شارك معنا في كيفيية طريقة صيد (الهامور)

[مطر5731]

السلام عليكم ورحمة الله وبركاته

هذي اول مشاركة لي حبيت اشارك وياكم

انا احب الحداق موضوع الهامور عجبني

كيف انصيده انييب نص عومه و طبعا الميدار يكون كبير والخيط 70 وانفره بين الحصا اللي عالبحر ونتريا ساعه ساعتين والحمد لله هالخطة ناجه ويانا وسلامتكم

[بو راشـد]

وعليكم السلام ورحمة الله وبركاته
حياك الله أخوي وأنشاء الله تستفيد ونستفيد وتلاقي كل ألي يرضيك في الخيمه البحريه وتسلم أخوي على هذه المعلومات القيمه وأنشاء الله أنجوف مواضيعك.

وتحياتي لك....................................

[بودعي المانع]

يعطيكم العافيه ..ع الموضوع الحلو ...
انا الصراحه ان خلص اليم مني ...استخدم طريقه جدي ..
الهامور ترا من اغبى السمك ..في القاع ..
فجدي كان يغطس قطعه قماش حمره اللون ..في ثلاجه السمج ..ويشيله عشان تلصق الزفره فيها .
ويحطها بالميدار ..المعروف ان الهامور يبلع ..

وماشالله جربتها ..ونفعت وياي وااااجد

[Alhzzen]

يعطيكم العافية على الطرق


شكرا

[صياد السبيطي]

وعندي طريقه للمسمى الغبي (الهامور) عندنا في الشرقيه

نصيده بميده طول صبعين من يدك والطريقه كدالك::::


جيب ميده شكها من الضهر خلي الميدار يطلع من فمها

وتالي جيب غرشة عصير او غرشة ماي اي نوع بس تكون 2لتر (عبها ماي بحر ولاتسكرها)


ارمي الميده ادا نت جنب صخور اوقاعد على كرنيش قطها مسافة

8 م او اقل واربط الخيط في الغرشه وخلي الغرشه جنب البحر على الصخر

وانساها الغبي اول مايضرب يسحب الغرشه معاه وطبعا البكره تكون معك في يدك واشتغل

ودعواتكم ...يوم الخميس الجاي طالع طلعه اقتل السبيطيه انشالله راس ابو علي ...

[المحتسب]

بيض الله وجهك يابوعبدالله والأخوان جميعاً على طرق الصيد هذي وحنا فعلاً نحتاج نستفيد من خبرتكم يا النواخذه

[gulfhunter]

السلام عليكم ورحمة الله وبركاته

حياك الله أخوي المحتسب

اقول ماعليك زود يالغالي ومشكور على التعليق الجميل

تحياتي لك وللجميع

[Lance]

الهامور ماله كبد على صلاخة اليواف اوالميد أو تفطله محاياة عموما الهامور بتاع كله خثاق ربيان صلاخه اى شى وبصراحه متعة الصيد بلحداق او الغوص انا اتكلم عن احساس الصياد بالفريسه وهذا الاحساس غير موجود بطرق الصيد الاخرى

[ابو مشك]

السلام عليكم
مشكور شباب على الموضوع والردود المفيده من المعروف عشقي لشي اسمه برطام ( كشر) وهو من نفس فصيلة الهامور وانا دايم اصيده بساردين موجود بكثره في البحر الاحمر ويضرب عليه الكشر بسرعه والخيط مقاس 70 والميدار كبير من 8 وانت طالع حسب المكان والوقت والحجم الي متوقع تصيده بس لا ضرب عليك يبيلك تكون سريع لأنه على طول من يحس بالسحب يلف على الشعب والصخور وبكذا يلتف خيطك ولا تقدر تطله الا اذا فك الميدار من الهامور او ينقطع خيطك او انك ترخي الخيط وتنتضر يا انه يفك من الشعب او راح عليك الصيد انت وحضك .

