المشاركة الأصلية كتبت بواسطة aan
يا جماعة الخير الجن ما يأذي الا من يزعجه بالطييران و غيره
الجن اهل طرب وفن ودايم ينسمعون وهم يغنون
يحبون السامري والطرب وفلة الحجاج
واعتقد ان الزار جن يطرب ويتلبس الانسان والدليل انك تشوف شايب يرقص بالسامري رقص شباب وبالعكس تشوف واحد في ريعان شبابه ويرقص رقص شايب ضعيف والسبب في ذالك ان الشايب اللي يرقص رقص شباب متلبسه جني شباب وهو اللي يشيله ويرقصه ونفس الشي الشاب اللي يرقص رقص شياب متلبسه جني شايب ويالله يقوى يشيل نفسه
والشاعر المتمكن يقولون عنه متلبسه جني اثناء الشعر او ملهمه الجني بالقصيد ويقال لكل شاعر قرين من الجن يقول عنه الشعر
وبالتراث العربي كثيرا من ذالك ومنه ماروي ان مرثية مالك بن الريب قايلها جني
هذي قصيده يروى ان احدهم نام في غار اثناء الليل قرب بلد المجمعه وسمع الجن يتغنون بهذه القصيده
ياقارع الدمام سـم واقرعـه
واعطيك عذقينن ليالي الصرام
سقوى سقى الله وادي المجمعه
من رايح يوضي بجنح الظـلام
الزرع مايسقم لمـن ضيعـه
والطرش مايسنى بليـا طعـام
ياذالحمام اللـي لكـن لعلعـه
فوق الجرايد والخلايـق نيـام
بالله عليك الصـوت لاترفعـه
تقعد غريرن سابحن فالمنـام
توه صغير الديـد مايرضعـه
مستنكرن عقب الرضاع الفطام
اللي سرى فاسري على مربعه
ثم ارجعي من بعدهـا للمنـام
الموت جاني ماقويـت امنعـه
موز بحالـي واهنـي الغـدام
خلخال سيدي وان مشى يقرعه
قرع الجرس للي تقود الجهـام
الصاحب اللي عشرته مسمعه
عليه مني كـل يـوم سـلام
والصاحب اللي كز لي مردعه
عليه مني كـل يـوم سـلام
شوفي بعيني مخطره يذرعـه
يسري تويلي الليل يم الهـدام