من رجال المرور او من عنده خبر بالحوادث

[صباح القايله]

السلام عليكم
ياخوان صار على حادث 24 رمضان
والخصم مخطي مية بالميه قاطع اشاره السياره قدره شيخ المعارض الشفاء
الفرق 17 الف
الرجال رفض يدفع المبلغ المطلوب وخفضتله لكن رفض يدفه يقول تبي 7 الف قلت لا
قالو المرور تحول القضيه شرع هل سوف اخذ حقي كامل من الشرع وهل السالف تبي تطول
المرور يقول ماء تحول القضيه شرع حتى يجي الخصم بشيك بالمبلغ كامل ويرفق مع القضيه بعدين تحول المحكمه واذا ماء جاء الخصم بالشيك يبون يسوون له تعميم
التعميم وش يفيد
الزبده انا متعطل وبلش هل يحقله يعترض على تقدير شيخ المعارض
او اصلح السياره وماء عندي مشكله
السوال اخاف اصلح السياره ويقولن نعيد النظر في الحادث
يليت الى عنده معلومات يفيدنا وشكراااا

[أبوعابد 22]

اول شي الحمد لله على السلامه والله معندي علم ياذيب

[مخايل البراق]

اولا الحمد لله على سلامتك
بعدين مايطلع من القسم وقت الحادث الا بكفالة
ارجع للقسم ويطلبون المتسبب بالحادث واذا ماجاء يطلبون كفيلة
ومايطلع من الحجز الين يدفع قيمة التقدير المقدرة من شيخ المعارض
اتمنى لك التوفيق

[ابومناحي]

اسمع يوجه الخير
اسمع ياوجه الخير اذا خصمك عنده وظيفه اعرف ان حقك بيجي حتي لو يماطل واذا انت مشغول وكل واحد له لسان
وانتبه تتنازل له

[ابومناحي]

منتدي الحقوق المدنيه يفيدونك احسن
http://www.cojss.com/vb/forumdisplay.php?f=23

[أبوعابد 22]

نصيحه اخوي لاتتنازل عن حقك

[نباطه]

اول شي الحمدلله على سلامة الجميع
اذا كان خصمك قاطع الاشاره وصدمك فمعناته انه مدان 100%
حتى لو معه تأمين يسقط عنه تغطية التأمين للحادث
حيث انه خالف احد شروط عقد التأمين
بالنسبه لتقدير سيارتك من 3 معارض اجراء صحيح واعتراضه على التقدير فالواقع احتمال ان يكون لغرض المماطله وطلبه احالة اوراقكم للقاضي هذه للماطله ايضا
فأقترح عليك اولا-تصوير السياره بأكثر من صوره لمكان الصدمه من عدة زوايا
ثانيا -قم بتقديم استدعاء لرئيس شعبة الحوادث بالقسم الذي يحقق بالقضيه تبين فيه رفضك للاحاله حيث ان الحادث من تاريخ 24-9
وعند رفض طلبك قم بطلب من قسم المرور ورقة اصلاح للمركبه خاصتك نظرا لتعطل مصلحتك ويكتفى عند احالة الاوراق للمحكمه بدعمها بالصور
ثاثا-عند حضورك الجلسه عند القاضي أبن له تضررك من مماطلته وتعطل منفعتك بالسياره وطالبه بكامل المبلغ وطالبه بتعطل المنفعه
هذا ونرجو من الله العزيز الحكيم ان ييسر اموركم لكل خير.
وشكرا ........

[صقر نجد99]

اخوي الغالي الحمدلله على السلامة

بالفعل خصمك مايفكة المرور الا بكفاله غراميه حضوريه

اول شي تطالب المرور بأحضار خصمك او كفيله

ثاني شي تاخذ صور من اوراق الحادث والتقدير وتروح للمحكمة وترفع عليه قضيه اذا كنت تعرف مكان عمله

يعطيك القاضي خطاب موجهه للعمل بموعد الحضور عند القاضي ويمكن مايحضر معك اول مره وثاني مره

وثالث مره تطلب من القاضي احضاره بالخفاره .

اما في حالة عدم معرفتك بمكان عمله فتذكر للقاضي بعدم معرفة العمل وتطلب التعميم عليه وسوف يحول

القاضي اوراقك الى الامارة للتعميم علية وتاخذ رقم المعامله وتراجع الامارة بعد اسبوع

وبعد ماتراجع الاماره يحولونك الى القسم اللي فيه الحادث وتعميد القسم بالتعميم عليه .

