ناوي أسوي ( مشب ) و احتاج مشورتكم و تجاربكم

[قارمن]

بسم الله الرحمن الرحيم ،
السلام عليكم و رحمة الله وبركاته ،


أنا متفائل جداً بأن يجعل الله هذا الموسم موسم خير و بركة و ربيع و أرزاق ..
علينا و عليكم جميعا ً.

أنا ناوي أبني ملحق ( مشب ) و أرغب أني أخليه على الطراز النجدي القديم و يكون
طيني بمقاس 4*5 و أرتفاع 3م و لازلت أبحث عن شخص متخصص في مثل
هالأمور ، وعندي إثنين من الزملاء شغالين في هالمجال ، قال لي الأول :
يكلف عليك الملحق بدون الكهربائي و السباك و بدون الباب و الدريشة و من غير
الفرش و الأثاث بـ 15000 ريال . و قال لي الثاني : يكلف عليك 27000 ريال
شامل البناء و الأبواب و الدرايش و الباب و الدريشة . !
و جبت لي باكستاني : و جاء وشاف المكان و قال لي يكلف عليك 80 ألف ريال
مع الأعمدة ، و خمسين ألف ريال بدون أعمدة !! <=== عطون أقرب بارود يا جماعة




أريد مشورتكم في :
كم تكلفة المشب تقريبا ً ؟
وين ألقى شخص متخصص و غير طمّاع ؟ طبعا ً أنا ساكن بـ ( بريدة )
وش نصايحكم للي يرغب ببناء مشب ؟
وش أفضل : المدخنة الجانبية ؟ و لا السماوة ؟ ( الفتحة اللي أعلى السقف ؟ ) ؟



كما أرجو من الأخ الكبيييييير : سرهد عدم الرد على موضوعي ..
لأنه يحرجك بكرمه ! و تفانية و تعليقه على الشباب و لا أحب أني أكلف عليه ..
الله يفوقه و يرزقه من خيري الدنيا و الآخرة .


مزحة ع الطاير يا أبو عبد الله .


رجاء ً لا أحد يناظر تاريخ تسجيلي بالمنتدى
مقارنة مع عدد المشاركات

[قارمن]

على فكرة تراي أرحب بأي فكرة أو أقترح خاصة إذا كان مدعوم بالصور !
تشكراااااااااتي .. للجميع ..

[حرقوصي]

انا ما عندي خلفية عن البناء
لكن بالنسبة للمشب والمدخنة خاصة
حاول انك تخليها مبنيه من الحجر الأحمر ذاك البلك الصغير
لأنه ترتفع حرارته بسرعه
والمدخنة اذا ارتفعت حرارتها تبدا تشفط الدخنه اللي بوسط الغرفه كأنها شفاطه كهربائيه
وحاول انك توسعها شوي عشان ما تكتم

[شاص]

السعر يختلف حسب المساحة وحسب نوعية البناء .. إذا تبي السقف صبة أكيد بيكلف أكثر من الحديد والقرميد .. عموما إذا السقف حديد وقرميد لمجلس 4 في 6 أذكر إني سعرت التكلفة بحدود 30 ألف تزيد أو تنقص

[محب للمكشات]

والله مشب 25 غالي .... مادري كيف اسعاركم في نجد ... بس في الجنوب بيت كامل تكلفك من 50 الف وانت طالع

[سرهيد]

السلام عليكم

هلا وغلا

اجل ارجو من سرهيد لا يرد ههههههههههههههه يا زين الذهانة

ابشر بالسعد فديت هالخشم ولو انك في الرياض جبت اللي صلح لي لمحلك يشوف واتفق انا معه كن المحل محلي .

بس عاد ما باليد حيلة .

اتمنى ان لا تتردد في تصميم الغرفة من الطراز القديم ( النجدي ) فهي فعلا ممتعة في الصيف والشتاء .

يعني ركب فيها مكيف ولو ان تفكيرك انها للشتاء فقد تحتاج للتركيب فلا تندم على ذلك .

بعدين انتم يا اهل القصيم ابدعتم اكثر في تصميم غرف الطين حيث رأيت على الواقع ابداع لا مثيل له

نقاط مهمة احرص على ارتفاع السقف وليكن كما يقوم به اهل القصيم وهذا يساهم في جعل الجلسة بعيدة عن الدخان ...

اطوال الغرفة جدا ممتاز ..

لو كنت تبي تصميم غرفة كما لدينا في الرياض سقف لا يتجاوز ثلاثة متر في طول 4*5 هذي ما تتعدى 15000 بدون الدرايش والابواب والكهرباء ، مجرد شغل الطين والوجار ...

ولعلي اكلم اليماني اللي صلح عندي واذا بيطلع للقصيم عطيتك رقمه تكلمة

هذي بعض الصور لما لدي

وهذي صورة من الداخل

راجع الرابط التالي وبيفيدك في التصميم

http://www.mekshat.com/vb/showthread.php?t=197546

[al_rayan]

اخي قارمن

الله يوفقك ويسهل امرك

طلبي من الاخ سرهد

رقم اليماني على الخاص

جزاك الله خير

[قارمن]

الله يسلمكم واحد و احد ، و جزيتكم خيرا ً..


