقطعتبه.
    .جيب شراه القرم من غالي المال.=تفداه من في دورها شخصتبه.
    .ويفداه مال اهل المفاخر والأنذال .=الي لجل جمع الذهب ساهمتبه.
    .تنقل سوالفنا جهازات الارسال.=واناتل ياربعنا ركبتبه.
    .ياسعد ابن رشد جلا ضيقت البال=.ويزيل عن قلب العنا مالجت به.
    .ياما حلا والطير بالروض يختال=.صوت ام سالم زان يوم العبتبه.
    .فية الزهر متفتح الوان واشكال.=سبحان رب بالخفى سبحت به.
    .روض ورى شوية من الشرق واشمال=.يازين جو ياسعد عطبتبه.
    .ريضانها لاشافها الرجل يهتال.=ريانتن ماكن قوم وطتبه.
    .لأهب نسناس الهوى عشبها مال =.يازين جو صافيً عطرتبة.
    .خدة لربعي يابيض الوجه مدهال.=وياما حلا وضحى لربعي رعتبه.
    .ونشب نار شافها كل هشال.=يازينها فالليل لاسرجت به.
    .في جنبها صفت معاميل وادلال=.ويديرها قرم افعوله ظرتبه.
    .ويكمل المسفار خوت هل الطال.=الكل نفسة لرفيعة رقتبه.
    .لطيب سباق ولصعب حلال.=قرم مداغيش النشاما حكتبه.
    .منسل رجال الطيب ماضين الافعال=.الي هل النمات ماعذربتبه.
    .الكل منهم ساعة الضيق رجال=.والحاجة الي ماش ماطوحتبة.
    .لاهوب نقاد ولاهوب زعال.=زلت رفيقة لاغلط ماسرتبة.
    .على النقا ومعرب العم والخال=.هاز المراجل والشيم هذبتبه.
    .هذا الرفيق الي مسافيرة اطوال.=يبعد مارميعة ولا قربتبة.
    .ماقال وشلي ياولد بالخلال الخال.=لابعد وصل لنساح مابعدتبة.
    .هذا منات النفس كان العمر طال.=وهذاهوى بالي وما هوجست به.
    .ولاهمني لايم ولاخفت عذال .=وانفس هرج الاش مافكرت به.
    .واختامها صلوا عد رمل الاسهال=.على محمد خير ماختمة به.


  6. مشاركة: ديوان الشاعر / عبد العزيز السبيعي

    قصيدة في الاسهم والي حصل فيها وقد سبق ان القيتها في
    برنامج سواليف عند استضافتي فيه في نهاية شهر ثنين من هذه السنة
    وهي فكاهية وتتحدث عن بعض الاشياء التي حصلت في السوق
    ارجو ان تنال على رضاكم
    دخلت انا الاسهـم عشـان التجـارة=نبغى ننافـس مـع كبـار الهواميـر
    لكـن ماشفنـا يـاكـود الخـسـارة=يالله عسى فالامر خيـرة وبـه خيـر
    واشوف انافالسوق وضحـى وسـاره=وحمود مع محماس وسعـود ومنيـر
    احـد يقـول السهـم ذا فالـصـدارة=واحد يقـول السـوق مافيـه تدبيـر
    كلٍ يبـي المكسـب ورجـع دمـاره=ذولا الضعوف الـي كلوهـا خوابيـر
    الكسـر كـايـد مالقيـنـا اجـبـارة=طـاح المؤشـر مالقيـنـا تفاسـيـر
    .كـم واحـدٍ بـاع الغنـم والعمـارة=وكم واحدٍ بـاع النخـل والمواطيـر
    وكم واحدٍ همـل دبشـه وعقـارة =.دايم وراء الشاشه مع الصبح وعصير.
    حتى هل الورشـات واهـل النجـارة=واهل المعارض والابـل والصقاقيـر
    والجنـدي الـي سلمـوه الخفـارة =.اصبـح مبزبـط مايجـي فالمخافيـر
    ولاجيـت اراجـع حاجةٍ فالـوزارة.= ماشفت انا ياكـود راجـو وشبيـر
    كم واحـد منـول يصـرر اصـراره=.طلع افلوسـه ميـر جتـه المقاديـر
    والـي منـول يدعـي بالشـطـاره .=كب اللكاعه وان حصل درب بيطيـر.
    واحد نشـب بالقسـط والرهـن داره=غـروه ربعـه بالطمـع والمهاذيـر
    الخفـظ والتوقيـف صـار الشـراره=في سوقنا الي صار مثـل الاساطيـر.
    من فوق عشر ايـام ناصـع حمـاره=والـون الاخضـر الغـي بالمأشـيـر
    ولاحد عرف ويش السبب في انحداره=والـي يحلـل كذبـتـه التقـاريـر .
    راحت فلوس النـاس عقـب انهيـارة=بين المصافـي والمكيـرش وتعميـر
    .والي ارتفع ضغطه وجتـه المـراره=من عقب ماهبـت عليـه المعاصيـر
    يامكثـر الجلطـات عقـب انهيـاره.=في روس نـاس يجمعـون الدنانيـر

