السلام عليكم ورحمة الله وبركاته
راعي العجراء وصكة الباب
هذه السالفه عن صكة البيبان وماهو موقف راعي العجراء من صكة الباب
اليكم السالفه
سالفة راعي العجراء هالمره غير بزاوية تسعين كيلوات هترز كوبن هاجن كيلو وأت
عن ملاحق الدجاج والبساس
نبدا بالسالفه وهي صكة الباب على الخشم والرقبه
ادري انها غريبه عليكم وكيف حصا ذلك
اخيكم راعي العجراء من المفتونين بلعب الكوره من نعومه اسنانه مدري اصابعه انا اذكر شي يقولونه منذوا نعومه ؟؟؟؟ واعتقد منذوا نعومة مخلابه ثم تحول الى مشجع بعد ماصارت رجليه من الكبر تقول فصلات كبوت جمس من الاولات القديمه يالله حسن الخاتمه
المهم كنت العب كوره مع الاطفال بالحاره في شارعنا المهم تمازعنا انا واحد بالكوره ثم وصلت الى التصافق بالسيقان ثم الى التشابك بالايدي المهم اني ضربت الوليد وهجيت ودخلت البيت وخليته يصيح قعد في البيت وضاق صدري ودي اطلع لايروح علي العصر مالعبت كوره قلت ابطلع اشوف وش الوضع
وانا افتح باب البيت وانا اطل عليه مع فتحة الباب وكان خشمي هو من سبقني الى الفتحه واقعد اجس النبض وخشمي بين الدرفتين للباب الا وخوي الصغير جاء عند الباب ووقف له شوي وانا اشوفه وهو مايدري عني كان ملقيني ضهره يوم جاء يروح وهو يمسك عروة الباب ويصكه
الا وصفقتين الباب على خشمي وانا اللي اصيح اهلي جو عندي يحسبوني اصيح وحاط راسي على الباب مادروا ان الباب ماسك خشمي واشوى عرفوا ان الباب ماسك خشمي ويفتحون الباب
دارت الدنيا وراحت وكبرت وشريت سياره واعرست والرجه لك عليها
مايحتاج اقول عقلت ماراح تصدقون راعي العجراء عارفينه عدل خلوني اقولها لكم على بلاطه الرجه الى الان ساريه المفعول
والاعتراف بالحق فضيله
وكان معي جمس ونيت 77 ويوم جيت انزل من السياره الا وتحت الرجلين مفك سكروب بس انا فتحت الباب وهو يطيح بالارض نزلت راسي ابا اشيله وبنفس الوقت ابقفل الباب وانا اصك الباب على رقبتي يوم دارت عيوني ودارت فوق راسي عصافير افلام كرتون ببباي وطقته
وانتم عارفي بباي اللي مغرم بذيك البنت اللي سيقانها تقول بلف نار وبلف هواء حقات مكينه ددتسن يبيلهن صنفره مدري وش لاقي فيها من الحلى
المهم اني طحت بالشارع من قوة الصفقه واخيرا صحيت وقمت ولاقلت لواحد اني صاك باب السياره على رقبتي ماصدق قال مايصير ووشلون ولا يصدق ولا شرحت له السالفه اخذها ضحكه علي حتى يومنا هذا
انتهت السالفه واشكركم على تواجدكم وسعة صدوركم واسف اذا انا ثقلت عليكم بسواليفي
الممله والتي ليس لها وجهه معينه
وقبل الختام سبحانك اللهم وبحمدك لااله الا انت استغفرك اللهم واتوب اليك
تقبلو تحيات
اخيكم المطفوق راعي العجراء