××××((ابي اشبك الطيور الغاديه))××××

[(هزاع)]

السلام عليكم ورحمة الله وبركاته
تحية اخ لخوانه
انا قررت اشبك الطيور الغاديه لانها اكثر من الطيور المهاجره وبي احط غرامه (مثل ساهر)على راعي الطير اللي (بدون حجل)25 ريال(امزح عليكم)
كل يوم وحنى نسمع بفقدان طير
مهو شي غريب الغريب انه (بدون حجل)ليه بدون حجل هل الحجل غاااالي ب 25 ريال تحفظ حقك لاطرحه الله بيد حدا المسلمين لان بعض الطيور تقطع سبوقها
الحجل من مادة الامنيم لايصدا ولايتقطع
لاتهمل والله اني كتبت قبل كذا نصيحه ولاسمعت بطير غادي وبدون حجل بالرجل اني اشد راسي اقول وش بالناس من الاهمال
اتمنا من الله العزيز القدير ان يحفظ حلال المسلمين انه على كل شي قدير
اخوكم هزاع

[علي الغرابي]

بيض الله وجهك اخوي هزاع
عز الله اني ما اعرفك ولا اضن اني قد واجهتك
لاكن ما سمعته عنك من حسن خلق وحسن تعامل من رجالاً شرواك يجعلني افخر بمعرفت من مثلك
تقبل مروري
ابو منصور

[القصير111]

وعليكم السلام ورحمة الله وبركاته

والله كلامك عين الصواب والعقل

لكن واحد مثلي في منطقة بعيده ولاعنده مكان يسوي فيه الحجل أكيد بيكون طيره بدون حجل

حنا في منطقة تبوك مثلًا ماعندنا على الرغم إني سمعت واحد يقول في محل يسوي لك في الرياض ويجيبها لك عن طريق الشحن اللي يعرف محل يسوي حجل ويرسله لي
يعطيني رقمه وبيض الله وجهه

وبيض الله وجهك أخوي هزاع

[قرناس شماالي]

مشكور يالغالي على النصيحه

وبعض الاخوان مايحط حجل لان المنطقه مافيه محل يسوي

وصراحه حنا بسكاكا مافيه

وسالفت الحجل سالفه بلمناطق البعيده عن الرياض ولى بديار بعيده

[الذحاح]

كويس ان طاحت بيد نشمي الا لا تركب روسها وتكمل الهجره على افريقيا وكلامك مظبوط ياهزاع الله يبارك فيك

[اقدم صقار]

السلام عليكم
جزاك الله خير اخوي هزاع بصراحه كلامك في محله
ولاكن الحافض الله والاسباب لها دور والاهمال سبب كبير في فقد الطير
الشي الثاني اخوي هزاع ولا يهون من يقرا بعض الناس يهد طيره في وقت الهواء القوي وهذا اكبر غلط وفي وقت العج ونشوفهم يهدون واذا جا في الليل وتجمعنا قالو طير فلان ضاع
ليش ما يضيع ؟!!!
اقول الله يحفض لنا ولكل مسلم
اسف على الاطاله ولاكن الموضوع مهم جداً
تقبل مروري اخوي هزاع
اخوك ابو منصور

[ربع خالي]

وعليك السلام ورحمة الله وبركاته

ماتجي العلوم الطيبه الا من أهلها وانت لها
وجزاك الله خير على الموضوع الطيب
تقبل مروري

[ابوعزيز2007]

الله يعافيك يالنشمي دائما مواضيعك حساسه

[ابوعزيز2007]

وعلى فكرة ياخوان ترى مركز القصيم للصقور الآن يسوون حجوول بالاسم والرقم 5حبات ب100ريال

[(هزاع)]

وعلى فكرة ياخوان ترى مركز القصيم للصقور الآن يسوون حجوول بالاسم والرقم 5حبات ب100ريال

هذي بشاره لاهل القصيم الله يبشرك بالخير

[الشلاعي]

عسى الله يعقل طيري والله اول ما اسوي اطق فيه حجل لو مو بأسمي ههههه هزاع بيض الله وجهك كلامك في محله

[ولد جدة 2012]

والله كلامك عين الصواب والعقل

[(هزاع)]

عسى الله يعقل طيري والله اول ما اسوي اطق فيه حجل لو مو بأسمي ههههه هزاع بيض الله وجهك كلامك في محله

بعت طير على رجال من اهل الخرج والطير به حجل للاخ فيصل ابو ثنين مافكيته وراعي الخرج هد طيره وجاته عقبان وستطار منها وغدا وبلغني وبلغت ابو ثنين وعقب ايام انطرح الطير بيد عيال حلال وتصلو وتم استلام الطير من قبل اهله بيض الله وجيهم كلهم عيال حلال يدورون ماعند الله