    الشاعر
    عبدالعزيز ال حمد
    السبيعي

  7. مشاركة: ديوان الشاعر / عبد العزيز السبيعي

    قصيدة ارجو ان تنال على رضاكم وهي من قصائدي
    الي قلتها في السنة الهجرية
    الماضية
    اضعها عربون تواصل



    من عادة الدنيا لها اقبال وادبار=كم واحداً قبلي شكا من عناها
    .كم ليعت قبلي مشاكيل واخيار=والنفس جاها يافهد ماشناها
    لابد دورات الليالي بتندار.=ولاهي ابنفس المرء تدرك امناها.
    ماهوب وقتك طايع الك ابتختار=.والكل جرب شرها واحسناها
    .ومن لا يحبك لا تعجب الى بار=.والي يمن ابمدته ماثناها.
    .ذقنا بها حلو المشارب والامرار=.حمل الليالي لاظنت من ظناها
    نجفل من الهزله ونبعد عن العار=نخاف من هرجة جبو ما كناها.
    نحرص على الناموس ونقدر الجار=.وانفوسنا كنز القناعه غناها
    الضيف له واجب وحشمه ومقدار=.و نشب له نار يشعشع سناها.
    للحيل ذباح وللحشو عقار=.والاش عادات العرب مادناها
    احب انا اخوة هل الطيب والكار= .زحول الرجال الي تعز اقرناها.
    ولانكشف عيوب الرفاقه والاسرار=.ولو زل قلنا زلته ماعناها.
    وفي هرجنا ما نأخذ يمين ويسار.=ولانقرب ارباب الخنا في خناها.
    ولنا براس العز بنيان وادوار=.ابيوت عزً ضابطينً ابناها.
    من خلقة الطيب على الساس مابار=.ومن يزرع النبته بيقطف جناها
    .اطعن وتدي الناس لاشك الاخبار=.خذنا من امثال القروم امعناها
    .والي يحسبه ريح يلقى له أعصار=.يروح وارقاب العرب ما حناها
    .من كان همه جمع قرش ودينار.=يموت عجل ولقمته ماهناها.
    كم واحد اماله طويلات واكبار=.دون الأمل نفسه قطعها فناها
    .اهموم قلبي عرضتني على النار=.مدري متى تطلق صراح اسجناها
    .يالله عسى مثلي على الوقت صبار=. لاشفت سادات الردى وعوناها.
    الشاعر
    عبدالعزيز ال حمد
    السبيعي

  8. #8
    تاريخ التسجيل
    May 2003
    الدولة
    رغــ نجد ـبـة
    المشاركات
    353

    مشاركة: ديوان الشاعر / عبد العزيز السبيعي

    في البداية اتقدم بالشكر الجزيل لشاعر والمشرف الكبير والمحبوب ريف النشاما
    على تشريفي بهذا الديوان والذي يحمل بعض من قصائدي والذي يشرفني ان اضعها في
    هذا المنتدى المميز والمتابع من الجميع
    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي


    اقتباس المشاركة الأصلية كتبت بواسطة عبدالعزيز ال حمد
    اخواني الكرام اقدم لكم قصيدة عيدالفطر عام 1426هـ

