السلام عليكم ورحمة الله وبركاته
هلابكم جميعا مشرفين واعضاء وزوار
من الأخوه وألأخوات
سالفة اليوم من امريكا الشماليه وبالتحديد من كلورادو
من فتره ليست بالقريبه سافرت للولايات المتحده الامريكيه واستقريت بدنفروهي احد المدن الكبرى لولاية كلورادو
هي مدينه جميله وتعرفت على كثير من الأخوات السعوديات والعربيات والمسلمات من البلدان الاخرى ومن امريكانفسها وجميعنا ولله الحمد محجبات بعبائه وغطاء الرئس والوجه ..هذا من فضل ربي..
كنا نذهب كعوائل للحدائق والبحيرات بالإعياد والمناسبات ونجتمع ويجلس الرجال بمكان والنساء بمكان ليس بالبعيد عنهم لتأخذ النساء راحتها بالتغريد!!!!!!!!!!!
بذاك اليوم كنا ثاني ايام عيد الفطر المبارك ورحنا من بعد صلاة الفجرلموقع بالغابه به نهر وشلال صغير واشجار كبيره وعاليه وهي بعيده عن المدينه ما اعرف كم كيلو لأنهم يستخدمون الميل بالمسافه وجلسنا واستمتعنا مثل ما يقولون بتعبير المدرسه
النهر قدامنا وفيه شلال صغير وخرير الماء يرد الروح بس لو انهابرياضي الحبيبه بديرتي السعوديه. .وهو المكان اللي اخترناه للجلوس والاستمتاع بجمال الطبيعه.
يوم صارت الساعه على 11 صباحاً جت وحده من الاخوات قالت بروح اطلتز رجليني تعبت من القعده على بالها انها بطعوس الدهنا !!
يابنت الحلال ما يصلح تروحين !!قالت ابد ما جايني إلا كل خير ..طيب علمي ابوكم ..قالت مهوب لازم انا عن 10 رجال حتى قالو لها الامريكيات المسلمات اللي معنا خطر وصكت اذانها ومشت؟؟؟؟
وعيننا لها اشغلتنا نخاف من شي وفيه من يطلع يدور ياكل ما بعد صاربيات شتوي باقي حول شهر او اقل يوم قالت وحده ام علي مدري وش تلقط من الارض وهي تشوف حركتها حول الشلال وتميزها بعباتها البنيه عن خضرة الارض بس بالأنجليزي والتفتت امريكيه قالت!!!
No .noooooo
يعني لالااااااااااااااا
That is bear
يعني هذا دب
وما عاد شفت احد حولي وكني فقدت الشعور ماأدري وش صار ضربت الانبيرات عندي والله وبتصيرين عراميش ياقوافي همن بتصيرين سماد الله يكرم السامعين وليته سماد نخله يالله من فضلك إلا سماد لشجرة مايبي لها سماد من اللي هي فيه من النعمه وديرة كفر
وجو الرجال ويطقطقون بقوه اللي بقدر واللي بطاسه لأنه ينزعج من الصوت العالي وراح وهو اصلا ما قرب لنا هو عند الشلال يبي يصيد له سمكه ..كل ذا وانا قاعده وام علي الحبيبه اول من ضف عياله وركبت سيارتهم الفان وصكت الباب حتى عن رجلها ودلت تصارخ
المهم جو الرجال عقب ماراح او انحاش سبحان الله !!طيرو الدب بدقايق ويحسبوني قاعده من الشجاعه ويعنني ولا همني ويهاوشون وش قوة الباس ولاهمتس وهو دب وانا لاأتصال مع أحد لا أستقبل ولا أرسل..المفاجئه شلت كل الحواس والأطراف وزين اني انفس لين الحين..
تحياتي
اختكم
.. قوافي ..