المشاركة الأصلية كتبت بواسطة ارمادجي11
السلام عليكم جميعا,, ومشكور على هالموضوع وبدون مجاملة..
الحقيقة ويعلم الله سبحانه ان لي قصص في هذا الموضوع لكن ابقول لكم وحده من القصص اللي تطابق كثير من النقاط اللي ذكرها اخونا ويمكن الاختلاف في شي بسيط:::--
التاريخ/اواخر صيف عام1423هـ بعد طلوع سهيل وبداية الهواء النثري.
الموقع /بين الرياض وصلبوخ..ممكن احدد الموقع لكن ما نبغى الاحراج.
المهم فيه مكان يبعد عن خط الاسفلت تقريبا2كم انام فيه شبه ليليا وما شفت خلاف ولله الحمد وليلة من الليالي استأذنت بعض الاصحاب((زملاء في العمل)) قالوا وين قلت ابرقد في البر قالوا ياخوي معك قلت الله يحييكم لكن شرطي عليكم نوووووم قرقره وسهر مابيها ولا مسجل ولا اقرب جهاز((وقت ادهار اجهزة الايكوم والكنود)) قالوا تم واعطيهم الوصف قلت اسبقوني ابمر المحطة وآخذ فطور ولبن وماء..جيتهم بعد نص ساعة-12تقريبا من الليل- طبعا واحد معه كابرس ابيض والثاني معه فورد احمر وموقفين السيارتين على شكل ستة بالعربي وحطيت موتري السفاري وصار الشكل حرف يو بالانجليزي الفتحة جهة الجنوب وجلست معهم طبعا لقيت خوياي ما هم بخوياي((قا....)) بعد دقيقة سمعت صوت رجمة حصاة صغيرة في سيارة الفورد قلت وش الصوت قال واحد منهم انشاء الله انه الكابرس - تعرفون بعض السيارات بعد الوقفة يطلع صوت طقطقة- يوم قال انشاء لله عرفت ان فيه شي وتكرر الهجوم اكثر من8مرات على سياراتهم فقط سيارتي ماجاها شي طبعا فيه واحد منهم انقطع ارساله وحاط بطانية غاطين على راسه قلت شل البطانية ولا رد قال خويه انه راح قبل تجي عشان يقضي الحاجة -اعزكم الله- ورجع يمشي الف يقول ان فيه ناس يرجمونه ..
طبعا انا متأكد اننا وسط المذكورين لكن قلت بتأكد وحركت الجيب ودورت في دائرة قطرها يمكن كيلومتر ولاشفت حاجة نهائيا ووقفت نفس الموقف وقبل انزل جاني خوينا الصامت يقول معك شي للحرقان قلت ليه خفت يا... وتوني مكمل كلامي الا الضربة على سقف السفاري , قال وش ذا قلت لا يهمك هذا اريال الجهاز طايح وخّر خلني انزل , راح وانا اطلع اشوف فوق الى ذيك الحصية كبر الابهام وانا انزل واخليها. واجلس معهم ويزيد الهجوم على روسهم وانا اتلقف واصيح بأعلى صوتي بكلام ما ودي اقوله صراحة لكم وعينك ما تشوف الا النور ويجيني ضربة طائشة في الراس لكن سبحان الله كأنها من يد طفل ويمزح قلت بأعلى صوتي سرينا بنغير المكان لكن علي الحرام لين ناخذ عفشنا وبغينا نتصادم.. تخيلوا انا في المقدمة وخوياي قلبوا سياراتهم جيوب.طلعنا مدري كيف حتى كبري العمارية ووقفنا طبعا فيه انوار واعوذ بالله التندة حقت الفورد فيها اثار مثل تكرمون مرش الطيور طين ما ادري حصى قلت ابشوف اللي في موتري لقيت الحصاة نفسها مثل راس السمكة وموقع العين فيه فتحة لو تبي حطيتها ميدالية واخذها وامدها على خوياي وكل واحد يقول لالا وانا اللي بطول يدي احذفها على الخط السريع.
لا احد يقول اني ما خفت الا خفت لكن ولله الحمد متوكل على الله واذا قرى المسلم او تعوذ يجب ان تكون ثقته بالله قوية سواء من انس او جن او دواب.. على شرط اجتناب الخطأ والأذية.
والله يعلم اني مازورت القصة واللي معي يشهدون بالشي هذا وموجودين.
والله يستر على من يدور للستر والسلام عليكم.