    وهي بمناسبة احتفال اهل رغبة بعيد الفطر المبارك
    اعاده الله علينا بالخير والعافية وكل عاك وانتم بخير
    والتي ارجو ان تنال على رضاكم


    بديـت بسـم امنـزل الحمـد والنـاس=عـلام مـا نخفـي وماكـان بـانـي.
    وأعوذ به مـن كـل عايـن وخنـاس.=ومن شر نفسي ومن إبليس يحمانـي
    وافرج لقلـب من عـنا الوقت منحـاس = وقـت عـلى مـر الـمشارب حداني
    .ومن بعدها بدعت قاف علـى سـاس=.متخيـرة مـن طيـبـات المعـانـي
    .مادمت أنافي بحـر الأشعـار غطـاس.=بطـوع المعنـى ولوهـو عصـانـي.
    وانا علـى المعنـى مفـوه وحسـاس=نـوب تجـي صلبـة ونـوب ليـانـي
    ولا استو عندي بدعته امـن الـرأس=.وقدمت لاهل الطيـب زيـن المعانـي
    بسجله مـن هيـض فكـري بقرطـاس=.عطـاي مـن ربـي ولاحـد عطانـي
    .القاف به هزله وجزلـه وبـه مـاس=.وأحيان يصبـح هـرج مالـه مكانـي
    .مبنا علـى معنـى نقولـه ولابـاس=.يستأهلـه حـفـل كـريـم دعـانـي.
    تستأهله ربعـن حـوت كـل نومـاس=.أهل ألوفـا والطيـب قاصـي ودانـي.
    اليـوم عيـد وعيدنـا مالـه أجنـاس.=الحـفـل نور بالربــع والمكـانـي
    .عيد ورا عيـد جـلا كـل وسـواس=.من عقب شهر الخير شهر رمضانـي
    .مادا مهـا جمعـت معـزة ونبـراس=.أهـل ألوفـا مبيـن ربـع وخـوانـي
    .بقول أنا يا مرحبـا عـد مـا جـاس.=وسـط النفـوس الطيبـة مـن بيانـي
    .وعداد ماذعذع من الشـرق نسنـاس.=وعـد الدقايـق فالزمـن والثـوانـي
    .للحفـل كلـة مالهـا حـد وقـيـاس.=ولاهـي خصـوص لواحـد دون ثانـي
    .لاهل رغبه أهل ألموا جيب والبـاس.=أهـل المواقـف مـن قديـم الزمانـي
    .لطيـب سـبـاق وللـبـن حـمـاس=.والضيف يقلـط فـوق حيـل سمانـي
    .دار لنـا بيـن الغرابـة والاطـعـاس=.وعنها جنوب الظلع خشـم الحصانـي.
    ديرة رجـال لاعتلـوا قـب الأفـراس.=ياحمونـهـا لاذل خـطـو الجبـانـي
    .يشهد لنا التاريـخ مـن قبـل دواس.=فعـل ظهـر بيـن النشامـا بيـانـي
    يوم الفقر والخـوف والشـر كبـاس.=من قبل أخو نـورة زبـون الحصانـي
    يـوم ان نجـد بيـن فـارس وفـراس=حنـا هـل الميقـاف واهـل السنانـي
