شارك معنا في كيفيية طريقة صيد (السبيطي)

[سلاح]

هلا وغلا والله أخوي الخليج
إسمحلي ياغالي
آسف على تأخري بالرد عليك
وبصراحه ما قصرت ياغالي
كلامك كله حكم وفيه فائدة للجميع

الله لا يحرمنا منك ولا من مواضيعك
لا عدمناك

أخوك...............................
أبو عبدالرحمن

[my shark]

مشكوووووووور وماقصرت
بصراحة أنا شفت السبيطي ودخت أبي أصيد وأحد فيه 8 كيلو بس....

[الخليج]

السلام عليكم ،،،،

هدية لاعضاء ومشرفين وضيوف منتدى مكشات وخاصه بوعبدالرحمن+ ومشرفنا بوعبدالله،،
وهذا الطعم الجديد الذي لا يعرفه الاالقليل جدا من الحداقه00<O

1-فيه طعم للسبيطي نظيف ورخيص ومتوفر24 ساعه الا وهو (قوانص الدجاج)
وهو من الاطعمة المفضلة للسبيطي جدا
وانا جربته وصدت فيه صبيطية من الاحجام الكبيرة جدا0
<O

2-هذا الطعم له ميزات ممتازه منها نظافته و يمسك بالميدار بقوه ولو ان لي طريقة خاصة في وضعه بالميدار 0<O

3-وفيه ميزة خاصة لي ايضا وهي اذا كنت شاب الفحم ومظبط الفنجال والشاي اضع طعم للسبيطي وآخر لي اشويه وهكذا لين اصيدالسبيطي (مزحة)0
4-واعتقد انه يصلح للمشبك -اي الشكة مع اني ماجربته بالمشبك0
5-واعتقد والله اعلم ان احسن حداق فيه بالليل الذي تكون القمرا فيه ضعيفة0
6-كذلك جيد بالميدار رقم10علاق+ ركه مع البلد بشرط ان لا تكون في منطقة صخرية 0
7-واذا ما تبي مزيزيه حط ميدار05 وكبر اللقمه ياعنتر 0
8- رش الطعم بالملح حتى تطول مدة صلاحيته
9-سمعت بان لو تقوم بشويه قليلا يكون طعم ما يقاومه السبيطي (هذه المعلومه سوف اجربها ان شاء الله واعطيكم خبر)
اتمنى لكم صيدا طيبا00
،،،هذا ماعند الخليج ياحداقة الخليج،،
<O

<O

[سلاح]

مشكووووووووووووووور ياغالي ولا هنت

وأنا أمس صايد سبيطية وحده بس بعد ما طلعت روحي
والطعم ميد
وسبحان الله فيه شايب جالس جنبي يقول ما في صيد هنا لا تتعب روحك
أخذت السالية ورميتها وطلعت لي كم ميده أحجام صغيرة شوي بس تنفع
ورميت
وما أخذت يمكن نصف ساعة إلي السنارة شوي وبتنكسر
مع أن القصبه شينا وطول 4.5 متر إلا أنها ما تحملت وأنكسرت
ورميتها في الأرض مسكت الخيط بيدي وسحبتها لين وصلت عند عوامات حاطينها خفر السواحل وإلتف الخيط عليه وأنقطع
طبعاً أخوكم ما صاح ولا شئ بس بغي أموت من القهر
القصبة إنكسرت مع أنها (شينا )الأصلية
والخيط إلتف على العوامات
يعني الله ما كتب لنا شئ ذاك اليوم
ولكن الله يرزقنا بالزين والسمين

أخوكم.....................
أبو عبدالرحمن

[الخليج]

السلام عليكم،،،
خيرها بغيرها وابشر بالعوض ترانا حاضرين (كلام جد)
وابشور عليك شوريابوعبدالرحمن مدام ان السنارة انكسرت اترك السنارة واستعمل الخيط فهو افضل من السنارة100مرة بالذات للسبيطي لان السنارة غثيثة في كل شي واهم شي التعامل مع السبيطي الكبير فالخيط افضل منها
معلومه : اذا حدقت السبيطي في مكان وصدت افضل انك ما تحدقه من بكره ولكن احدقه بعد ثلاث ايام 0
الله يعوضك بجد السبيطي اللي راح
،،،الخليج،،،

[سلاح]

الله يسلمك ويبقيك أخوي الخليج
وراسك العوض ياغالي
يكفيني معرف الرجال مثلك وشرواك

وتصدق بالله
أنا وأخوي عزمنا ما عاد نستخدم القصبة وقلنا بناخذ لنا قبة (ما أدري أيش تسمونها عندكم)أ حسن وتحس بالنقد والصيد فيها أفضل
والله يعوضنا وإياك بالصحه والعافية