[yasert]

مشكورين يااخوان

[النقرش]

طبعا انا رأي السردين أفضل طعم للهامور في الليل وطريقة وضع السنارة هي الترديعة لان السنارة معلقة والسردين يلمع في الليل وله رائحة قوية أما لفاح فهو عبارة عن حبار لونه أحمر به ميدارين ثلاثيات ويوجد الهامور في مناطق الكواسر بكثرة والميناء
وشكراااااا

[ابوشاهين]

يا هلا وغلا بالجميع ... بالنسبة يا اخوان لكيفية او طرق صيد الهامور فاني اعتقد الشباب ما قصروا الكل ادلى بدلوه في الموضوع ... فحبيت اضيف طريقة قديمة جدا أنني اذكر كنا (يعني من زمااااااان) نصيد الهوامير باسلوب او طريقة ما انذكرت في الطرح وهي لا تحتاج لييم (طعم) ولا غزول ولا خيوط الخ يعني توفر كل هاذي الامور ... اذكر كان معانا رجال من اهل الخبرة لاولين وفيه ناس مثله بس ما هم واجد حتى في ذاك الوقت ... كنا اذا ثبر البحر (الجزر) ندخل للقاع الي فيه فشوت ويسور وقيفان وكان ما شاء الله عليه يعرف الميفره الي ممكن يتواجد فيها الهوامير وكان يدخل ايده وهو جالس على اركبه وكان يطلعهم بلواحد وممكن يوصل طول الهامور الواحد الى نص متر واوقات يطلع اكثر من ثلاثه مع بعض ناهيك عن بعض الينم الي يطلعهم مع الهوامير ... بس يا اخوان هاذي الطريقة تحتاج لشخص ذو مواصفات منها ان تكون يده طويله وقويه وفطن لانها طريقة بصراحه خطره حيث ان داخل الميفره فيه روس حصا مثل السكاكين ممكن مع قبضة الهامور تصيب اليد وتشير ويسقي (المد) البحر وتصير مصيبة !!! ويقال ان كذا شخص راحوا فيها بسبب سوء معرفتهم الجيدة بهذه الطريقة ... انصح بتوخي الحذر والحيطة ويفضل عدم استخدامها ... مع خالص تحياتي للجميع .. أخوكم/ ابوشاهين

[gulfhunter]

السلام عليكم ورحمة الله وبركاته

حياكم الله اخواني كلن بسمه

مشكورين على الردود الزينه والإضفات المفيده

أخوي ابوشاهين الطريقه اللي ذكرت مازالو بعض الأخوان يستعملونه وسبق ان جربنا هذي الطريقه.

تحياتي للجميع

[ولد بوظبي]

السلام عليكم ياجماعة الخير وسامحوني على تأخيري في الرد !!
بالنسبة لصيد الهامور:
1) الحداق / باستخدام الخيط المناسب للهامور
2) المحاياه / باستخدام سمجه حية تقريبا بحجم كف اليد
3) اللفاح / باستخدام "الصاروخ" أو "النغر" الخاص باللفاح ويفظل ان يكون اللون أحمر
4)التيفير / باستخدام "تفق الصيد" أو "المنتب" أو "الميدار"
معلومة مهمه وأرجوا أن تستفيدون منها : جرب , اظرب بالكشاف على الميفرة فالليل ولاحظ شو يصير .... بروحه الهامور بيطلع من الميفرة يجوف الليت واستلمه ذيك الساعه !!


أرجوا انكم استفدتوا من ولد بوظبي ........ السموحه يالربع واتمنالكم انشالله التوفيق

[ولد بوظبي]

السلام عليكم يا اخوان .........

على كلام ابوشاهين عن صيد الهامور من الميفرة باليد هذا صحيح , وانا جربت المس الهامور بيدي وهو في الميفرة لكن الوالد الله يطول بعمره انشالله كنت معاه في البحر عند ميفرة وماكان معانا أي وسيلة لصيد الهامور لأنه كنا طالعين كشته بس , والمايه ثبر فنزل الوالد وطلع الهوامير بإيده والحمدلله صدنا 3 هوامير كبار لكن بعد تعب لأن الوالد تقطعت ايده من الميفرة ..

فأرجوا الحذر من هذي الطريقة .. و شكرا يا ابوشاهين على الكلام الصريح ..