صباح / مساء الخير للجميع
اليوم جايب لكم تقرير صيد في جزيرة جنا
سلمكم الله عزمنا انا و شريكي و صديقي أبو حميد ننزل البحر يوم الخميس 26/1/2012 و جهزنا العده و شرينا اللازم و ناوين بنيه على الكنعد ..
و هذا خويي أحمد متحمس و لابس الفروه .. تخبرون الجو بارد و طالعين من الدمام الى الجبيل ..
طلعنا بدري الصباح و كانت الساعه 6 و نص و درجه الحراره 8
شوي و الا الشاب اللطيف ساهر يصبح علينا .. بس حمد الله ان تفادينا و ما صادنا ..خخخ
بعد ما تعدينا ساهر أبو حميد بدأ يسرع و أنا اقوله لاحقينا و رزقنا محفوظ ..
و الحمد لله جات نقطعه التفتيش و أجباري خفف السرعه و ربط الحزام ..هههه
و بعد ساعه وصلنا الجبيل و قربنا من جزيرة ابو علي ..
بعد تعبيه البنزين و تشيك الطراد ... و انتظرنا مجموعه مع الشباب و نزلنا قروووب من ثلاث طرادات طردنا و النوخذه ابو راشد و النوخذه ابو مشعل .. طبعا تأخرنا في النزول و ما وصلنا جزيرة جنا الا الساعه 10 تقريبا
و الحمد لله بعد ما نزلنا الدرجه 10 دقايق الا و انشدت ( الدرجه) : هي الخيط للفاح .. و هات سحب و تحمست في البدايه قلت كنعده بس بعد ما سحبت نص الدرجه تبين لي انها تبانه (تونه) .. و هذا الفيديو:
بعدها بنص ساعه ضربت معنا وحده ثانيه بس فلتت و تحطمنا انا و الخوي قلنا نبي الكنعد .. مع الساعه 12 و نص وقفنا و حدقنا قريب الجزيره و كان الصيد شعري و أحجامه صغيره ما صورته ..
هذا أبو حميد مروق على زقاره صورته و هو مو داري ..خخخ
شوي و اشوف اللي يأشر لي و قول منو هذا و اتفاجأ انه العضو ((صايد الحوت)) أخو و صديق عزيز .. كنت مكلمه الصباح و قال انه ما ودي ينزل .. و في الأخير اشوفه بالجزيره ... هذا البحر من يهواه .. هه .. يقول انه قلبها في راسه و ما يبي يفوت هذي الأجواء .. و أنا داري انه ما يستغني عن البحر ..
و هذا العضو ( النوخذه الاول) الأخ ابو مشعل يورينا صيده ... و الله حماس ... و قلنا وينك يا اللفاح .؟؟
و بعده رجعنا الى اللفاح .. و قلت لازم ارجع بكنعده اليوم و لا برمي خويي أحمد في البحر << ههه أمزح لا تصدقون ..
و شويات انشدوا الدرجتين سوا و هاته سحب انا و خويي ... ما في أحد يصورنا .. و تاليها طلعوا تبانات ( تونه ) .. و بعده طلع معنا خضره صغيره و بعدها تبانه ثانيه ..
الساعه 4 العصر .. انشدت الدرجه و هاته صحب و هالمره الله وفقنا و طلعت كنعد .. و هذا الفيديو :
و بعده اكتفنا و المهم ان برد الخاطر بالكنعد .. و قررنا الرجعه قبل المغرب و كان الجو و لا أحلى :
و هذي الحصيله النهائيه غير الحداق ما صورته ..
و هذا انا مستانس بالصيد و أهم شيئ ان فيها كنعد .. اعشق أكل هذي السمكه و أعشق صيدها ..
أتمنى ان التقرير أعجبكم .. و لاتنسونا بردودكم اللي تبرد الخاطر .. و لاتراني بتحطم و لا بنزل تقرير و ببيع الطراد و بنعزل عن الناس و يمكن تجيني حاله نفسيه و يمكن انتحر و راح تتحملون ذنبي .. هههه <<< امزح يا شباب ..