وفائدة جديدة نتعلمها منك ياغالي

والله يرزقنا وياك بالصيد إلي يطيب الخاطر بإذنه تعالى


أخوك............................
أبو عبدالرحمن

[الخليج]

مساك الله بالخير بوعبدالرحمن
الظاهر بس انا وياك في صفحة السبيطي ولكن لايهمك ما اطلع من هالصفحة الا وانا فايدك ومستفيد منك باسرار السبيطي ان شاء الله
نسمي القبة عندنا (البكرة)----- ماهي بنت الناقة البكر؟
ترا السبيطي اسرارومعرفة يابو عبدالرحمن 00
مثلا :انا وياك نحدق مكان واحد على السيف انا اصيد وانت ماتصيد شفت شلون
حتى المكان اللي تحدقة داخله مكان يكون افضل مكان طبعا هذا يكون معرفتة بالخبرة والتوقع ومشاهدة المكان والتوفيق من الله
سوف نكون معك حتى تصيد اكبر سبيطي بحياتك باذن الله0
ولازالت الجعبة مليئة والحمدلله0
،،،الخليج،،،

[سلاح]

يا هلا وغلا والله أخوي الخليج

لا تخافياغالي مو بس أنا وياك في هالموضوع في ناس واجد يقرون معنا بس ما يردون
وما شاء الله عليك ما خليت شئ ما ذكرته وبصراحه كل يوم نستفيد منك شئ جديد

وإن شاء الله يجي اليوم وتشوف السبيطية إلي يحبها قلبك
وننظر صور من صيدك ياغالي
لاتنسى

وبإنتظار جديدك

أخوك.....................
أبو عبدالرحمن

[الخليج]

السلام عليكم،،،
ادري يابوعبدالرحمن معنا ناس مشاهدين انا اقصد المشاركين
من ناحية الصور ماأعتقد اني انزل شي والسبب مثل ماقلت لك سابقا الخليج شايب وماله ومال الصور0
معلومة :اذا ضرب السبيطي والخيط بيدك لاتشد عليه واتركه يروح بالخيط لو ياخذ القبة كلها
واذا انسان غشيم انصحه يحذف القبه على الارض وهي تتعامل معاه بافترارها على الارض0
واذاوقف وقف معاه شوي وهنيه لا ترخي الخيط ولاتشده واسحب شوي شوي
واذا شد عطه خيط خله يروح على كيفه لين يوقف
وبالحاله هذه يكون ضعف واسحبه برفق
واذا شد مره اخرى عطه خيط ولا تخاف تقول السبيطي يبي يضيع علي ولازم اشده
وهكذا لين تتعبه واسحبه سحبه بحيث يكون على جنب وراسه مرتفع شوي تراه في هالحاله ما يتحرك لمده ثواني وما يدري الا وهو برا (تطليعة السبيطي الاخيرة اعتبرها اخطر مرحلة في صيده) مع اني استعملها للمزيزيه اما السبيطية الكبار انزل لها بالبحر وامسكها
اللي يقول الشط السبيطي اول ما يضرب احترم رأيه
ولكني اخالفه واقول لاتلشطه ولكن شدعليه وهويسحبك لمدة ثانيه او ثانيتين 0
هذا ماعندنا من الكويت فماذا عندكم يا أهل الخليج0
اتمنى ان اكون وفقت بالشرح لقارئ رسالتي0
،،،وتقبلوا تحيات الخليج،،،

[سلاح]

جزاك الله خير أخوي الخليج جبت الضايعة
أنا هذا إلي كان ودي أسألك عنه هل إذا ضرب السبيطي على طول أشد أو أرجي له

وقد جاوبت عن هذا السؤال مشكوراً
وجزال الله خير ياغالي


بس حبيت أسأل
بالنسبة لقوانص الدجاج
هل هناك أنواع تضرب عليه غير السبيطي أو لا ؟
وكيف طريقة شكه بالميدار؟

وأنا ألحين إحترت في ناس يقولون خل البلد(الثقل) تحت والميدار ركه (فوق)
وناس ثانية تقول خل البلد(الثقل) فوق وميدار بعيد عنه بأقل من متر تحت

أرجوا منك الإجابه على هذه الأسئلة
مع أني أصيد السبيطي عادة بالخطوة الأولى أعلاه


وجزاك الله خير الجزاء

أخوك................................
أبو عبدالرحمن

[الخليج]