    وياديرتي لك في حشا الـروح مجـلاس=.ثابـت وبـه قصـر طويـل المبانـي
    .لوغبت يسري بي لماضيك هو جـاس=.وقـت الركايـب والتفـق والسوانـي
    .والي علينا بالخفا يظـرس اظـراس.=مـا همنـا لاشـك ولــد الهـدانـي.
    الرجـل لديـرة مـعـزب وحــراس.=ولا الـردي وقـت القصـى مايبانـي.
    وياماحـلا لاوصـل العلـم عـسـاس=.واعطاك علم السيـال والجـو زانـي
    .من رايح برقـة سـرا تقـل مقبـاس=.سيـل مسـا يلهـا ومـلا المحـانـي
    .واركا على أم شقوق سيل على الرأس=.ولاعاد تفـرق مرتفـع مـن طمانـي.
    ومن عقب شهرين ترى العشب محتاس.=وريضانها صـارت سـوات الجنانـي
    .مابين فقو وحرف وشيـح وبسبـاس=.وريح الخزامـى فـاح والقحويانـي.
    يبعد عن المحزون ضيقـات وعمـاس.=ويزين به وجـه مـن الهـم شانـي.
    يأرب جـودك ماوقـف دونـه اليـأس.=كـل تحـت رحمتـك انـس وجـانـي
    والبيـت لـه بانـي وللغـرس غـراس.=ولاتوصـل الغايـات كثـر الأمـانـي
    أنـاس تفـرق كـل ماسـك وهـلاس=والـي مواقيـفـه أثـقـال أمتـانـي
    .والي يجي بفـلاس يرجـع بالفـلاس.=وكثر الحكي ما أشاد صـرح وكيانـي.
    والي سبـق لطيـب يستأهـل الكـأس.=والله يجازيـهـم بــرد الحـسـانـي
    .ولاتاخذالطالـة كـر أبيـس الأكيـاس=أضعاف النفـوس وضيقيـن البطانـي
    الـي الامنـه زمـر طبختـه فــاس.=ماجابـه الضمـان وقـت الضمـانـي.
    تر الذهب مـا شابهـه زنـك ونحـاس=.وتـر المعيـة مـا تماشـي السمانـي
    والله ما نمـدح افـلان امـن أنـاس.=الا الـذي فعـلـة بـسـر وبيـانـي
    .يقـوم بالواجـب ولاهـوب نـكـاس=.ولاهـوب فعلـة هذرتـن بالسـانـي.
    وبعض العرب وقت المهمـات ركـاس=.مامنـه خيـر ولا يـسـد الجـرانـي.
    وبعض العرب يشبه كما فـرخ قرنـاس=. في ماقفة كنـه اسهيـل اليمانـي
    املاحـظـات لوتسـجـل بـكـراس=.تفيدنـا لاشــك والعـمـر فـانـي.
    بدعـت انـا خمسيـن بيـت بمقيـاس=.لناس على المعنـى وفهمـة اذهانـي.
    وصلاة ربي عـد قطـاع الارمـاس =.وعــداد دوراة الفـلـك والزمـانـي
    علـى محمـد سيـد الخلـق والنـاس.=شفيعنـا مـن حـاز سبـع المثانـي
    الشاعر

