السلام عليكم ورحمه الله وبركاته
اخواني اعضاء ومشرفين وزوار منتديات مكشات
حياكم الله جميعاً
واشكركم على حرصكم الدائم على القصص الجميله
وان شالله تكون هاذي الخيمه لقصص النادره والتي لم تنشر
لا اطيل عليكم في الكلام
فيه قصه ذكرتها وكانت جميله في ماضيها
وحياتها وحزينه في اخرى نهايتها
كانت فيه بنت من بنات العرب من اول
عمرها 15ألى 17سنه
والبنت مزيونه ومحبوبه عند اهل الديه
تروح تسرح بالبهم وتزيها وراعية بيت
وتطبخ وتروح وتجي وكل شي تسويه
وما فيه ازين من بنات اول
والبنت ماشالله عليها يقال كان يضرب بها الوصف من اول
وكان فيه شايب عساس شاف البنت ولا كلمها ولا شي
والشايب عود عود وشاعر ومن شافها قام يهوجس فيها
وفي سنه من هاك السنين عزمو اهل ديرةالبنت انهم يشدون
يدورون لهم منازل وكان وقتهم اول الشتاء
ويوم جاء هاك الليله قامو الرياجيل والحريم كلن يزهب عفشه
وكل يرتب نفسه ويضف ويرتب الي يبيه من اليل
والبنيه عند اخوانها يزينون ويرتبون وتزين الحبال عشان يكون كافي لهم
ويوم جاء نص الليل والعرب تهجد ما تشوف احد ضلام هاامد
ومن بكره ويوم اصبحو كلن يطوي بيته ويحطها على ذلوله
وهم يشملون ناصين المكان الفلاني
ولا ينطحهم الشايب ويسئل وإلا عينه على البنت مره ثانيه
كان يسئل عن عرب ويبي يشوف وين منزالهم
ويوم مشى وإلا عينه على البنت ويتعداها وهو يفكر فيها
وقام يعشق البنت
ووده يتبعهم وين ينزلون ووده يخطب البنت
ويتبعهم من بعيد ويوم رابع وإلا وصلو في هاك النفود
وكل بيت مشغول يبنون بيوتهم
ويوم جاء ثاني يوم وإلا الشايب يجي
عند اهل البنت ويخطبها
راعي البيت يحسب انها يخطب لواحد من عياله
اثره له
المهم كتب الله لهم انه يتزوج البنت
وراح فيها لديرته
والشايب تاجر ومال وحلال
وصاحب جاه
ويوم وصل للديره وإلا العرب ما تسولف إلا فيه
والحريم ما يسولفن إلا فيها من جمالها
وعزها ودلالها
مشت السنين
وعاشت معه ويوم وصل عمرها حول 19سنه
وهي معتنيه بالشايب
ولكن ما احد يخلا والحساد واجد
فيه كم حرمه وكم عجيز
يجون عند البنت ويقولون
والله انك مضلومه يا فلانه
انتي وش تبين في الشايب والله انه
ما يسوى شي
وانتي بنت مزيونه وصغيره وعيال الشيوخ يتمنونك
وكل يوم على الموال يكرهونها ويحرضونها في زوجها
البنت كنها كرهت الشايب وهو كبر شوي
وفيه سنه من السنين شدو العرب
وينزلون حول نقا الساريات حسب الرواة
وكانة في هاك الليل امطار عليهم وبروق
والبنت كانت تفكر في اهلها وحنت لهم
ويوم هدا المطر تروح البنت وتقعد بطرف هاك الارطاة وتخايل البروق
ومن جهة منازلها
ويوم اصبح الصبح تروح
للشايب وتطلب من الطلاق
الشايب ما صدق وقال يا فلانه وش الي صار لك والله اني ما زعلتك ولا قلت سوي وافعلي عسى ما شر
قالت"قسمي الي عندك كليته وما عاد فيه شي
وحنت عليه انه يطلقها
وطرقها
لديرتهم
وطمحة عن رجلها
وعرف رجلها انها ماهي من كيفها عرف انه من حريم الديره الي يكرهونها في زوجها
وهو حزن عليها وعلى فرقها وعلى دلالها
وخفتها وخوفها على رجلها
وحزن عليها ويوم راحت البنت لديرتها
ويوم جاء الليل وهو يخايل البروق
بكل حزن على فرقا حبيبته
وقال ابيات جميله عنه وعن العجز الي كرهوها في زوجها ,,,,وينشد ويقول
البارحـه ياسعـد جريتلـي ونـه
ونة غريب قعـد ماحولـه الوالـي
حنين هرش قعد في حامـي الكنـه
وقف على الما لقاه من العرب خالي
يحن واتلـى حنينـه جرلـه ونـه
قام ايترجى على مطويـة الجالـي
لاواعشيري دروب العجـز غونـه
اطلب عسى العجز مايبقى لهن تالى
يالله عسى مالهن حق مـن الجنـه
يالله عساهن طعام النـار يالوالـي
وسلامتكم اخواني
اعذروني اذا حصل اي نقص
واعذروني اذا حصل اي تقصير او خطأ في السالفه
هاذا ما طاب لي بأن اسرده لكم
وانتظروني في سالفه اجمل ان شالله
وكما بدات في السلام عليكم
انهي هاذي السالفه في السلام عليكم ورحمه الله
وتقبلو تـــحــيــــات
مـــــــــحــــــــــــبـــــــــــكم
مـــــحـــــــمـــــد الـــــظـــــــاهــــــري