صراحة ما توقعت فورتشنر 4 سلندر (صدمه) ارجو الدخول

[سدرك]

يا اخوان شريت فورتشنر 2011 قير عايدي دبل

ورحت اجربه في النفود

اداءه ضعيف جدا واذا حطيته بالثاني يموت العزم حتى لو كانت الطلعه خفيفه

اجل لو بروح الربع الخالي مدري وش بيصير !!!!!!!!!!!!!!!!!!!!!!!!!

نوع الكفرات بريدجستون قاسيه ما ادري اذا السبب منها ولا لا؟

منسم على 10 جميع الكفرات

نصيحة اللي يفكر يشتري 4 سلندر يتسلف ويزود ويشتري 6 سلندر

[كم كيلو باقي]

الكفرات تلعب دووور كبير يالغالي


ولا تتحسف ولا شيء .. اشتر جنوط عريضة وركب عليها هانكوك وحط 10 بكل كفر .. وان شاء الله بيتحسن الأداء بشكل كبير
وحبذا لو يكون عرض الكفر 275 او 285

[ددسن 2008]

طبيعي اربعه سلندر ضعيف .. ولا تكبر الكفرات ترا بيطيح عزمه زياده

بصراحة الموتر ممتاز لكن وزنه ثقيل على اربعه سلندر ما ينفع حاول تبيعه وتاخذ سته سلندر بتفرق واجد

واذا تعذر عليك البيع بسبب الخساره حاول تغير الجنوط الى 15 وكفرات هانكوك بيخف عن اول

الله يوفقنا واياك ومن يقرا

[كثير السؤال]

يولد الاجواد كد طلعت مع قروب فورتشنر بتايوتا العربيه كلهم مايغيرون النمره عن واحد اذا جو يرقون طعوس واسولف معهم يقولون الفورتشنر كذا مايعطيك الا بواحد

[أبو لافي]

اخوي سدرك اذا تأزمت عندك الامور وتبي تطلع طلعه طويله شوي اشبك الثقيل وقومه بالثاني الين قبل لايقطع والقطه بالثالث مع شوية مرونه بالدركسون اذا كان الطعس ناعم (رباضه او ريغه او بودر)اتمنى اني افدتك

[أطلال نجد]

حاول تبيعه وتأخذ سته سلندر إذا كنت راعي تطعيس ومراقي وتبي عزم قوي .

[من انت]

اربعه سلندر فاشل وبقوه مكينته مكتنة هايلوكس وهو ثقيل عشان كذا يموت العزم

واحد من خوياي معه فورتشنر 2006 قير اوتو 6 سلندر ماشاء الله يماشينا وانا على الفكس آر 2004

وقوي حتى في الطعوس وهو اوتو ماشاء الله

نصيحه بعه وخذ موديل 2012 6 سلندر

[FORD1969]

سته سلندر ويالله يطربك

[ساهر حايل]

اخوي اكيد انه ضعيف شوي بس عليك بالهواء نزله الى 10 او 8 بس وراح تشوف مشيه وغير كذا الفورتشنر بالطريق الصعب لاتغير النمره عن 1 اذا خفيف وال3 او 2 لاصار الدبل بالثقيل .. ولايهمك النمره لو طولت عليه ماعليه يتحمل ..

[المميـز]

:

الكفرات اللي تجي عليه قاسيه جدا

لابد انك تنزل الهواء إلى 10

وثاني شي وهو الأهــــم

نفس نمر قير الفورتشنر العادي طويله جداً

يعني خلك دايم حاطه بالاول وانت تتمشى بالنفود لاتعطيه الثاني ابد

:

[غواص وقناص]

اخوي تراه اربعة سرندل يعني طري 10
وخله في الواحد

وحتى الستة انا معي ما اطلع فيه الى ب الواحد

وترى الأربعة يجمل بس لا تقارنة بسيارة 6 سرندل
وا6سرندل لا تقارن ب8 سرندل

وبا التوفيق

[ابو خالد 1992]

جرب تماتيك 4 سرندل وش الفرق حتى 6 سرندل القير العادي موب ذاك الزود الأكيد ان التماتيك 4 او 6 سرندل افضل بمراحل من القير العادي

[drrrb-503]

ياربع معنا اربعه سلندر ٢٠٠٨قير توماتيك ننسم ١٠ ونتمشى في النفود ونراقي وبدون دبل ويمشي زي الحلاوه مشاء الله تبارك الله

[HAS5SAN]

ياربع معنا اربعه سلندر ٢٠٠٨قير توماتيك ننسم ١٠ ونتمشى في النفود ونراقي وبدون دبل ويمشي زي الحلاوه مشاء الله تبارك الله

الاعتماد في التطعيس على النحو التالي :
50% السائق
50% السيارة

[ابن عكاش]

ياربع معنا اربعه سلندر ٢٠٠٨قير توماتيك ننسم ١٠ ونتمشى في النفود ونراقي وبدون دبل ويمشي زي الحلاوه مشاء الله تبارك الله

كلامك كذا والله اني في المحلية يوم الجمعة الماضي كنت جالس فوق طعس المهم جاء راعي فورتشنر 4سرندل اوتوماتيك المهم كان يتمشى يوم اقبل على الطعس قلت بيشد والله انك يالله تسمع حنة الموتر ورقى الطعس وقام يسايف ماشاء الله عليه