الحل الثاني

انك تكتب معروض موجه الى مقام سمو امير منطقه الرياض توضح ماحصل وان المرور اطلق الخصم بدون دفع

المبلغ مرفق معه تقرير الحادث وتقدير شيخ المعارض وفي الاماره سوف يقومون بالواجب وتذكر انك متعطل

بسبب عدم اصلاح السياره وتاخر الشخص عن انها اجرات الحادث وتذكر انك متظرر بعدم وجود سياره بسبب

مماطله الشخص بك وتتطالبهم بورقة اصلاح حتى تمشي امورك.

والاماره يحلولون المعاملة الي القسم والاستفسار عن الشخص كيف يطلق بدون كفاله وبدون دفع مبلغ الحادث

طبعا كل الامور هذي سوف تتطلب مراجعات ومواعيد الله يعينك عليها

بالنسبه انك تاخذ حقك بتاخذ بس بتاخذ وقت بسبب المماطله والمواعيد من محكمة واماره وقسم

بالنسبه للتعميم على الشخص اذا تم التعميم عليه هناك نوعان من التعميم اما توقف جميع خدماته ولن يستطيع

اجراء اي عمل وسوف يطول

اما التعميم الثاني فهو تعمييم القاء القبض عليه مع ما ذكر في التعميم الاول والتعميم الثاني شبه مستبعد

ارجوا اني افدتك

تحياتي

[صباح القايله]

الله يجزاكم خير ويوسع صدوركم مثل ماء وسعتو صدري
بالنسبه للكفاله هو مطلع الى بكفيل لكن ماء ذكرو انهم يبون يستدعون الكفيل او شي ماء جابو طاريه
انا مستغرب من هنقطه
ابخبركم اخر الاجرات الاربعاء قيليلى تعال اذا ماء جاب الشيك يبون يسوون له تعميم والله ييسر الامور

[900]

الله يعيينك

والله انها شغله
ذكرتني قبل ثلاث سنين وانا واقف عند الاشارة وقف وراي راعي جمس وبعد شوي مادريت الاهو صادمني صدمة قويه مهب صاحيه
يوم نزلت قلت وشفيك قال نشبت رجلي بين البنزين والبريك
عاد تخيل جمس وصادم مرسيدس
راعي جمس يقووول بسيطه وانا معصب اقوووله بسيطه بعينك هذي 5000 ماتصلحها
وهو ركب سيارته وشغلها ويم جيته حاول يصدمني وهرب
عاد بلغت وخذت ورقة اصلاح وصلحت موتري على حسابي
وجلست ادور عليه لان عندي رقم لوحته وخذيت اسمه من المرور
وكل ماقابلت واحد من المعارف والشباب نشدته عنه والحمد لله جابو علمه الشباب ووظيفته ورحت علمت المرور وارسلو له استدعاء وجاء وقال انا ماصدمتك ولا اعرفك
قلت شف انت عاطي موترك من وبعد شد وجذب طلع واحد من عياله
والحمد لله عطوني فلوسي

وعسى الله يعوضك ويهدي غريمك

[طير شلوى نجد]

الله يكون بعونك

[صباح القايله]

الله يسلمكم جميعن ويعين الجميع

[بدوي جنوبي]

حمد لله على سلامتك
يعلم الله سلامة وصحة الانسان لا تساوى أى ثمن
أخى الكريم
امكن الرجال وضعه المادى صعب
عشان كذا قالك ما عندى الا 7 الاف
أذا رأيت ان خصمك فعلا وضعه المادى صعب
أرضى بما قسمه الله لك ومن عفا وأصلح فأجره على الله

حاول تتفقوا على مبلغ يرضي الطرفين لكى لا تتعطل مصالحك
لان المعامله اذا تحولت للشرع بتطول كثير

والله يعوضك خير

[volcano]

الله يكون بعونك اخوي

هذي فايدة التأمين الشامل يصلح سيارتك وهو يطرد ورا خصمك ..

بتقولي حرام اقولك صحيح لكن المفتي يقول ان اجبرتم والله المستعان , والمشايخ ذكرو طريقة التأمين الشامل الحلال لكن اصحاب الراي رافضين لنه بينقص دراهمهم..

موفق

[خوي الذيب007]

حمد لله على سلامتك
يعلم الله سلامة وصحة الانسان لا تساوى أى ثمن
أخى الكريم
يمكن الرجال وضعه المادى صعب
عشان كـــــذا قالك ما عندى الا 7 الاف
أذا رأيت ان خصمك فعلا وضعه المادى صعب
أرضى بما قســــــــمه الله لك ومن عفا وأصلح فأجره على الله

حاول تتفقوا على مبلغ يرضي الطرفين لكى لا تتعطل مصالحك
لان المعامله اذا تحولت للشرع بتطول كثير

والله يعوضك خير