أخوي أبو عبد الله ـ، اللي أعرفه أن الكمار يكون على يسار الشخص اللي يجلس بالمُحكمة [بضم الميم]
و ذلك أسهل عند صب القهوة و الشاهي أنا مستغرب كيف أنت عاكس مكان الوجار ! ؟ ممكن نستفيد ؟


وشكرا ً على الرابط ،
إلا أنني أطمح بالمزيد ، و شف لي عن اليمني لا هنت .. يا غالي ..

[سرهيد]

اخي قارمن

الله يوفقك ويسهل امرك

طلبي من الاخ سرهد

رقم اليماني على الخاص

جزاك الله خير

ابشر طال عمرك

يجيك على الخاص فديت هالوجه

تقبل احترامي

[سرهيد]

الله يسلمكم واحد و احد ، و جزيتكم خيرا ً..


أخوي أبو عبد الله ـ، اللي أعرفه أن الكمار يكون على يسار الشخص اللي يجلس بالمُحكمة [بضم الميم]
و ذلك أسهل عند صب القهوة و الشاهي أنا مستغرب كيف أنت عاكس مكان الوجار ! ؟ ممكن نستفيد ؟


وشكرا ً على الرابط ،
إلا أنني أطمح بالمزيد ، و شف لي عن اليمني لا هنت .. يا غالي ..

هلا وغلا

صدقت في سالفة موقع الكمار ، وقد فكرت فيه ، لكني من النوع اللي يبي يستمتع بمنظر الكمار كلما دخلت فتعمدت اضعه امام وجه الباب ليكون في الوجه ليعطي منظرا افضل

واليماني ابشر بسعدك اكلمه اليوم واشوف وش يقول بس يمكن يبي دهن سير علشان يجي للقصيم خاص لانه معه عائلته وساكن في الرياض ...

وربي يوفقك لكل خير

تقبل احترامي

[محب الشبه]

شوف الرابط هذا
http://www.mekshat.com/vb/showthread.php?t=370408

[عاشق السيل]

وعليكم السلام ورحمة الله وبركاته ،،

شف وأنا اخوك أنا توي مسوي ملحق وفيه مشب وبعطيك بعض النصايح البسيطة يمكن تستفيد منها :

1 ـ التكلفة تقريبا 35000 ريال شامل كل شي والسقف صبة ،،
2 ـ حاول تخلي المشب والباب بنفس الاتجاه علشان مايضيع عليك الملحق لأنك بتستخدم المشب ثلاث أو أربع شهور بالسنة والباقي بتستغني عنه ،، إلا إذا خليت الوجار مخفي !!
3 ـ لا تكبر الكمار لأنه بيكلفك ووتورط بالرفوف لازم تملاها ،، يعني 180 * 160 مناسب جدا ،،
4 ـ ركب مروحة شفط حقة الحقباني ( حديد ) فيأعلى المدخنة بتنفعك خاصة بأول الشبة ،، وحط لها دايمر علشان تتحكم بالسرعة ،،
5 ـ ركب مكيف اسلبت لو كان غالي تراه أبرد من العادي وأهدأ صوت ،،
6 ـ الباب خله حديد بتصميم خشبي علشان يتحمل الأمطار وديكوره حلو ،،
7 ـ كبر الدريشة قد ماتقدر تبي تحتاجها للتهوية ،،
8 ـ المحكمة يمين أو يسار ماتفرق أهم شي المكان المناسب بالملحق !!!
9 ـ لابد من وجود دورة مياه ومغسلة جنب الملحق ..

والله يعينك ويسهل عليك وبالتوفيق يالغالي .....

[قارمن]

عاشق السيل ، الله يعطيك العافية نورتنا ..
و لا أخفيك استفدت من هالمعلومات و يبي يستفيد غيري الكثير ـ إن شاء الله ـ ..
خاصة مقاس الكمار كنت أفكر فيه كثير . و طبعاَ ضروري يصير مع المشب [خدمة الحمّام و المغسلة ] ..


أتمنى يكون هذا الموضوع ملف متكامل لكل من يسأل عن المشبات و أفكارها و النصائح و التجارب ..
الفائدة مشتركة للجميع دون استثناء ..

[شاص]

أبوعبدالله .. بناء الغرفة مع الوجار والمش كلف 15 ألف ؟ أم أن الغرفة مبنية مسبقاً ؟ السقف صبة ؟

واحد من الربع عنده مجلس 5 في 7 مبني ويبي يسويه تراثي كم تتوقع يكلف؟

[سرهيد]

أبوعبدالله (سرهيد) وش سقف الملحق اللي عندك ؟

واحد من الربع عنده مجلس 5 في 7 ويبي يسويه تراثي كم تتوقع يكلف؟

هلا وغلا بالعزيز الغالي

ويحيك ربي

انا عندي غرفتين وحده في الاستراحة ووحده في البيت

اللي في البيت الغرفة قومتها عظم وتم تلبيسها بالطين يعني السقف صبة وهذه بعض الصور





اما اللي في الاستراحة الجدران بلك والسقف طين نفس الطراز الأول وهذه صور لطريقة عمله اليماني الله يوفقه ويطول بعمره

وهذي صورة لابو بلال وهو يصف الرموح على الخشب

وهذي صور للخشب من تحت