التعامل مع الشريطيه

[خالد 177]

السلام عليكم

ي اخوان عندي سياره ببيعها وهذي اول مره ابيع سياره وماعندي هاك الخبره

في التعامل مع الشاري خصوصا الشريطيه
ابي نصايحك تجاه الموضوع
هل اني احد السياره او اخليها ع السووم

وكيف اتعامل مع الشريطيه واتفادئ نصبهم وتحايلهم

هل اني ازبدله من البدايه واعطيه في وجه
لاني اضن ماينفع لهم الا كذا
عموما لاتبخلوون علئ اخوكم بالنصايح

[ابوضاري2007]

شوف السوق بكم تساوي سيارتك يعني ابحث عن اللي مثل موديلها وموصفاتها وكم ماشيه
وبعد هذي تقدر تقدير سيارتك واما تحدها او انك تشوف اللي يسومونها وانت حر ببيعها او لا
وياليت تذكر نوعها وموصفاتها وباذن الله يعلمونك الاخوان باسعارها تقريبا

[إبو محمد]

الافضل انك ماتحدها الا اذا كانت شبه جديده وقيمتها معروفه والبيع يبيله صبر وخلك حليم لان البعض اسلوبه يرفع الضغط
واللي بيشتري واكيد بيفحص خذ منه عربون قبل يطلعك من السوق

واحسن في البيع اذا كانت السياره مفحوصه ومجدده عشان تنقل بنفس الوقت عن طريق نظام تم

[مخ سعودي]

أهم شي تأخذ العربون اذا أعجبتك ألسومه ه ويكون 500 ريال واذا دخلوا معرض تأكد أنك تستطيع الخروج بالسيارة لأن بعض الشريطيه يحتجز السياره ويبخسون سعرها أو يلخليها عنده إذا مارجعت العربون
لاتحد موترك حتى تسمع آخر سومه وترى الشريطيه أحزاب كل شوي يجي واحد يبخس عن الثاني علشان تبيع على الأول

[متولع البر]

كلام الاخوان على متمه
وكفوا ووفوا
وانا ازيدك ان افضل وقت للبيع هو وقت الاجازات خميس وجمعه لان الشرايه واجد اما بقية ايام الاسبوع بتحصلهم كلهم شريطيه حتى لو كثروا عليك
اما الحد مانصحك تحدها ابد لكن شف السوق وعين لمثيلاتها على كم تنباع ومافيه مانع لو تاخذ معك واحد من جماعتك له خبره في البيعات

والله يوفقك

[ابونبيل]

اولا انصحك تعرضه بحراج وتاخذ اخر سوم من الموقع وتشوف كم تسام خواتها ثم تنزل السوق وعطهم اخر سوم ولاتحد الموتر انتبه اذا انت جازم على الحد يعني مثلا حدك فيه ٥٠ الف مثلاً قل انا حدي ٥٢ والصامل مانختلف معه ان شاء الله بحدود المعقول واذا سام منك شريطي او اي احد بقيمه تعجبك قل له الموتر شرط اذا كان شرط وبين له اي عيب بالموتر وقل له عطن عربونك مايقل عن ٢٠٠ والافضل ٥٠٠ خله يسوق ويفحص لكن لو قالك نزل لي ولا ما ني شاري قل له كيفك والعربون يكون من حقك انتبه ترا الشريطيه الوجه صبه خلك شديد معهم لانهم يبون يغلبون الي ينحرج.. وخذ اي شي يخصك حطه ببيتكم قبل تنزل المعارض و الله يوفقك في بيعتك
الكلام هذا من خبره بيع حول ٧ مواتر منها الي لي ومنها الي للاصدقاء..