السلام عليكم اعضاء ومشرفين وضيوف المنتدى ورحمة الله وبركاته،،،
حياك الله بوعبدالرحمن ،،،
تسال هل يضرب على القوانص غير السبيطي ؟ الاجابة نعم
بالنسبة لشكة القوانص بالميدار لها طريقتان : اشتر القوانص الطازجة اللى تجي مغلفة في مواعين بلاستيكية 4 ريال تقريبا
الطريقة الاولى: القونصة الوحدة لها هبرتان اذا فردتها اقطع الهبرة لحالها من غير الجلد من القوانص
الهبرة اقل من فذة التمرة حتى تحصل على كمية كافية للمحداق ضع بالميدار 05 بو شوكتين بالخلف 4 هبرات بالعرض كل هبرة شكة واحدة بالنصف حتى ينترس الميدار،،،،،
الطريقة الثانية :ضع هبرتين 2 بالطول في05
الطريقة الثالثة :خذ قونصة كاملة من غير تقطيع واغرس الميدار غرسة واحدة في كل هبرة
الطريقة الرابعة :حط بالميدار رقم 10 هبرة واحدة بالطول (للمزيزية والسبيطية )
اما بالنسبة لطريقة الميدار والبلد :كل الطرق اللى انت ذكرت تصيد ولكن؟ ايهما افضل ؟ واليكم الافضل اعضاء ومشرفين وضيوف المنتدى
1- اذا المكان مافيه صخر فلافضل ميدارين 10واحد قدام البلد وواحد خلفه للاسماك الصغيرة والكبيرة (طريقة غير آمنة نوعا ما للسبيطي الكبيرجدا جدا)
2-هذه طريقة خاصة للسبيطي الكبير والمتوسط الميدار 05 في راس الخيط وبعده بشبرين ونصف إلى ثلاثة اشبار ضع البلد ة ولاتخليه متر مثل ماتسمع لان تطويل الخيط له سلبيات كثيرة لا يسع المقام لذكرها (هذه افضل طريقة احفضها عدل يا شيخنا)
2- ضع الميدار 05 في راس الخيط من غير بلد هذه نسميها بالكويت (طفاحي) (وهي اقوى وافضل طريقة على الاطلاق للسبيطي وليس لها سلبيات وهي التي استعملها )
يقول الرسول صلى الله عليه وسلم( الدال على الخير كفاعله) اي خير الدنيا او الاخرة
نسأل الله عز وجل ان نكون واياك الدالين على الخير وفاعلينه انه جواد كريم
،،،،،،،،،،،،،الخليج،،،،،،،،،،،

[بو راشـد]

السلام عليكم ورحمة الله وبركاته
تسلم ياخوي الخليج وياخوي سلاح على هذه تغطية لموضوع السبيطي. وحبيت أضيف شي هو عند الذهاب للحداق من على السيف يفضل أن يكون معك (نابر) والنابر هو أي شي طعم يجذب السمك مثل قشور الربيان الطحين فهذه الأشياء لها جاذبية للسمك ومنها السبيطي. أيضا عندما ترى راس منجوس أو ميد يفضل أن تصيد شي من هلمنجوس أو الميد ألي أمامك وتحدق فيه للسبيطي عشان مايصير عيار ويضرب على الطعم ألي رميته له. وبنسبه لي عند ذهابي لحداق السبيطي أما طياري (بدون بلد) أو ركة وخلي 5 الى 7 باع مسافة بين الميدار والبلد.

[الخليج]

حياك الله ابوراشد ولا انسى انك اول من استقبلني في هذا المنتدى،،،
كلامك صحيح 100% عن المنكوس والميد تصيد منه في المكان وتحدقه ولكن فيه شغله مهمة جدا (لايشوفك السبيطي وحاول ان تقط له كذا خيط وانتظر لاتسحب الخيط الاول اذا صاد حتى يصيد معك الخيط الثاني طبعا بحالة ان السبيطي يضرب باستمرار على الميد او المنكوس 0
وانا مانسيت هذه الامور ولكن حبيت ان يشارك معنا الاعضاء امثالك يابو راشد0
تقبل تحياتي الخاصة لك،،
،،،،الخليج،،،،

[بوخليفه2005]

مشكور أخوي gulfhunter وفيت وكفيت.........

[سلاح]

أهلين وسهلين أخوي الخليج
ما قصرت ياغالي كفيت ووفيت
إن شاء الله الطلعة الجاية أجرب القوانص وأرد لك خبر بإذن الله

هلا أخوي بو راشد
الله يسلمك ياغالي
مشكور أخوي
وبإنتظار جديدكم بفارغ الصبر

منكم نستفيد


محبكم..................
أبو عبدالرحمن