السلام عليكم ورحمة الله وبركاته
صبحكم/مساكم الله بالخير وحياكم ربي
معظم ما نمر به ننساه خصوصاً بالصغر .. اليوم جايبين ذبيحه ومعها راس الخروف وانا احطه بالقدر كن عيونه تناضرني كرهته وذكرني بموقف ما أحب اتذكره قلت اللي يبيه يطبخه وهذا قرار لا مشورة ولا رجعة فيه
نرجع لسالفتنا:
رحنا وحنا صغار لحلة العبيد<كلنا عبيد لله والحمد والشكر له>وهو حي من احياء رياضي الحبيبه ولا ادري ليش مسمينه بها ألأسم لين الحين!!على ما أذكر ان الشارع العام لها الحي فيه جزارين يبيعون لحم لسان وكبده وكرشه ولحمة راس ومقادم اللي يسمونه كوارع بقر وخرفان وأذكر ان هناك باحه او ساحه فيها كثير من الفخاريات للبيع مثل <الجرار .الزير.احوض صغيره للزراعه.واذكر ان فيه محل لبيع الالات الموسيقيه والعياذ بالله>
السالفه اننا وقفنا نبي نشري لحمة راس ولسان ومقادم <كوارع>
انا ماقد شفت إلا لسان الخروف والجميع يعرف حجمه لكن بهاك اليوم شفت لسان بقره واستعجبت كثيروين تحط لسانها ذا كله الوالد شرا لسان خرفان ثم مشينا نبي لحمة راس خرفان ولا وش اشوف راس بقره هقوتي هذا دينصور الله والعالم ولين ذيك الايام يجي بالتلفزيون مسلسل امريكي اسمه ارض العمالقه يتكلم عن مجموعه تعرضو لأشعاع وصارو أقزام يتغبون بجخورة الفيران والصوارير خوف من العمالقه اللي هم الناس الطبيعيين ..
كنت اخاف من هالمسلسل ولين نمت احط البطانيه حدر راسي ورجليني وتحت جني الايمن والايسر همن اصير تقل مكفنه من الخوف لا يجون
قلت للوالد:
يبه انت متأكد ان هذولي مهوب اقزام وعمالقه؟؟
ناضرن ابوي وما علق بأكثرم من وشي!!!!
ياحيلت الله وكملنا مشي لمحل الكوارع ولين الكوارع البقري مصفوفات تقل صبة عماره والغنم جنبهم تقل مسامير ايييييه.انا ناضرت وقلت بس ما يبون يقولون لي عشان ما أخاف ..
ما دريت إلا والوالد يقول دوتس امسكيه لا يطيح ولاه رجلين وانا اللي اجدعهن وركض بها الشارع من الخوف لا يطلعون العمالقه ولا الاقزام ومادري وين اتغبى ولا وقفن إلا صدمة صدام موتر بجبهتي وخذ ياتخاريف مدري وش صار هو دعسن عملاق ولا أكلن قزم ..
تحياتي
اختكم
..قوافي..