    عبدالعزيز بن سعود
    ال حمد

  9. #9
    تاريخ التسجيل
    May 2003
    الدولة
    رغــ نجد ـبـة
    المشاركات
    353

    مشاركة: ديوان الشاعر / عبد العزيز السبيعي

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي
    اقتباس المشاركة الأصلية كتبت بواسطة المرقب
    هذه القصيدة قالها " شاعر البصيرة " بمناسبة افتتاح منتدى رغبة ، وهي امتداد لمسيرة العطاء التي تعودنا عليها من هذا الشاعر المخلص لبلدته.
    يأهـل البصيـرة طيبكـم ماخفانـي=يا اهل الوفاء والطيب وافين الأشبـار
    جينـا نشـارك يـوم قـرم دعانـي=ولاجيت أبى دعوة وأنا من هل الـدار
    يا رجال ((رغبة))جيت قاصد وعاني=يا منتدى ربعي هل الطيـب والكـار
    المنتـدى رابطـه سـاعـة لفـانـي=سجلت باسمي ماعلى هرجـي اغبـار
    لـه الشكـر لاشــك والامتنـانـي=من أسـس الموقـع ومونـه وأشـار
    الفعل طيب طبـع راعـي المعانـي=راعي الحمية مـن كريمـن الأذكـار
    يوم الخبر من راعي الطيـب جانـي=عـن منتداهـا قلـت مافيـة معـذار
    آنـا ولدكـم واعتـبـر ذا مكـانـي=ولافيـه لا منـه ولافيـه مـحـذار
    لاشك لسمـك فالضمـا يـر معانـي=اسم رغبة ديرة مشا كيـل وأحـرار
    ويما حلا لأشفـت خشـم الحصانـي=في عالي الموقع ولا ضلـع سنجـار
    ولأشفـت مرقبهـا يـزود اخفقانـي=ترجع بي الذكرى على ماضي صـار
    وياما حلا شوف النخـل والسوانـي=واشوف بيت الطين ثابـت والآثـار
    واشوف أنا أم شقوق شوف العيانـي=الروضة ألـي ردود عنهـا الأخبـار
    وأدى السباعة سـال والعشـب بانـي=وارض الكثيراعشوب وتسر ألا نضار
    ياعـل دار أربـو عنـا والعـوانـي=تسقي مضاميهـا شخاتيـر الأمطـار
    تصبح مر أبعهـا سـوأت الجنانـي=متخالـط فيـه الخزامـى ونــوار
    وريضانهـا بالحـرف والقحويانـي=ربيعهـا ماقـد ذكــر ولاصــار
    ياديرتـي لاشـك حبـك سبـانـي=حب يتابعنـا علـى كـل مضمـار
    وعلى ثراها كم قضـو مـن زمانـي=ربع ضرو بالطيب ما داسـو العـار
    ياعـل منزلهـم بوسـط الجنـانـي=وانك تحرم من سكنهـا عـن النـار
    وياديرتـي منتـي بديـرة هـوانـي=من دون حدك فعل مرخصت الأعمار
    يشهد لنـا بالفعـل قاصـي ودانـي=فعل البطولة والشرف سـر وجهـار
    من هازهـا يرجـع بغبنـه مهانـي=وينعم بها الطرقي ويامن بهـا الجـار
    والضيف يبشـر بالسمـن والسمانـي=والعود الأزرق واشقر البـن وإبهـار
    ولاهمنـا نبـح الجعـر والحصانـي=ولاهمنا راعي الضغينـة ولا الفـار
    أهـل النميمـة ضيقيـن البطـانـي=خفاف العقول الي تنفـخ بـالا زوار
    الفعـل مـا غطـوه لاشـك بانـي=والـي بليـا أسـاس لاشـك ينهـار
    كل سمـع لاشـك قاصـي ودانـي=ألنـا بتاريـخ العـرب فعـل وادوار
    وانا احمـد الله يـوم ربـي عطانـي=ديرة وفاء ديرة كـرم ديـرة أخيـار
    وحنا جماعـة مـن قديـم وخوانـي=على المحبة والنقاء اصغـار وكبـار
    وعداد من صلى وصـام رمضانـي=صلو على الهادي وصحبه والأبـرار
    اخوكم
    الشاعر
    عبدالعزيز بن سعود الحمد السبيعي
    البصيرة لقب بلدة رغبة والذي يعتزي اهلها به

  10. #10
    تاريخ التسجيل
    May 2003
    الدولة
    رغــ نجد ـبـة
    المشاركات
    353

    مشاركة: ديوان الشاعر / عبد العزيز السبيعي

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي
    السلام عليكم ورحمة الله وبركاته
    هذه القصيدة القيتها امام اهل رغبة في 2_10_1425 في اختفال اهلي
    رغبة بالعيد بحضور جمع كبير من اهل رغبة يتقدمهم الاستاذ عبدالرحمن الجريسي
    رائيس الغرفة التجارية بالرياض
    ولقد كانت محل اعجاب الجميع ولله الحمد والقصيدة قلتها في اهل رغبة
    ارجو ان تنال على اعجابكم