[المميـز]

:

ماشاء الله الاخوان ماقصروا الله يجزاهم خير
معلومه بضيفها
دايما الشريطي يسألك ويكرر السؤال كم سيمت لو قبل سنه
وكم حدك ويحاول يخليك تقول اي حد علشان يعرف بكم ناوي تبيع وبعدها يسوم
دايما الشريطي يقول انا والله بستخدم ماني شريطي
والا يقول انا والله موصى عليها ماعرف اقيامها
احرص على ذكر اي عيب بالسياره
علشان اذا اخذت العربون سواء من شريطي او مستخدم مايكون له حجه بإلغاء البيعه بدون سبب
وحط في بالك اذا انت عجل على البيعه بتبيع بسعر اقل عن توقيف الموتر بمعرض

احترامنا وتقديرنا لكل شريطي
عسى الله يرزقنا وياهم من واسع فضله ونعتذر ان اخطأنا
ماذكر اعلاه واقع جربناه .. من بعض الشريطيه وليس الكل
ارجو ان لا يزعلون علينا ،، نتمنى لهم كل خير ورزق وفير

:

[ابونبيل]

احسن اخي المميز التعميم خطأ

[ابوهايلكس]

المشكلة الحين ما تعرف الصادق من الكاذب والشريطية الحين اشكال بعضهم غير معروفه يجيك مسحب بزارينه مسوي رجال بيشتري يدور سيارة ولا معه هندي يقول بدور لسواقي ولكن لا تعطيهم وجه واذا تبيهم ينقلعون عنك على طول عطه سعر فوق سعر سيارتك مثلا سيارتك تسوى 30 الف قل حدي خمسين الف عشان معد يناقشك ويروح مكره معي اكسنت 2012 جديدة ما مشت اربعين الف جاني واحد منهم قال سيم قلت لا قالي تبيع بعشرة قلت ضف وجهك لا دعسك بالموتر الله يكفيك شرهم خاف وانحاش

[مسير عليكم]

الله يكون بعونك
والشباب يتكلمون عن الشريطيه حسيتهم بياكلونك الي يقول ارفع سعرها والي يقول لا تعطيهم وجه كن الشريطي عليه علامه اخوي البيع والمشترى توفيق من الله فلا تشيل هم شريطي او غيره لان موب جايك الا رزقك والي مكتوب لك
ذكرتني ببيعه باترول ربع كان معي وديته النسيم والشفاء وحراج ومستعمل ماجاب اكثر من 27 والمشكله اخواته بحراج 35 واخر شي شراه زميل لي بالدوام ب27 والحمد لله هذا رزقي

[mhusain]

الله يكون بعونك
والشباب يتكلمون عن الشريطيه حسيتهم بياكلونك الي يقول ارفع سعرها والي يقول لا تعطيهم وجه كن الشريطي عليه علامه اخوي البيع والمشترى توفيق من الله فلا تشيل هم شريطي او غيره لان موب جايك الا رزقك والي مكتوب لك
ذكرتني ببيعه باترول ربع كان معي وديته النسيم والشفاء وحراج ومستعمل ماجاب اكثر من 27 والمشكله اخواته بحراج 35 واخر شي شراه زميل لي بالدوام ب27 والحمد لله هذا رزقي

لا فض فوك اخي الحبيب

فعلا ما عليك في احد السيارة سيارتك
لو ناسبك السعر بيع للي يدفع اكثر

رزقنا الله واياكم من حيث لا نحتسب
تحياتي

[كم كيلو باقي]

الشريطي ماله مدخل عليك ابدا الا بشيء واحد
بيقول لك بفحص الموتر وبيدخله ( كارتك ) وهذا مركز الشريطية
يطلع لك كل ماهب ودب بالموتر اشياء صدق واشياء سواليف
لو تدخل موتر وكالة اصفار قالك فيه عيوب
ثم بيجيك الاخ المشتري ويحاول يبخسك بالسعر نظرا للعيوب

[خالد 177]

الله يجزاكم خير جميعا

سؤال اخر وش رايكم لو ادخلها معرض اخليها عندهم لين تجيب لي سعر كويس

[فارس العمور]

وازيد على كلام الشباب اعرضها بموقع الانترنت مثل مكيات وموقع مستعمل
الشريطيه قليل فيهم

[تميم2222]

ااااااااانتبه من ه>ا المخلوووق الحقيرررررررررر حتئ لو هو صاحبك قبل ما تطلع اقضبه بالعربوون ولا تطلع من الساحه اننتبه