من الفاو الشمالي ..إلى نفود أم عشر ...إلى فيضة الظلماء ...إلى ربيع سامودة ..بالصور

[ابو شكاع]

بسم الله الرحمن الرحيم

السلام عليكم

رحلتنا الأخيرة من يوم الأثنين الي راح لحد قبل أمس الخميس << ناسي التواريخ ..أكتبوهن تكفون

وأنا قبل أبدأ ودي أهدي هالموضوع بمكشات لصقر وأقول له

يابو أحمد قل الحمد لله إنك ماكنت مع العبارة المصرية الي غرقت ..تتقول وش دخل السالفة ..أبقول لك مدري ...وودي أقول لك بعد تراي خلاص الغيت كل جوالاتك الي مخزنهن عندي ...وإقطع المعرفة ياخوي .. هالمرة بالسهل الثانية الله يستر وين نبي نصير

أعضاء الرحلة

أنا << ما يحب نفسه

العارض

ابو علي

أبو مشاري

أبومحمد

أو راشد

6 أشخاص بـ 3 سيارات ...

التقينا صباح الأثنين بعد ألأرطاوية مع العارض وأبو مشاري الي جايين من الرياض

همن كملنا مسيرتنا إلى الحفر ومن الحفر فرقنا شمال بحدود 7 كلم إلى حد مفرق الفاو الشمالي ..ومنها نزلنا يسار ومشينا مسافة لابأس به يعني يجي له حول ال 15 كلم صحراء ...وصرنا بين شبكين ..( محميات ) وتقدمنا شوي ...وتكينا في محل مليانن عالم ... وتشوفهم يلقطون .. بس الأرض مهيب محفورة ...والي يدخلون الشبوك تطردهم الدوريات ...حكرنا التكية وطقينا خيمتنا ...وتعشينا ...وسمرنا بجو فيه هواء شديد ومزعج

هنا كان التصوير بكاميرة الجوال ...والبلوتوث بالكمبيوتر هذا ما يعمل لذلك هن 4 صور لعلي اضيفهن بعدين

بداية الصور من هنا

.... إذا كنت مكشاتيات ...فهذا لا يعني أن لاتكون متدهنا بين حين وآخر

بداية الصور من هنا

وهالصورة هي دلالة على نفي الجلافة عننا كتماسيح وأيضا عن قولة إنهم بس ياكلون ثوم ولا يتدهنون ....

بعد مانمنا بالفاو الشمالي .... تحركنا الصبح بعد ما أفطر الشباب ....إلى سوق الحفر عشان الشباب ودهم ان لقوا فقع زين ييشرون

كان السوق غالي ...وكان حراج ...وناس تزاود لبعض

لقطت لكم هالصورة

مزيد من الصور عقب قليل

[ابو شكاع]

وبعدها أذن الظهر وتفرقوا الناس عن الحراج ....
بعدها طلعنا من الحفر بعد التزود بما ينقصنا ..خصوصا الماء
طلعنا ونيتنا هي لأم عشر
وكان الجو مهوب صافي ودافي بزود ...
المهم مصلنا لأم عشر وتعدينا شوي ونزلنا على النفود يسار الخط ....وتكينا تكيتن وش زينه ...بجو رائع مافيه هواء ولا شي ... والعالم مخيمين والناس كاشتين ومستانسين...وطول الطريق من الحفر لام عشر وواحد من الزملاء ينادي بالكنود ويقول ..وقفوا...ذبحن الجوع اباكل شي ..وأليكم بعض الصور






نعود من جديد مع المزيد من الصور
كان يومنا الثاني من أهدأ الأيام من حيث التيار الهوائي الذي فغا روسنا بأول يوم
هنا صورتين وهي تجربة لزوم الكاميرة الي معي والي يعتبر الزوم الي فيها من أقوى الزومات ...والصراحة هي مادخلت مزاجي ..بس الزوم به زين وقوي
هذي الصورة بدون زوم ...وهي صورة لبزارين يتدربون من فوق الطعس بجو رايق


وهنا الزوم بطاقة كاملة أوبتيكل بدون ديجيتال لأنه بالديجيتال تقل نقاوة وجودة الصورة كثير ...أعتقد السبب هو لأن الكاميرة 4 ميقا بيكسل لو الرقم أعلا كان ممكن تاخذ الزوم كامل بتأثر أقل بنقاوة الصورة
هنا لإن الكاميرة مهيب على حامل ... مهيب ذاك الوضوح


وهنا منظر لمحلنا بس من علو



خشم الحصان وش رايك بالزوم

<!-- / message --><!-- sig -->

[ابو شكاع]

عدنا من جديد
مثل ماقلت في اليوم الثاني كان الجو رايق ...وفيه سحب ...
بالليل الشباب مسكت معهم على الذرة ...وجلسوا يشوون الذرة
ويوم ذقته أثره منتازة بقوة
<<< ما عمره ذاقه إلا يمكن يوم بحياته يوم أنه صغير قبل 77 سنة
وهذي صورة الذرة وهى على الجمر ... صارت طلعتنا مغير أكل


وبعد هالوجبة الخفيفة تعشوا الشباب مشوي ...همن نمنا نومتن وش زينه
همن أصبحنا وتقهوينا وأفطرنا وتوكلنا على الله ماندري وين ننروح خخخخخخخخ
بالأخير إتفقنا على فيضة الظلما وهي فيضة محمية بس قلنا ننروح حوله يقولون زين ولاهوب ممنوع
الصراحة كانت أزين ماشفنا ...وكانت نظيفة جدا لأنه محمية ...والدوريات به تدهر شي سيارات شرطة وشي سيارات جوازات << ما أدري وش تبي
وشي جيوب خاصة عليه سفاتي صغيرة ...وكل من مر قالوا اطلع بمكبرات الصوت ...سألناهم عن مكان زين ولاهوب ممنوع قالوا اي محل خارج الفيضة مهوب ممنوع ..قلنا أحلفوا قالوا والله
وهذي صورة للمحمية وتشوفون سيارة الدوريات تمنع الناس

تحركنا عن المحل الي فيه الدوريات....ومشينا يجي لنا 5 كلم ....أو أدون ...ولقينا على إمتداد الفيضة ناس فالين عزبهم وناس طاقين خيامهم بربيع وش زينه .. قلنا شكله هنا مهوب ممنوع ...وندور نبي نحدد لنا محلن زين ...ويجوز لنا هكالمحل
وقبل صورة المحل هذي صورة ابوفيصل وأبو مشاري وهم في خضم البحث عن محل مناسب

[ابو شكاع]

واستقر بنا الأمر هنا في هذا الشعيب الحيلووو


بعد ماتكينا بوه .... سوينا قهوتنا وشاهينا ...وكان متخصص القهوة والشاهي بهالطلعة هو العارض ...همن الشباب اشتغلوا على تجهيز الغداء ... فكانت هذي الصورة الي يوضح بها ابوفيصل وهو ينتظر القهوة تجهز وقدامه يم يم الكاتم وهو يدهر


وهذا منظر من فوق لمحلنا يوم قمنا أنا وأبو مشاري نتمشى شوي ونشوف الربيع

[ابو شكاع]

وهنا صور زيادة ومناظر لربيع فيضة الظلما
وفي خضم <<< لاتفوتكم....أقول في خضم تمشينا أنا ابو مشاري كنا نسمع الدوريات بالمكبرات جت لم الناس وبدت تقول لهم حركوا لاتقعدون
وكان بيننا وبينهم مرتفع ... قلنا غديهم ما يشوفوننا ...
البعارين فالاتن الحجاج


وأنا وأبو مشاري نتمشى ونسولف ...ويوم درينا وينطق من تحت رجيلنا شي ومير ننهبل ..وانا ألي ألقط له كم صورة شوفوه وقولوا لي وش اسمه


ماكوش جلدكم خخخخخخخخخخ
وهذي صورة أوضح له


عرفتوه أو لا ؟؟
هذي أم حبينان
والي يبي يعرف عنه أكثر يدخل الموقع التالي
www.om7binan.com

الغريب بالأمر والي لاحظناه عليه هو إنه تتحرك وماتاقف إلى على حجر ... سبحان الله شكله عشان تموه على جسمه
بالنسبة للإسم أعتقادي أنه أم حبينان ... بس الأكيد منب متأكد ...لأن عندنا بالقصيم أم حبينان بس تقل أصغر من ذي <!-- / message --><!-- sig -->

[ابو شكاع]

بعد مانزلنا لخويانا وأثر الغداء جاهز ...تغدينا ...همن قلنا نبي نتريح شوي ونتكي فوق الرفاعة ...ما درينا إلا يوم جا الجيب يمشي مليون وريالين ...وأثره جيب عادي ولا عليه أناتل ولا شي ...ومير يشر بيده الراكب وقال أطلعوا ... قلنا طيب طيب ..قال خوي لنا بس نصلي وننمشي ... قال صلوا على رحالكم ومير هو الي ينزل قلنا خير خلاص ....ويروحون وحنا الي نشيل العفش همن صلنا همن مشينا ..وقلنا الحمد لله أنهم جو عقب ماقضينا متغدين وإلا تسان علوم
حركنا من محلنا وقعدنا ندوج شوي ...ورحنا لفيضة زينه ولاهوب ممنوع الجلوس به ...نسيت اسمه غدي العارض يذكره ...همن قلنا نبي نطلع شوي لمكان ثاني ...ومير نحرك عنه لأنه كانت مليانتن ناس ...ونروح لمحل ثاني وأثرنا على وقت المغرب ...والأرض ملقوطة ..ونقعد ندور وندور وندور ...ويوم ملينا وأظلمت شوي وحنا الي نفل عزبنا ونتكي تكيتن كله ملح ...قالوا الشباب ماش مايصلح نقعد تسذا بدون أكل
وهم الي يستدنون القلب والكلاوي حقات الذبيحة وهم الي يشوونهن وهذي الصورة


نزلنا الكنوود عندنا وجلسنا نتسمع لقنوات الألغاز ونحاول نحل ...المهم وكان الجو مثل ماتقولون متقلب ... وكنت أسولف مع واحد بالكنود ونضحك وكان بنفود أم عشر ...شوي وقال بدت تنقط علينا ... وشوي يوم قال مع السلامة ياخويي امطرت بقوة ... وبهالوقت كنا نشوف برق من بعيد ... قلنا لخويانا خلو نزين الأمور عشان لو أمطرت ما يحوسنا المطر
ومير حنا الي نحط الشراع على السيارات وصار كأنه خيمة ...ونصف نصلي المغرب ...وحنا بالصلاة ومير تبدأ تبرق وترعد وهوا قوي وهو الي يشيل الرواق ويتسفته على سيارتي ويحوس العفش كله ...وحنا كنا نصلي المغرب ونسمع الصوت ..ويوم سلمنا وأثر الأمور حوسة ...ونجي ننصلحه ومير تبرق وترعد وتبدأ تمطر بقوة مع هوى قوي ...والشراع أقشر بالهوى ما ينمسك وهو كان كبير جدا 10×10 تقريبا
وحنا الي نظف العفش على حوسته عن المطر ونبتل بالمطر وننحاس ..ونجلس بالسيارات قلنا نشوف وش يصير علينا ...
جلسنا بالسيارات قلنا ان خف المطر نبي ننزل ونبني الخيام ...

يوم خف المطر وحنا الي ننزل نصلي العشا
وبعده تشاورنا على إننا نحرك من محلنا لإن حسب الاخبار ان بين الحفر ورفحا أمطار شديدة والهوى يبي يبتل مهوب واقف والمطر ممكن يستمر حسب كلام الارضاد الجوية
المهم وحنا الي نمشي قاصدين سامودة .. بهالقارمن عز الله انه شي ...وناصله بوقت متأخر حول 12 وشوي والشباب ياخذون عشاهم نواشف هالمرة <<<مهيب عادتهم خخخخخخخ
ونروح لم الربيع الي عن سامودة جنوب غرب ...ومليان مخيمات ...وأول شي بنينا الخيام ...وتكينا وأثر الوقت متأخر تعشوا الشباب...وجلسنا نشوف البرقو ونسمع الرعود الى عنا شمال وشرق وأمطرت علينا على خفيف ونمنا ليلة الخميس
والصبح لقط لكم هالصور بعد ما أفطرنا وعينا من الله خير


وهذي بعد

[ابو شكاع]

بعدها إفترقنا وحان الرحيل

أبو فيصل وأبو مشاري اتجهوا للرياض

وحنا رحنا لم القصيم قطوعة من عند نفود الدهنا همن قبة همن بريدة همن الرس

وهذي آخر صورة لنا يوم نزلنا من نفودا لدهنا نعبي الكفرات هوا ومثل ماتلاحظون ... كان فيه هوا وعج والجو مهوب صافي

وهذي آخر صورتين ...وهن صور للكبسة بالمايكرو

كبسة + لحيمتن وش زينة + فقيعات

والثانية صورة للثوم الي أبدعنا فيه بالرحلة

القطة كانت 1500

منها 1400 ثوم والباقي مقاضي

الأولى للحيماتت والفقيعات على الكبسة

والثانية احم .... للثوم الي على الكبسة ...حيث دئبنا << دئبنا <<< عيد مرة ثانية دئبنا على وضع الثوم بالكبسة ( بالبر فقط ) بهالشكل

والحمد لله أنتهينا من تقرير الرحلة ....وعذرا لإزعاجكم بكثر الهرج

ما يستفاد من الرحلة
1- دايم إذا بغيت تكشت خذ معك فراش بر
2- دايم إذا بغيت تكشت خذ معك خيمتن زينة
3- دايم إذا بغيت تكشت رح للربيع
4- دايم إذا بغيت تكشت خذ معك( ما) يكفي
5- دايم إذا بغيت تكشت لاتنسى كاميرات الفديو والرقميات عشان الذكريات الجميلة

6- دايم إذابغيت تكشت لاتكلم صقر أبد ...مايخالف إتصل عليه عقب ماتجي عشان بس تسلم عليه

وسلامتكو
الحين أنا >>> لأني نسيت افرشهن عقب الكشتة

[مسافر1]

رحلة جميلة يا أبو شكاع ,, وصور معبرة .. بارك الله فيك ..

[ابو شكاع]

أخوي مسافر 1
شاكر لك مرورك الجميل وبارك الله فيك يالغالي

[صوح الجبل]

ياسلام .... ياسلام .... تسلم .... ثم .... تسلم .... ثم ..... تسلم ...... يابوشكاع .... رحله جميله ورائعه جداً ..... وفقت بالصورة والقلم ..... نقلاً رائعاً ..... تقبل مني محبتي ومودتي

[الجيب الربع]

أبو شكاع

الحمدلله على السلامه ورحلة سعيدة إن شاء الله

مشروع تسمين الله يطرح فيه البركه.......... لحم وفقع وثوم ورز ومعاليق وذره الله يهنيكم

الا الشباب على خبري ؟ يتغدون وهم يجهزون أغراض العشاء؟

تحياتي للجميع ولك يا أبو صالح

[صاروخ]

ابو شكاع رحله جميله وموفقه

ذره مره وحده ( يعني مسوين انفسكم شوام )

[ابو شكاع]

صوح الجبل
ياخوي تراك احرجتن بهالمدح
مناخري صارن تقل برابيخ سيل هههههههههه
تسلم ويسلم مرورك الجميل ولاهنت يالغالي

[ابو شكاع]

أبو شكاع



الحمدلله على السلامه ورحلة سعيدة إن شاء الله

مشروع تسمين الله يطرح فيه البركه.......... لحم وفقع وثوم ورز ومعاليق وذره الله يهنيكم

الا الشباب على خبري ؟ يتغدون وهم يجهزون أغراض العشاء؟



تحياتي للجميع ولك يا أبو صالح

هلا والله وغلا يابوعبدالله ....مانقصنا إلا أنت بهالرحلة ...
الله يسلمك من كل شر ...أنت شفت وش لون مشروع التسمين ههههههههههه لاعاد أنا كاتب الذرة وجبة خفيفة هههههههههههه
فاتك أبوفيصل انهبل من هالعالم الي تدك دك تخبر اكله مهوب شي هاللبناني
وحنا مانغسل الكاتم لأنه مايمديه إلا وحنا مكشنين فوق حكاكة الوجبة الي قبل
أسأله عن سالفة التونة تبي تضحك
تسلم ولاهنت
والمرة الجاية اضبط أمورك

[المشراق]

بيض الله وجهك أخوي أبو شكاع على هالوصف الرائع لهذه الرحلة والله يمتعك بالصحة والعافية انت وصحبك الكرام ومشكور ألف ألف ألف 0