    بسم الله الي منزل الحمد والتيـن = رب الفلك منشى البشر من عدامي
    يامالـك الدنيـا ويامالـك الديـن = محدن شبيهك يارفيع المقامـي
    ماتكتبه يـارب لاشـك راضيـن = نطلبك جودك وانت منش الغمامي
    وانك تثبتنا علـى الحـق والديـن = لاشك عفوك يالكريـم المرامـي
    يـارب ياقابـل صـلاة المصليـن = يارب تقبـل بذلنـا والصيامـي
    يوم الحساب ويوم نشر الموازين = تضفي علينا رحمتك مانضامي
    واليوم حنا ياربع مستعدين = الكل منا محتزم بالحزامي
    والقاف يبغى له ابنظمـه قوانيـن = علي مايصبح صعيـب الريامـي
    ولاصرت من ميل الزمن خاطري شين = ولاطاب لي شربي وذوق الطعامي
    قامت هواجيسي من الشعر تمليـن = والعين جافاهـا لذيـذ المنامـي
    القاف زان وجا لقوله مضاميـن = واصبح لها وسط الضمير ازدحامي
    واليوم حنا بربعة عقـب الالفيـن = عام مضى والعام قافيه عامـي
    تمضي وحنا ياهل الجود ماضيـن = ولحدن سوا رب المخاليق دامـي
    ومن عقب هذي عد حمل البساتين = ومالعلعة بالصوت ورق الحمامي
    يامرحبـا ترحيبـتٍ فالهـا زيـن = فال السعد شوف الوجيه الكرامي
    ترحيبتن ترقى بـروس العرانيـن = مشرافها دايم بـروس العدامـي
    ويامرحبا يالي من البعـد عانيـن = الحفل نور مثـل بـدر التمامـي
    اليوم عيد وشوفت الربع عيديـن = يسرني شوف الوجيه الحشامـي
    اهل الكرم في حزة العسر واليـن = رجالهم بالطيب يارقا اشمامـي
    الي ضرو بالطيب اول وها لحيـن = وقت الدهور ويـم رد الجهامـي
    اهل رغبة يامزبنيـن المتليـن = تاريخكم ناصع عليـه الكلامـي
    وانا احمد الله من قديم امتصافيـن = نشوم للعليـا بـراس السنامـي
    يوم الجهل لاذعذع الشر راسيـن = عن حدها مروين حد الحسامـي
    ياما حموها بين حضـر وبداويـن = الا قصر بالفعـل ولـد الفدامـي
    ياهل الوفا يامرجحيـن الموازيـن = الكل منكـم يستحـق الوسامـي
    الحيل وقت القل لضيف مهفيـن = ويوم المزاحم موردين الظوامـي
    يادرنا لو نببعـد ابعيـد مشفيـن = لاشك لك وسط الضماير غرامي
    منزل رجال فالمواقـف امسميـن = امحصلين الطيـب والاحترامـي
    يادرانا يـادرة الحسـن والزيـن = حبك ملكنا قبل وقـت الفطامـي
    منـا بحبـك يشهـد الله مخطيـن = حبك سكن وسط الحم والعظامي
    يجري بوسط اعروقنا والشراييـن = ولاحدٍٍٍٍٍ يلام ابحبها يـوم هامـي
    مرباعها لاربعـت يعجـب العيـن = ياما حلا فالعرق نصب الخيامـي
    وياما حلا حس القطا والكراويـن = حول الغدير الي من السيل عامي
    ريضانهـا لاعطبـت بالرياحـيـن = تسر قلب الي من الهـم كامـي
    بين الحصان وبين عرق البلاديـن = ذي دارنا يوم الفعول الجسامـي
    وسط الوثايق والكتـب والدواويـن = اسمك امسجل من خاير الاسامي
    من ماضي الدنيا لها العهد معطين = يوم المصايب مع عصور الظلامي
    بفعالكم من يسكن بنجـد داريـن = والي سكن بالغرب ولا ابشامـي
    حيث انكم لاشـك مثـل الشياهين = الي على روس الظلاعين حامي
    الفعل تثبتـه الحجـج والبراهيـن = ولا قلت قولن حق مابه ملامـي
    رغبة تشوق لدعمكم يالكريميـن = سيرو بهـا ياربعنـا للامامـي
    ياربعنا يالي على الطيب ضاريـن = انتم لها لاشك ستـر وحزامـي
    مادامكـم للدعـم والبـذل قاويـن = فزو بها ياهل اللمواقف قوامـي
    ترى لها ياجمعت الطيـب حقيـن = والكل منها ياهل الجود سامـي
    دام التطور حولنا ايسـار ويميـن = الصف لايظهر عليـه انهشامـي
    لابـد نخدمهـا بكـل الميـدايـن = مايلحق الصف القوي انهزامـي
    وختام هـذي عـد لبـا الملبيـن = وعداد من طافو ببيـت ال حرامـي
    صلو على الهـادي امـام النبيـن = امحمد الهادي عليـه السلامـي
    الشاعر
    عبدالعزيز بن سعود ال حمد
    [/QUOTE]

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •