السلام عليكم ورحمة الله وبركاته
والله يسعد اوقاتكم بالخير والمسرات يا اهل .....مكشات
اقدم لكم ابيات متواضعة عسى ان تحوز على رضاء الله ثم رضاكم.
الشمس غابت واقبل الليل برداه=كل النجوم منوره من سواده
والرمل يبرد حر رجلي ماطاه=في راس طعسٍ جايزلي براده
والدلة الصفرا على النار مركاه=بنت الغضى والجمر نظم القلاده
والشاهي الكايف ينادي مناداه= لمدور السمره وغاية مراده
ولـ الشاعر الي يعطي الحرف معناه=براد خادر والحلا به زياده
الكاسة الاولى على الراس مرقاه=والثانية تنسي التعب واللهاده
مبعد عن العالم بهرجه ولغواه=ومصارع الزحمة واهل النكاده
اسرح بفكري بالنجوم المسماه=واحس في نفسي خشوع العباده
جلست صفا تسوى القصور المبناه=وصوت المكيف والغرف والوساده
نشقى بها الدنيا على غير مشهاه=والله حكيم وماضيٍ في مراده
وما انته محصل كل شي تمناه=تسهر وغيرك مهتني في رقاده
والعبد ماله غير مقسوم مولاه=والصيد يقنص بالهدى والركاده
واغنم من اوقات السعد طيب مجناه=والعمر موجه للقمم وارتداده
مسكين يالي لك زمان تحداه=اتعبت روحك والزمن في عناده
لو زان لك امر على حين مبداه=لابد تلقى لويته واشتداده
والمسعد الي للتقى تمشي خطاه=انا اشهد انه ذاق طعم السعاده